Kagaw

Siak manen ti kaipapanan ita ti buteng Agwarangwarang iti angin, iti apros, uray

pay iti timek ta yad-adayom no kua ti dumngeg ta amangan ket no kumpet kenka uray ti balikas

amangan ket ta no sagidem ti rikna ket umakar kenka ti likliklikam a marikrikna. Siak man itan

ti mapabpabasol no saanen a makaanges ti lubong a namureng, masapul ita a bugguan iti nadalus a kinatao.

Awanen serbi ti ima, dakulap, rikna, raman, banglo agraman pay rupa a nasken a kanayon a nakaapput

rebbengna a di maparsiakan iti di makitkita a sao wenno mapulagidan iti ayat ti marmarna a lunod.

Nakarkaro ita a kaamakda ti sang-awko uray pay agar-ari ti sabsabali a buteng ken sangasabalian a pammutbuteng

nga armado iti saong ti linteg ken landok kano nga ima. Amang a nagitgita ngem nagtagingipen a bala ti ad-adda

a manguloy iti di mangipangag ken iti paan-anawa. Regkasek ti anges ket malmeska a manggawgaw-at

iti nakem ti awanan nakem, pugsatek ti angin ti lubong ket masiglot ti sirib dagiti daulo a mangmennamenna

iti sungbat a dida maisungbat iti bukodda a partuat a saludsod, aliaw kadi ti pamedped iti mabisin nga aligagaw?

Tabbaaw kadi ti iduol iti nakapupok nga ammangaw? Wenno angaw kadi ti kasayaatan itan a taraon

dagiti naabbongan a ngiwat ken pannakaawat tapno mapnek ti angol ket agtalawen iti konsiensia ti rikriknaen?

Basolko manen amin pati di pannakarikna ken saan a pannakaraman, aniat’ bibiangko iti parikut ti kudil ken dila?

Basolko amin pati pugtit, pugsit, pug-aw, ket mapeste ti mamati nga adda agnanayon ken maikadua a panagsubli.

Ayabandak ta butbutngek ti lagip tapno dinakayo akaran tapno ti buteng bay-annakayo, ikkannakayo iti kaipapanan.