Tips

ADTOY ti sumagmamano pay a palagip ti World Health Organization (WHO) tapno dakdakkel ti tiansa a mailikliktayo iti

coronavirus disease (COVID-19):

* Adda pammati dagiti dadduma a ti panaginum iti nasanger, salaknibannaka kontra iti bayrus. Saan a pudno a daytoy ken idakdakkel pay ketdi ti panaginum iti nasanger ti posibilidad a pannakadangran ti salunatmo.

* Saan a maammuan nga addaanka iti COVID-19 babaen ti thermal scanner. Daytoy thermal scanner, isu daytay maipaturong iti muging tapno maammuan no ania ti temperatura ti bagi, saan ket a tapno maammuan no agsagsagabaka iti COVID-19.

* Ti COVID-19, saan a mayakar babaen dagiti ngilaw. Agingga ita, awan pay dagiti pammaneknek wenno impormasion a mangibaga a ti COVID-19, mabalin a mayakar babaen dagiti ngilaw. Ti bayrus a mangigapu iti COVID-19 ket mayakar, kangrunaanna, babaen dagiti droplets wenno sapri no ti maysa a tao a kinapet ti COVID-19, aguyek, agbaeng, wenno agsao. Mabalin pay a maimpektaranka no maiggamam dagiti banag a nakontaminaran sa masagidmo dagiti matam, agong, ken ngiwatmo sakbay a nakapagbuggoka. Isu a tapno mailiklikka iti pannakakontaminar, pagtalinaeden ti di nakurkurang ngem 1 a metro a kaadayom iti padam a tao ken ti panangdis-impektar kadagiti banag a maigiggaman. Masansan met a bugguan a nasayaat dagiti ima iti danum ken sabon ken liklikan ti panangsagidmo kadagiti matam, agong, ken ngiwatmo.

* Iti kaano man, dimo paspasuyotan ti bagim iti bleach wenno disinfectant. Malaksid a dinaka masalakniban dagitoy kontra iti COVID-19, napeggad pay. Ti bleach ken disinfectant, mausar laeng a pagpasuyot kadagiti banag a maiggaman a kas iti rabaw ti lamisaan, countertops, ken kapadada a mabalin a naimpektaran iti bayrus. Ipuesto ngarud dagitoy iti di magaw-at dagiti ubbing.

* No kabaelam a tenglen ti angesmo iti 10 a segundo wenno napapaut pay a dika aguyek wenno makarikna iti madi, saanna a kayat a sawen a saanka a naimpektaran iti coronavirus. Dagiti kangrunaan a sintoma wenno pagilasinan ti COVID-19: panaguyek nga awan plemana (dry cough), rikna a pannakabambannog (tiredness) ken gurigor (fever). Dimo mapatalgedan wenno masigurado a dinaka kinapet ti sakit babaen laeng ti pannakabael a di umanges a dika aguyek. Kinapudnona, napeggad pay ketdi daytoy nga aramid.—O