Ti Tarakenmo ken Sika
PAMPANEKNEKAN ti World Health Organization a bassit ti gundaway a maimpektaran dagiti taraken nga aso iti COVID-19. No adda man aso a maimpektaran, bassit-usit laeng ti gundaway a mapasamak daytoy malaksid kadagiti masansan a saksakloten wenno ap-aprosan ti amoda.
Ngem uray no saan a makunkuna a dagus a maakaran dagiti aso iti daytoy a sakit, nasken pay laeng a trataren dagitoy a kas iti panangtaripato iti bukod a bagi ken dagiti kabbalay.
No kastoy, maliklikan ti panagsakit ken panagiinnakar dagiti taraken nga ayup ken dagiti kabbalay. Nasken ngarud nga adda met social distancing dagiti ayup ken dagiti dadduma pay nga ayup ken uray kadagiti tattao. Saan pay a yas-asideg dagiti taraken nga aso kadagiti masakit a kabbalay.
No adda taraken nga aso a naruam a maipaspasiar, liklikan dagiti lugar nga adu ti tattaona wenno kadagiti disso nga adu dagiti maipaspasiar met nga aso.
Saan a yas-asideg ti taraken nga aso kadagiti dadduma nga ayup. Saan pay nga ipalubos nga ap-aprosan ti sabali a tao ti maipasiar a taraken nga aso.
Adu ti maitulong dagiti ayup a taraken iti pagtaengan tapno maliklikan ti panagpulkok wenno pannakaburibor iti daytoy a panawen ti pandemia. Makaliwliwa a kadkadua dagitoy iti laksid ti pannakayadayo kadagiti kameng ti pamilia, gagayyem, ken dadduma a tao.
Kabayatan ti panangipaay kadagiti kasapulan ken pannakiay-ayam iti taraken nga ayup, mayaw-awan ti panangpampanunot kadagiti dadduma a parikut.
Saan laeng nga iti panangkadkadua iti amoda ti ipaay ti taraken nga aso iti pagtaengan, tumulong pay dagiti ayup tapno mamantener ti positibo a templada wenno emosion iti laksid dagiti agsasanggala a parikut.
Adda pay ketdi dagiti aso a makadlaw no naliday wenno maburburiboran ti amoda. No kastoy, agpasaklot, sumurotsurot wenno salsalikbayanda ti amoda.
Kadagiti mapatpatigmaanan nga agtalinaed kadagiti bukodda a pagtaengan, maikkat ti pannakaburibor iti pannakiay-ayam kadagiti taraken nga ayup.
Dagiti pay aso ti mangawis iti amoda a rummuar iti balay tapno agwatwat aglalo no kankanayon a maipasiarda. Mairaman no kastoy a sumay-up ti amoda iti presko nga angin ken makapagwatwat pay.—O