Ti Gasatmo
VIRGO (Agosto 21- Septiembre 22). Babaen ti kinalaingmo nga agsalimetmet, manamnama ti kinagin-awa iti daytoy a bulan iti laksid dagiti masarsaranget a pakaburiboran. Makarikna iti talinaay apaman a mapanunot a ti parabur nga impaay ti situasion ket tiempo a napairut ti langenlangen iti pamilia. Nagasat a numero: 2, 4, 9.
LIBRA (Septiembre 23- Oktubre 22). Maawatandaka dagiti nakautangam iti pirak ken tiempo no bilang saanmo a matungpal dagiti inkarim. Masdaawka iti kinamannaawat ita dagiti papagayammo, ken uray dagiti kaano laeng a naamammom. Gumanarka kadagiti aramid a kadagitoy laeng a mainsiarmo. Nagasat a numero: 3, 5, 7.
SCORPIO (Oktubre 23- Nobiembre 22). Ad-adda pay a matagipateg dagiti bambanag nga adda kenka nangruna dagiti impagarupmo a saan unay a nasken. Mapukaw ti sikormo apaman nga ikeddengmo nga awaten ti baro a kasasaad ti biag ken panagbiag. Ti kinasalimetmet ti mangidur-as kadagiti aldaw nga aglabas. Nagasat a numero: 1, 6, 8.
SAGITTARIUS (Nobiembre 23Disiembre 20). Gapu iti panangbaliwmo iti perspektibam wenno panangkitam iti lubong, makitam dagiti rayus ti balitok kadagiti amin a bambanag. Ti ibilang ti sabali nga uging, kabaelam a mapagbalin a diamante. Naidumduma ita ti kinaandurmo ket mausarmo a para kadagiti gannuat a pagnayon iti pirak. Nagasat a numero: 3, 4, 7.
CAPRICORN (Disiembre 21- Enero 19). Ti tunggal kanito nga aglabas, dika makarikna iti utoy gapu iti kaaddam iti sidong dagiti patpatgem iti biag. Ti pannakapnek a marikriknam ita, paruarenna dagiti naiduldulin a talento ken kinamanagparnuaymo a dagiti bungana, para iti pamiliam, ken kadagiti mangnamnama kenka iti tulong. Nagasat a numero: 1, 5, 9.
AQUARIUS (Enero 20- Pebrero 19). Mapunnuan ti nakadkadan a pagbagasan babaen ti panangipataray kadagiti sanikua a no panunoten, saanmo met a kasapulan. Adda dagiti panagsakripisio a nasken nga iwayat para kadagiti patpatgen iti biag nga iti masakbayan, apitemto met laeng ti bungada. Nagasat a numero: 3, 4, 7.
PISCES (Pebrero 20- Marso 20). Laglagipem laeng a dagiti pangngeddengmo, gapu kadagiti patiem a kinapudno, ket natalekka iti dayta. Gapu iti daytoy, mapukaw dagiti panagduaduam iti mabalin nga ibaga ti sabali. Saan met a dakes ti umasug iti tulong ta talaga met a kasapulam. Laglagipen ketdi nga addaanka met kadagiti tallugading a mausar tapno makaganar iti pirak. Nagasat a numero: 2, 5, 8.
ARIES (Marso 21- Abril 20). Maamirismo a pudno a saan laeng a dagiti material a bambanag ti napateg iti daytoy a biag no di dagiti patpatgen. Parabur pay kenka ti pannakagun-odmo iti wayawaya a mangaramid kadagiti pagaayatamo nga aramiden. Adu ti mairanud ken maragsakan no aramidem a produktibo ti naawatmo a tawid. Nagasat a numero: 1, 4, 9.
TAURUS (Abril 21- Mayo 20). Lumagan dagiti aramid iti pannakaamirismo a mabalinmo nga usaren dagiti babassit a bambanag nga adda kenka. Dagiti imbilangmo nga awanen ti serbina, isuda ti mangipaay kenka iti naisangsangayan a parabur. Saanmo a pagbabawyan ti yaasidegmo kadagiti bambanag a nalangto wenno namaris. Nagasat a numero: 3, 5, 8.
GEMINI (Mayo 21- Hunio 20). Masapul ti kinalawag iti balikas ken tignay tapno saan a maisakripisio dagiti aramidem. Kanayon met nga agisagana iti ad-adu ngem maysa a plano tapno dika agammusay iti awan. Agtalek kadagiti kameng ti pamilia tapno saan a matawtaw ti nabatbati a limitado a rekursos. Nagasat a numero: 2, 4, 9.
CANCER (Hunio 21- Hulio 20). Awaten ti baro a kasasaad ti panagbiag tapno lumagan ti rikna. Yatiddog met ti pasiensia ta kunada ngarud, ti naanus makagun-od. Babaen met ti digital a wagas a makaawat iti yamanen. Naruay latta ketdi ti parabur nga ipaay kenka dagiti mula nga agbunga. Ad-adda a makatulong iti sabali no serken ti panaglakolako. Nagasat a numero: 1, 6, 7.
LEO (Hulio 21- Agosto 20). Nupay kasla agkurkurang kadagiti rekursos, pagyamanan ti panagtalinaed a nasalunat. Kunada ngarud a sanikua ti salun-at. Gapu iti panagayatmo iti nakaparsuaan, maimatangam ti kinapintas iti amin a disso. Gapu met iti kinadalus ti panunot, ibilangmo amin a masagangmo a parabur. Nagasat a numero: 3, 5, 8.