Pagaayat ni Kathryn ti Aginum No Kaduana ni Arisse a BFF-na
ITI maysa nga edision ti vlog ni Kathryn Bernardo, guest-na ti BFF (bestfriend for life-na) wenno nasinged a pagayamna a ni Arisse de Santos a maysa nga influencer/blogger/vlogger ken agnaeden iti Melbourne, Australia.
Napagsarsaritaanda iti nasao a vlog ti nangrugrugian ti panagpagayamda babaen dagiti retrato. Nangrugi ti panagsinningedda idi 2014 a pannakaaramid ti pelikula a “Sisterakas” a nagakeman ni Kathryn a maysa kadagiti annak ni Ai-Ai Delas Alas.
Gapu iti panagiray dagiti dua kadagiti ayup, ken iti panagpada ti kababalinda, nagbalinda a nasinged nga agpagayam agingga iti agdama. Uray no addan iti sabali a pagilian ni Arisse, napagtalinaedda latta ti kinasingedda.
Iti nasao pay a vlog, napagsarsaritaanda ti pagaayatda nga inumen (wine met la ketdi) no agkaduada agingga a mabartekda ken saanda nga ammo ti ar-aramidenda. Iti naminsan a nabartekda bayat ti kaaddada iti Palawan, napanda timmapog iti swimming pool a naka-pajama-da.
Ayna! * * * Masansan a pagsasaritaan dagiti netizen ni KC Concepcion iti social media gapu kadagiti seksi a retrato ken video-na.
Adda nangibaga a yantangay ta pasirip met laeng a pasirip ni KC, nasasayaat laengen no agporno. Kinontra daytoy ti sabali ta apay nga ad-adda a makitada ti ‘panagpasirip’ ni KC ngem dida makita ti kinaimbagna a kas tao.
Sa maysa, adda met nangibaga a no addaanka kadagiti bambanag a maibilang a parabur a kas iti kinaseksi wenno nasalun-at a barukong, awan met dakesna no makita ti sabali tapno maapresiar dagitoy a nakaiparsuaan a parabur.—O