Binaliwan ti Pandemia ti Panagar-aruattayo
Agingga a di maparmek ti COVID-19, ditayto latta mairampa dagiti paggugustotayo nga aruaten.
GAPU iti pandemia a mapaspasaran ita ti sangalubongan, nabaliwan a namimpinsan ti biagtayo. Iti nalaus a buteng ken kas panagannad iti kunkunada a “di makita a kabusor,” saantayon a maaramid dagiti nakaisigudantayon nga aramid. Ditay payen mabalin ti rummuar iti pagtaengan no awan ti nasisita a gandat. Saantayo payen a mabalin ti makipulapol kadagiti gagayyemtayo iti pisikal a wagas. Awanen ti kunada nga outdoor lifestyle wenno dagiti paggugustotayo la unay nga aramiden iti ruar. Nakapupoktay aminen iti pagtaengantayo a kasla billit a nakapupok iti tangkal wenno kas iti kabalio a di makaruar iti koralna.
Gapu ngarud ta awan metten ‘tay outdoor lifestyle, saantayo metten maisuot dagiti paboritotayo a kawes, dagiti agkakalasbang a bado, dagiti agkakangina a sandalias wenno sapatos, dagiti signature a bag. Ditay payen maaramat dagiti koleksiontayo a Maybelline wenno L’Oreal. Kasla nag-back-to-basic-tayo, a kunada. Ta kaaduan metten a para balay dagiti aruatentayo uray pay no nasken a rummuartayo manipud iti pagtaengantayo malaksid laeng kadagiti mapan iti trabaho. Ken ditay met ngarud mabalin ti rummuar iti pagtaengan a di agaramat iti face mask ken face shield.
Isu a no rummuartayo ita, maripartayo a dagus ti nagdakkel a nagbaliwan iti panagkawkawestayo. Addada nakapadiama ken naka-sweatshirt a naabbongan iti hoody wenno kallugong ti uloda. Addada payen agususar iti bandana ken scarf a naiputipot iti tengnged sa maipangato agingga iti batog ti lapayag tapno makaluban ti rupa nangnangruna ti agong ken ngiwat. Idi awan pay ti pandemia, mausar laeng ti bandana ken scarf a kas nayon nga style wenno pang-fashion wenno iti nasisita laeng a pasken.
Gapu met kadagitoy nagbalinen a “normal” nga aruatentayo (kas iti face mask, face shield, bandana kada scarf a nausaren a pagdalungdong), ditay pay ketdin malasin ti kaarrubatayo a masabettayo. Malagipko la ket ngarud daydi naipadamag nga agkompadre a nagkabil gapu ta dida kano nalasin ti tunggal maysa kadakuada. Kasano ngarud a malasin ni Pedro ni Juan a naka-face mask la ngaruden, adda pay antiparrana a transparent a kasla kadakkel ti antiparra dagiti agwelwelding?
Iti naminsan a panagbuyak iti damdamag iti “24 Oras,” naammuak a manipud iti Agosto 15, agbalinen a mandatory wenno inkapilitan iti sibubukel a pagilian ti panagaramat iti face shield. Additional protection, kunada. Malagipko la ket ngarud ti kinuna ti balasitangko kaniak bayat ti naminsan a panagbuyami: “Dandanitay sa metten mapan idiay Mars, mommy?” Ammok a nasaludsodna dayta ta madlawna met ti dakkelen a nagbaliwan ti panagkawkawestayo. Kalpasan ti face mask ken face shield, anianto ti sumaruno? Bungonentayto ngata ti bagitayo iti plastik? Ket nagsaltek iti panunotko ti itsura dagiti astronaut nangnangruna ken ni Neil Armstrong, ti immuna a tao a nakaadak idiay bulan idi Hulio 20, 1969. Diakton masdaaw no iti sumaruno a panagbuyak iti damdamag, ibagadanton a mandatory ti panagaramat iti PPE wenno Personal Protective Equipment.
Dakkel met a karit kadagiti negosiante iti luplupot ken dadduma pay a sektor iti moda ti mapaspasarantayo ita a pandemia. Adu a negosio ti naapektaran no di man nagserra ta awan metten gumatang kadagiti lakoda. Adu a fashion shows iti sangalubongan ti saanen a natuloy. Di kad’ adu a dagiti naawanan iti pamastrekan wenno trabaho, saan laeng a dagiti modelo. Nagbalinen a face mask ken face shield ti sentro ita ti negosio iti personal nga aruaten ta isu metten ti masapul no rummuartayo. Ta
no ditay met agusar, malaksid a mabalin a makasabattayo iti tao nga infected iti virus wenno no makitadatayo dagiti kameng ti polisia, tiliwendatayo ken pagmultaendatayo pay. Kasla maysan a krimen ti di panagaramat kadagitoy. Isu a kanigid-kanawan ita ti panaggatangtayo kadagitoy a proteksion kontra iti COVID-19.
Agingga a di maparmek ti COVID-19, ditayto latta mabaliwan ti panagkawestayo ta pasetto latta ti biagtayo ti panagaramat iti face mask kada face shield. Ditayto latta mairampa dagiti paggugustotayo nga aruaten a kas kadagiti bag wenno sandalias wenno dagiti branded a bestidatayo. Nagayadto latta met ti isem dagiti negosiante iti face mask ken face shield.
Ngem masapul nga ag-adjust-tayo iti benneg ti panagar-aruat iti daytoy makunkuna a panawen ti new normal. Saan met ngata a kasla panagsagsaganatayo a mapan idiay Mars ngem awan kas iti agsagsagana iti ania man a mabalin pay a mapasamak. Nasaysayaat ti sibibiag a naka-face mask ken naka-face shield ngem ti maitabon iti 6 a kadapan iti uneg ti daga wenno ma-cremate wenno mapagbalin a dapo, di ngamin?—O .