Kuarantina

Daytoy gayam ti let-ang iti uppat a suli ti bassit a balay nga up-upaanmi ditoy siudad. Nasukisokkon, nasarungkarakon dagiti amin a sentimetro a paset dagiti diding ken atep.

Tallo a bulan manipud nangrugi ti kuarantina, kamkamatek pay laeng ti namnama iti daytoy a let-ang, iti abong no, ayna, mariknak ti kinabuntog ti tunggal darikmat a lumabas. Tallo a bulan a dikam pay nakabaybayad iti upa, agur-uray iti ayuda, naumaakon iti raman ti delata nga in-inutenmi a sidaen iti agmalem. Naumaakon iti raman ti maipadpadawat. Nawayang ti limbang, ti kinaawan iti bassit a balay iti nailet a siudad. Ket kastoy gayam ti aguray, ti agpakaasi, a kaska la naibalud. Nakarigrigat ti aguray, a pammaneknek a sibibiag pay laeng ti tao. Nagrigat ti agitured, ti mangnamnama, nga inton bigat, ngata, maikkaten ti kuarantina, a ti murdong ti panaguray, mapanawakon ti nakaibaludak a let-ang.