No Adda Sigsigloten,

AOOSOOM

DU ti naisuro ken madama nga isursuro ti pandemic kadatayo nangnangruna iti umno a panagbiag. Iti biangko, ad-adda a nakitak ti kinapateg ti panagbiag a mayannatup kadagiti naintawan a galad. Ad-adda a nakitak ti kinapateg ti nasayaat a langenlangen dagiti agkakapamilia. Idi katengngaan ti Enhanced Community Quarantine (ECQ) ditoy Ilocos Norte ken gapu ta agsasabali met ti yanmi nga agkakabsat, dinamagko ken ni Mama a no kas pagarigan adda matay kadakami, sisasaganakami kadi nga awan mapan makiminatay?

Yad-adayo ni Apo Dios nga adda kasta a mapasamak ngem kas coordinator ti “Balik Piddig” program, adu dagiti nakasaritak a kakabagian a mayat nga umay makiminatay wenno makimansayag, ngem nagrigat ti agpaawid ta estrikto dagiti health ken quarantine protocols ti Gobierno Probinsial ti Ilocos Norte.

Napagnunumuanmi ngarud a sangapamilia a sidadaankami a mangawat a saankami a makapagtitipon iti mansayag wenno massayag ti kapamiliami. Kunami, ania ngarud, selebrarantayo ti biag ti pimmanaw a kapamilia iti yantayo a disso ken ita a sibibiagtayo pay, agiinnayat ken agkikinnaawatantayo. Ita, uray adda saan a panagkinnaawatan, nadardaras met laengen a maurnos ti langenlangen. OOSOOM

Nagasatkami nga empleado ti gobierno ta idi ECQ, uray saan a sumsumrek dagiti dadduma, adda latta sumangbay a sueldo dita ATM-mi.

Nagasatkami pay ta dagiti dadduma a paggastuan idi sakbay ti COVID (SC) ket awanen a paggastuan iti panawen ti COVID (PC).

Kas koma kadagiti masansan a panagpasiar iti mall. Siempre, no mapanka, isaganam metten ‘tay kuarta a para kanen. Ken narigat met a mapanka iti mall idi SC sa agawidka nga awan bitbitna a pasarabo.

Kadagiti adda regular income-na ita a PC, nanayonan iti nasiglotan ta Out of Sight, Out of Mind wenno OOSOOM a kunada. Di kadi no saan a makitkita dagiti paggastuan, saan met a pampanunoten?