Ammuem Pay Dagitoy

Ipakaammo ti National Commission for Culture and the Arts (NCCA) nga idauluan ti chairman daytoy a ni Arsenio “Nick” J. Lizaso, agraman da executive director Al Ryan S. Alejandre, deputy executive director Marichu G. Tellano, ken Supervising Officer for Administration Bernan Joseph R. Corpuz, nga agawaten iti nominasion para iti Gawad sa Manlilikha ng Bayan (GAMABA).

Ti NCCA, ti kangatuan nga ahensia ti gobierno a nakayabagaan ti pannakasaluad ken pannakaparang-ay ti kultura ken arte ti pagilian, ti mangimaton iti nasao a pammadayaw. Akem ti NCCA, babaen ti GAMABA Executive Council, ti mangiwayat iti panangbirok kadagiti kalalaingan a tradisional nga artisano iti pagilian, mangisayangkat kadagiti programa a mangipanamnama iti pannakayallatiw ti laing dagitoy kadagiti sabsabali, ken mangiwayat kadagiti addang tapno bigbigen ken makarikna met dagiti umili iti dayaw ken pannakkel iti laing nga ikut dagitoy a Manlilikha ng Bayan.

Iti agdama, addaan ti pagilian it 16 a National Living Treasures awardees a mangitultuloy iti pannakasaluad dagiti nariingan a kultura ken arte.

Mabalin nga indibidual wenno grupo dagiti mainominar, ken iti babaen ti maysa laeng a kategoria a pakabigbigan ti indibidual wenno grupo. Sagudayen ti Seksion 4 ti Implementing Rules and Regulations ti Manlilikha ng Bayan Act, kayat a sawen ti ‘Grupo’ ti ummong dagiti artisano a Filipino a sangsangkamaysa a mangipatpatungpal iti maysa a tradisional a porma ti arte iti maysa a komunidad kultural.

Nasken a mayayon iti UNESCO – Five Domains of Intangible Cultural Heritage dagiti tradisional a porma ti arte a mabalin a pakainominaran ti indibidual wenno grupo, kas sumaganad: Oral Traditions and Expressions; Performing Arts; Social Practices, Rituals, and Festive Events; Knowledge and Practices concerning Nature and the Universe; ken Traditional Craftmanship.

Nasken a maidatag dagiti nominasion iti di naladladaw ngem Pebrero 12, 2021.