Dear Ikit
Dear Ikit,
Nariribuk ti kaamaan a dimmakkelak. Mammartek, managbabai, ken sugador ni tatang. Nupay kasta, nadungngo ni tatang kaniak.
No mabartek met ni tatang, kariarenna ni nanang. Ngem gapu ta awan metten babael ni tatang no mabartek, di kad’ kakaasi ken ni nanang.
Nakarit ni nanang ta adda trabahona. Dina pulos bibiangan ti sapul ni tatang. Maysa pay, awan kano met it-ited ni tatang kenkuana. Isu a ni nanang ti mangpabpabasa kaniak.
Masmasdaawak idi no apay a kinayat ni nanang ni tatang. Gayam, kas istoria ni nanang, inaradas kano idi ni tatang idi baro ken balasangda pay laeng ket kapilitan a nagkasarda ta di kayat idi dagiti dadakkel ni nanang a maibabainda.
Gapu iti daytoy, imbagak ken ni nanang nga isinana laengen ni tatang. Ngem kuna met ni nanang a dina kayat nga ibaga dagiti tattao a naggapuak iti narakrak a pagtaengan. Siakto kano ti nakababain kadagiti pakaikamangak. Ipasnekko kano ketdi ti agbasa ket bay-akon a panunoten ida.
Ngem naumaakon iti kastoy a kasasaad, ikit. Ania ti aramidek?—Julieta Julieta,
Agyamanka ken ni Apo Dios ta adda pay la dagiti nagannak kenka a mangipatpateg kenka. Ta kas kunam, nupay adu ti bisio ni tatangmo, mariknam met ti pammategna kenka. Amangan met no nabayag koman a nagsinada no di gapu kenka.
Ngarud, nasayaat no tumulongka a mangbirok iti solusion ti problema ti pagtaenganyo. Kasaritam ida a nasayaat. Saan a kayat ni nanangmo ti makisina gapu kenka. Balsem ngarud iti nasayaat a sarita. Kas koma, “Ania kadi ti nasaysayaat a denggen, nanang— ti naggapu ti broken home, wenno iti nariribuk a kaamaan? Baka kabutengdak dagiti nagannak dagiti agarem kaniak ta amangan no umalaakto kenka a mangpakmer met iti agbalin a lakayko.”
Lailuem met ni tatangmo. Isu ti pagdawatam iti allowance-mo ken dadduma a masapsapulmo tapno imbes a dagiti bisiona ti paggastuanna, sika ti pakaipaayan ti masapulanna. Iti panagkitak, agpampannurayka laeng ken ni nanangmo; dimo iramraman ni tatangmo a pagdawatan.
Ngem pudno ti kuna ni nanangmo. Ti kasayaatan nga aramidem, ipasnekmo ti agadal. No maysakanton a propesional, mabaindanton a kanayon nga agapa ket naragsakton ni nanangmo ta nasubalitan dagiti sakripisiona a nakiasawa ken ni tatangmo—gapu kenka. —Ikitmo