Ading Kosinera

NAISAYANGKAT itay nabiit ti panagsanay iti panagproseso kadagiti nadumaduma a produkto dagiti mannalon kangrunaanna ti sili, langkuas wenno amarilio a laya, ken ubi a kas suporta iti Livelihood Project dagiti kameng ti Timpuyog Beneficiaries ti Brgy. 19, Cabittauran, Nueva, Era, Ilocos Norte. Kameng dagitoy a benepisiario iti Rural Improvement Club (RIC) manipud iti nasao a barangay.

Inwayat ti Agricultural Training Institute (ATI) ti panagsanay (training) idinto a nagserbi a Resource Speaker ni Prof. Teresita N. Pablo manipud iti Mariano Marcos State University-College of Industrial Technology (MMSUCIT). Kaduana a nangipakita iti umno a panagproseso ni Dr. Lorma Valera manipud iti MMSU-CIT met laeng. Kalpasan ti panagsanay, nakaaramid dagiti partisipante iti chili oil, chili powder, ube haleya, ube jam, turmeric powder, turmeric tea, ken turmeric candy.

Padasentayo man ngarud ti panagproseso iti naadat a sili ken laya.

Chili Oil Dagiti Ramen:

1 tasa a manteka

3 kutsara a nagiling a naadat a sili

1 kutsarita nga asin

Wagas ti Panangisagana:

1. Paglalaoken dagiti ramen: manteka, sili, ken asin. Lutuen iti nakapsut nga apuy. Kanayon a kiwaren iti uneg ti 5 a minuto.

2. Siguraduen a saan nga umasuk ti manteka. Ipapudot laeng tapno rummuar ti nabanglo nga ayamuomna.

3. Adawen kalpasan ti 5 a minuto. Mabalin met a nabaybayag tapno adadda a rummuar ti ayamuomna.

4. Ikabil iti botelia wenno garrapon sa kaluban a nasayaat.

5. Mabalin met a sagaten no kasapulan.

6. Ikkan iti markana.

Turmeric Powder Dagiti Ramen:

4 kilo a langkuas wenno amarilio a laya (turmeric)

2 kilo a washed sugar

Panangisagana:

1. Buguan a nasayaat dagiti langkuas.

2. Yuper iti agpatnag.

3. Paangsetan ken igaden.

4. Pespesen ken sagaten.

5. Ilaok ti washed sugar.

6. Ipaburek ken kanayon a kiwaren iti uneg ti lima a minuto agingga a pumalet.

7. Ikabil iti garrapon ken markaan. (Pammadayaw ti Agricultural Training Institute dagiti ladawan.)—O