Saludsodem ken ni Apo Hues
SALUDSOD:
Iti tawenko a 35, maysaakon a nabaketan a balasang, ‘tay kunada nga agkamkamat iti last trip.
Basta la ketdi lalaki, mayaten. Saan a kas idin nga adu unay a kualipikasion ti lalaki a sapsapulek.
Dimteng dayta a gundaway idi naam-ammok ti kabsat ti pastor ti kapiliami. Tagasabali a probinsia ti pastormi ket immay simmarungkat daytoy a kabsatna a lalaki. Nagkinnaawatankami ket nagkasarkami. Nagyankami iti balay a pundarko, kas negosiante.
Iti umuna a rabiimi, awan ti napaspasamak kadakami ta salloy met ti sapsapinanna. Kinapudnona, iti uneg ti tallon a bulan a panagdendennami, awan ti naar-aramid. Ngem sabali ti atapko, Apo Hues, malaksid pay kadagiti sabsabali a madmadlawko kenkuana, nasalamaak pay iti naminsan a kineddelna ti bakrang ti drayber ti delivery truck nga agideldeliber iti grocery-mi.
Panggepko nga isina ni lakayko, Apo Hues, ta kasano met daytoyen? Ania la ti serserbin ti pannakiasawak? Ammok a maawatam ti kayatko a sawen, Apo Hues.—Esperanza ti Ilocos Norte
SUNGBAT:
Malagipko nga adda idin kastoy a kaso a sinungbatak. Saan nga ammo ti babai a binabai ti lalaki a nakikasaranna. Ken kasla mabagbagi ti ubing ti sapsapinan ti nakikasaranna. Ket ti kunak idi, mabalin a mawaswas ti pannakikallaysana.
Apay? Maibatay iti Artikulo 36 ti Kodigo Penal, no ti maysa nga asawa ket dina maaramid ti pagrebbengan wenno aramid ti maysa nga agassawa (psychological
incapacity), mabalin a mawaswas ti bileg ti kallaysa. Iti Artikulo 46 ti nasao a Kodigo, kunana met mabalin a mawaswas ti kasar no ti maysa kadakuada ket tomboy wenno bakla a di ammo ‘diay asawa.
Wen, awan serserbi ti kasar no awan met ragsak ken anak. Sige, mapankan iti abogado ta pagsaritaanyo daytoy.—O
Quarterly ti panagaramidmi iti financial report. Iti lima a tawen, awan met ti reklamo dagiti nagipuonan. No ti idudur-as ti paggasolinaan ti pagsasaritaan, awan met ngata ti pagkunaandan ta napaminwalomin ti puonan. Namitlo met ketdin a naingato ti sueldomi, ngem no idilig iti aw-awaten ita dagiti empleado ti kompania a nagtrabahuanmi idi, awan payen iti kikit ti sueldoda iti aw-awatenmi. Dayta ti maysa a rason nga ik-ikkak iti kaibatogan ti bannogko nga agisang-at iti bagas.
Idi karugrugimi a tarawidwidan ti negosio, kakaasikami a mangiremremedio iti pangpondomi iti tseke nga ibayad ni Fatima tapno saan a ‘tumalbog’. No kasta ngamin a maalimadmadmi a ngumina ti gasolina ken krudo, pilitenmi nga adu ti stock-mi sakbay a pormal a mayanunsio ti inginginana. Iti namimpito a panag-jack
up ti presio ti lana iti las-ud ti lima a tawen, kellaat a rimmukbos ti negosio. Nagsaruno iti daytoy naudi a dua a tawen a nakaawatkami iti pammadayaw: Most Improved Sales Volume.
Ngem iti idudur-as ti paggasolinaan, ditoy met lattan ti pagmulagatan ni Manong Willy, ti inauna da baket, no mabitin iti pagtinnagna iti Fiera-na. Addan innem wenno pito pay ket ngatan a promissory note-na. Saan met a nagpaudi ni Felicia a buridekda ta dakkel ti anak ti ipapautangna; Bombay style a negosiona. Limapulo ribu met ti nautang ni Ardo ta nagkurang ti placement fee ni baketna iti ahensia a mangtultulong iti panagabrodna. Naikuentana met la ngata?
Ngem kadakkelan ti nautang ni Romeo ta dandani naembargo dagiti makinariana iti negosiona a gravel and
sand. Dandani immabot iti maysa a milion.
No koma maisubli a dagus dagiti nabulodda, dikam koma unay marigatan nga agiremedio iti pagrikusenmi. Ngem iti panagriknak, kasla ragsakenda a makitadakami nga agkalkallautang nga agsapul iti pagbayadmi iti sumangpet nga stock. Asitganmi ngamin ida no kua ta ipalagipmi ti utangda, ngem sakuntip ken wingiwing a magiddanan iti “pasiensia pay laeng” ti isungbatda.
Ita, apay a nagimbentario ni abiratko? Asino dagiti adda iti likudanna? Adda ngata pammalubos da Mama Loida ken Romeo iti inaramidna?
SINAPAK a rinepaso dagiti papeles nga iggemko.
Photocopy amin dagitoy ta ibatbatik dagiti orihinal iti uyosan ti lamisaan ti kahera ti paggasolinaan. Nalaka laeng a nakitak ti loop hole ti audit-inventory ni Ardo a narigat koma a maitudo no awan dagiti photocopy nga iggemko.
Apaglawag ngem immallatiwakon iti balay ti katugangak a pakipagnaedan ni Ardo ken ti pamilia daytoy tapno kasaritak maipanggep iti naduktalak. Nasapa ti baket a bumangbangon ta isu pay laeng ti manges-estimar iti nalawa a gardenna iti likud ti balayna. Apagisu met nga ilukat ni Mama Loida ti ridaw a tugpaen ti tallo katukad nga agdan. Nagdaydayawenak.
Diak nangngeg ti sungbatna, no sinungbatannak man, ta timmaliaw iti uneg ken adda pinayapayanna. Ni Romeo ti inyula ti ridaw. Ita man pay a nasapa a nagpasiar?
“Agsasaritatayo man, bayaw,” pinangablaawko. “Uray ta addaka met laengen ditoy.”
Sakbay a nakasungbat ni Romeo, adda nangngegko a namedmedan nga uyek iti uneg. Siniripko. Agsangsango da Ardo ken Manong Willy iti lamisaan a panganan.