Adda Latta Naasi a Tattao

AGAR-ARBIS iti dayta a malem. Nakitak ti maysa nga agtutubo nga agtatakder iti pataguab ti kombento ti parokia a pagserserbiak iti ili a Nueva Era, Ilocos Norte. Impagarupko no ganggannaet a dimmagas laeng a naglinong. Wenno adda umayna ibaga?

Inasitgak. Dinamagko no ania ti rantana. Immisem. Agpayso nga immay laeng nakilinong ta nadaponan ti tudo bayat ti panagturongna iti balayda. Taga-Nueva Era kano. Agnanaed ti pamiliana iti Sitio Sinamar, Poblacion.

Nariknak ti panagbain. Ipakita daytoy a siak gayam ti ganggannaet iti daytoy nga ili. A diak pay unay am-ammo dagiti tattao iti sakup ti parokia a pagserserbiak—ti parokia ni San Gabriel Arkanghel. Kinapudnona, daytoy ti nagdadamuak a nagserbian a kas kura paroko ken saanak pay unay a nabayag ditoy.

Iti panagsarsaritami, naammuak kenkuana a sakristan idi iti parokia ken maysa a Tinguian. Ngem naisardeng ti panagserbina ta simrek iti kolehio. Duada nga agkabsat. Agpadada a lalaki. Isu ti inauna. Adda iti hayskul ti adina.

Manipud idin, naynayen nga um-umay iti kombento ti agtutubo. Naammuak a nalpasna ti umuna a semestre ti Bachelor of Science in Nursing iti University of Northern Philippines iti Siudad ti Vigan. Nagsardeng nga agbasa ta awan kano ti umanay a gastuenna. Karpintero ti amana. Gagangay met nga empleado iti munisipio ti ilida ni nanangna. Pasaray agkurang ti matgedan da tatang ken nanangna a para iti panagbasada nga agkabsat. Isu nga inkeddengna nga agsardeng pay laeng ket ituloynanto ti agkolehio inton makaturpos ti adingna iti hayskul.

Iti masansan a panagsarsaritami, nasaludsodko no kayatna ti agpadi. Nasdaaw iti nangngegna. Dina la ketdi ninamnama a damagek kenkuana daytoy. Dagus met a nagpanunotak. Ket nasaludsodko la ket ngarud iti bagik no adda met la ngata bokasionna nga agpadi.

Ngem asino ti makaibaga? Ni laeng Apo Dios ti makaammo. Gapu ta diak mauray a sumungbat, binaliwak ti saludsodko: “Kayatmo ti sumrek iti seminario?”

Ad-adda la ket ngarud a diak napasungbat. Wen, aya, saan nga amin a tattao, adu ti ammoda iti makunkuna a seminario, ti eskuela a pagbasbasaan dagiti kayatna ti agpadi. Kinaagpaysona, karkarna met kaniak idi ti balikas a “seminario.” Malaksid iti daytoy, ammo la ketdi daytoy nga agtutubo a dakkel met ti magastona no sumrek nga agbasa iti seminario. No di pay makapagbasa iti unibersidad ti gobierno, di lallalon a di makastrek iti seminario? Inlawlawagko ngarud a no umanamong, agsapulakto iti tumulong kenkuana a kas iti kaadda met idi ti nangtulong kaniak a sumrek iti seminario. Ta uray siak idi, saan a kabaelan dagiti dadakkelko ti mangpabasa kaniak iti seminario. Ala, ket adda pay idin nasayaat a trabahok iti maysa a pribado a kompania.

Iti panaglabas ti aldaw, inkarkararagko a tignayen koma ti Dios ti agtutubo tapno masarakanna ti bokasionna. No bilang ta maallukoyko a sumrek iti seminario ket agbalin a padi, isunto ti umuna a padi nga Itneg iti Ili a Nueva Era, Ilocos Norte.

Iti di nagbayag, kalpasan a makasarsarita ti agtutubo dagiti mamadre nga agserserbi iti parokia, immasideg kaniak ket impasingkedna a kayatna ti sumrek iti seminario. Naragsakanak. Dagus ngarud nga inyumanko daytoy a banag iti kabsat ti nagpaay met idi a benefactorko idi siak ti simrek iti seminario. Naammuak ngamin idin a kayatda met nga agassawa ti tumulong kadagiti sumrek nga agpadi. Doktor iti medisina ti lalaki; nurse ti babai. Agnaedda sadiay New Jersey, USA.

Simrek ngarud ti agtutubo iti St. Thomas Aquinas Major Seminary, Aparri, Cagayan iti sumaruno a panaglulukat ti klase. Napardas a naglabas ti aldaw. Kalpasan ti uppat a tawenna iti kurso a Pilosopia, simrek iti Immaculate Conception School of Theology, Siudad ti Vigan a nangileppasanna iti Teolohia iti lima a tawen.

Idi Hulio 31, 2018, naordenan daydi nga agtutubo—ni Reb. Metchell Verzosa Valdepeña—iti Parokia ni San Gabriel, Arkanghel iti ili ti Nueva Era—nga iti pataguab ti kombentona, nakilinong iti maysa nga agar-arbis a malem. Ket isu nga agpayso ti umuna a naordenan a padi nga Itneg iti Nueva Era ken umuna a kameng ti IP (Indigenous Peoples) iti Ilocos Norte a makapagpadi. Agtawen laeng idi ni Reb. Metchell iti 29.

Agingga kadagitoy, saan a mayebkas ni Reb. Metchell ti panagyamanna kadagiti timmulong kenkuana—da Dr. Neon ken Mrs. Natty T. Corpuz—a nagbalin pay ketdin a nagannakna nangruna ta pimmusay ti amana sakbay ti pannakaordenna a padi.

Iti panagbakasion da Dr. Neon ken Natty Corpuz iti Siudad ti Batac a puonda, saan a di napan sinarungkaran ida ni Father Metchell V. Valdepeña. Ibibisita ti maysa nga anak ken maysa nga adipen ti Dios a namuli gapu iti parabur ti Dios a naggapu kadagitoy nga agassawa.—O

Iti pannakaorden ni Reb. Metchell V. Valdepeña, kaduana ti benefactor-na—ni Dr. Neon Corpuz (kaabayna iti kanawan). Agpakanawan: Mrs. Marcelina Macugay (lola ni Reb. Metchell), Mrs. Rose Belle Corpuz (ipag ni Dr. Neon Corpuz), Reb. Metchelle Valdepeña, Dr. Neon T. Corpuz, ken agkaingungot nga Atty. Consuelo F. Corpuz ken Atty. Nestor T. Corpuz (kabsat ni Dr. Neon Corpuz). Likud (agpakanawan): Dr. Nonilone Corpuz (anak ni Mrs. Rose Belle Corpuz), ken Mr. Arsenio Macugay (lolo ni Reb. Metchell). Awan iti ladawan ni Mrs. Natty Corpuz (kaingungot ni Dr. Neon Corpuz a saan a nakaawid manipud iti New Jersey).