No Adda Sigsigloten, Adda Met Warwaren

WEN, dakkel a biddut ti igagatangko iti maysa a nangisit a

leather bag iti P18,000 idi napanak nagatendar iti maysa a komperensia idiay Kuala Lumpur, Malaysia, idi Agosto 2007. Apay a biddut?

Umuna, idi ginatangko daytoy a bag, ti sueldok iti nasurok a makabulan ti napanko inggatang.

Ita a panawen, diakon maitured ti gumatang iti maysa a bag nga agpateg iti sueldok iti nasurok a makabulan. Iti panagbaketko, nakasursuroak met bassit iti husto a panaggamulo iti kuarta.

Maikadua, ania laengen, aya, a ragsak ken dayaw ti maited ti maysa a nangina a bag? Ania koma ti mainayonanna iti kinapateg ti biagko ken iti makunkuna a pannakapnekko iti biag?

No ti misionko iti biag ket ti panangtulongko kadagiti padak a tattao a mangpasayaat iti bukodda a biag, awan serbi daytoy a P18,000 a bag. Uray basket-abut-abot ti usarek a mapan ag-malling, mayat latta, di ngamin, kaka?

Ngem ania ngarud ket nalpasen. Youth’s folly lattan, a. Nasayaat met ta nakasursuroakon.

Maikatlo, no koma inggatangko dayta PhP18,000 iti stocks ti maysa a kompania, di kad’ adda koma ig-iggemak nga stock investment ita.

Wen, no koma iny-invest-ko daytoy PhP18,000 iti stocks ti Jollibee Food Corporation (JFC:PM), di koma nagbalin a nasurok a PhP 51,000 itan!

Kasano?

Idi Agosto 1, 2007, ti maysa a common stock ti JFC ket magatang iti

PhP48.02. No ikuentak iti transaction costs daytoy a panag-invest iti

JFC, adda koma nagatangko a 370 common shares.

Gapu ta tinawen nga agibunong ti JFC iti dibidendo kadagiti

stockholders-na, iti las-ud ti dandani 13 a tawen, adda agdagup iti PhP 21.24 a dibidendo ti maysa a common share. Iti pakabuklanna, ti neto kalpasan ti withholding taxes, adda koma nasurok a PhP7,000 a naganar daytoy 370 shares a dibidendo.

Idi Abril 8, 2020, uray dakkel ti bimmabaan ti presio dagiti stocks gapu iti epekto ti coronavirus, nagbalinen a PhP120 ti presio ti maysa a share ti Jollibee. Di kadi ‘tay nagatang iti PhP 18,000 a 370 shares, agbalor koma itan iti PhP 44,400.

No kasta a gumatangtayo kadagiti banag, panunotentayo koma no agpayso a kasapulan unay daytoy tapno agbiagtayo. Iti kasta, saantayto nga agbabawi.

No adda kayatyo a damagen wenno adda komentoyo, ag-PM-kayo ken ni Anna Liza iti www.facebook.com/annalizamgaspar wenno agteks iti 0955-5869454.—Editor