Ti Gasatmo
VIRGO (Agosto 21- Septiembre 22). Addaka iti kasasaad a masapul a pumilika iti tay-ak ti ayat ken trabaho; iti panangpili kadagitoy, mabalin nga agpannuray iti tunggal maysa. Mabalin a ti makaduam iti maysa a pagganaran ket ti tao a kasunganim ti pagduyosanna. Marikutanka iti panagbadiet gapu ta iti panagriknam, aggasgastoska a kasla awan ti pandemia. Nagasat a numero: 1, 5, 8.
LIBRA (Septiembre 23- Oktubre 22). Ti kinamanagparaburmo ti mangkadkad iti pagbagasam nupay iti pannakasubalit ti kinasayaatmo, mapusek met dagiti pagkamkamtudam. Sirmataen ti masakbayan tapno saanka a maklaat kadagiti sumangbay kenka ket mapilitanka a mangyetnag kadagiti nakusel a desision. Adda pauyo ken ti pagayammo gapu ta napalaluanyo dagiti madi nga angaw. Ammuen a kanayon dagiti pagpatinggaan ti kabaelan a deppaan ti adda a badiet tapno saan a maisarsarak nga umutang. Nagasat a numero: 2, 4, 9.
SCORPIO (Oktubre 23- Nobiembre 22). Nasayaat a bulan daytoy para kadagiti paglang-ayan. Maammuan dagiti teknik no kasano a mapasayaat ti pisikal a langlangaen a saan met a masapul a gumastoska wenno ti serbisio ti sabali. Ipangrunam ti salun-at no kasta nga agbadiet ti para iti makan tapno iti kasta, makainutka la ngaruden, sigurado pay a nasalun-at ti pamilia. Saan met ket a nangina ti organiko a taraon lalo no pagkurien ti kinaIlokano. Nagasat a numero: 3, 5, 7.
SAGITTARIUS (Nobiembre 23- Disiembre 20). Naamo ti gasat iti daytoy a bulan. Masapul laeng ti nasidap a rikna tapno saanmo a pagkamalian ti kinasinged ti sabali kenka. Aramiden no ania ti marikna nga umno ken umisu kenka ket maliklikan ti panangidilig ti bagi iti sabali; iti kasta, maliklikam ti sippit da imon ken apal. Panunotem ti agdama a kasasaad sakbay nga aggastos iti saan pay met a kasapulan. Nagasat a numero: 1, 6, 8.
CAPRICORN (Disiembre 21- Enero 19). Dagiti kakaarruba ti makaipaay ita kenka kadagiti sungbat dagiti adu a pakakulkolan ti panunot. Awan ti dakesna ti panangipeksa iti panagkamtud ta kaaduan met a kasta iti agdama. Arisitem man a nalaing ti bukodmo a bagi ta adda laeng nga aglemlemmeng iti kaunggam ti mangipaay kenka iti kinalabon. Aginana ta dayta ti ipaspasimudaag ti nakaparsuaan. Nagasat a numero: 2, 4, 7.
AQUARIUS (Enero 20- Pebrero 19). Mabalin nga adda dagiti nabannog iti pangngarig isu a masapulmo ti agusar iti nalawag wenno direkta a sao. Nalawag met a balabala ti kasapulam tapno agballigika iti pangpanggepem nga aramiden nangrunan no panguartaan. Tingitingen no ania dagiti nasken iti daytoy a biag tapno isu ti ipangruna. Nagasat a numero: 1, 5, 9.
PISCES (Pebrero 20- Marso 20). Adda tiempo ti amin, kunada ngarud, ket tiempo ti panangpalunit kadagiti sugat. Tiempo ti panagpaadu iti pagayam, wenno kasinnaranay. Sanayen a pagburayoken ti kaunggam iti kinaimbag ta nupay saan met nga isu ti kalkalikagumam, sapulennakanto met laeng ti kinaimbag tapno agsubad. No adda dagiti paripirip ti pagayam, masapul a lawlawagem tapno awan ti mapasamak a saan a panagkinnaawatan. Nagasat a numero: 3, 4, 7.
ARIES (Marso 21- Abril 20). Nasidap ita ti panunotmo ket naanuska kadagiti detalye. Laglagipen ketdi no ania dagiti nasken nga ipangruna nangruna ita ta ad-adda a maipangrunana ti kinatalged ken kinasalun-at. Adda dagiti bambanag a makauray. Panawen met ti panangtagibi kadagiti rikna a nadarisay ken natan-ok, nagruna no para iti patpatgen a patien a saan a nakasasayang no isu ti pakaipayaan ti pammateg ken panangilala. Nagasat a numero: 2, 5, 8.
TAURUS (Abril 21- Mayo 20). Naisangsangayan dagiti balligi no ammo no kasano a pilien dagiti dangadang. Saan nga amin a banag maikari a pangipaayan iti enerhia. Adda met dagiti tattao a nagastar iti atension, tiempo ken enerhia ket padasen a tingitingen no panawen met tapno palugodan dagiti kakastoy a makapagwaywayas. No ti kaunggam ket nakasagana nga umawat iti kinaimbag, namnamaen ti pannakapasamakna. Nagasat a numero: 1, 4, 9.
GEMINI (Mayo 21- Hunio 20). Nasayaat la unay ti panangipeksa iti marikrikna nangruna no positibo a rikna para kadagiti patpatgen nangruna ita ta agkaiwaa dagiti negatibo nga enerhia. Pudno nga ipangruna ti salunat ta isu ti kasapulan ita, ngem laglagipen latta met a pasalun-aten ti pampanunot ken rikna. Maipaay dagitoy dagiti mangipatpateg kadatayo iti napudno. Nagasat a numero: 3, 5, 8.
CANCER (Hunio 21- Hulio 20). Adu ti mainut babaen ti kinaorganisado ken panangkissay kadagiti aramid a saan met a napateg iti agdama a kasasaad. Napintas nga idea ti panangabrasa kadagiti baro ken managparnuay ta makaalaka kadagiti positibo nga idea no kasano nga aramidem. Adda laeng iti ig-igid ti namaris nga ayan-ayat ket ngarud, saanen a nasken a sapulen wenno agpakarigat a mangbalabala no kasano a sapulen ni ayat. Nagasat a numero: 2, 4, 9.
LEO (Hulio 21- Agosto 20). Naruay dagiti pakasikoran iti pagtaengan gapu iti agdama a kasasaad. Masapul nga ammom ti agpabus-oy ngem masapul a dimo isakripisio ti ammom nga umisu tapno di maisarsarak ti pamilia. Nasken ketdi a kabaelan ti umayon iti kasasaad ken kabaelan dagiti kabbalay para iti nataltalinaay a panagbiag. Nagasat a numero: 1, 6, 7.