Angkel Dok (26)

Ti Napalabas: Kayat ni Manang Tina nga armen ni Angkel Dok ni Ma’am Elaine, ngem yar-arit met ni Jigo a kaanakanna iti nauubbing a kas kada Eula ken Angel. Nagbalaw idi dakkelen ti naksay iti urnongna. Impadamag ni Manang Tina ti kinapinget ni Ernie nga agarem ken ni Ma’am Elaine. Kayat ni Angkel Dok a maammuan no pudno daytoy ket napan idiay eskuela. Nagsarangda ken Ernie ket inyam-ammo ni Ma’am Elaine ken ni Ernie a kas nobiona. Nagbakasion ni Ma’am Elaine. Impagarup ni Angkel Dok a saanen nga agsubli. Naibaga met laeng ni Angkel Dok a pudno nga ay-ayatenna ni Ma’am Elaine. Inkeddeng ni Lakay Islao a dumanon da Angkel Dok.

“Nagasat nga aldawyo, pagraemanmi a bumalay!” inyayug ni Lakay Felino. “Ti grasia ti langit ket bumaba koma kadatayo a sangapada!”

L(Maika-26 a Paset) INIGSAY ni Elaine ti tapungorna a tualia iti abagana sa sinangona ti pagattao a sarming ti aparador. Limseben dagiti matana iti dina pannakaturturog manipud idi matinong ti aldaw nga idadanon da Angkel Dok kalpasan ti no mano nga aldaw a panangkonsultarda iti lunario iti panagpilida iti napintas nga aldaw, petsa, ken oras. Ket iti masungaden a Sabado dayta— manipud iti alas otso iti bigat. Nasken a di naladladaw. No saan, baliwandanto manen ti agpili iti panagsasango dagiti partido.

“No mabalin la koma, iwaksitayon ti kadaanan a wagas ti danondanon. Propesional ni Elaine, naananayen ti tawenda nga agpadpada. Ammodan dagiti responsibilidadda iti tunggal maysa ken iti buklenda a pamilia,” kinuna idi ni Manang Tina.

“Awan kas ‘ti sigurado, maestra,” insungbat met ni Lakay Islao. “Babai ti anakko. Kayatko a mangngegantay amin nga agasut iti bibig ken dila ti mangasawa iti anakko ti itedna a pagimbaganna. Datayo ti agbalin a saksi iti dayta a kari, a pangkamatmi kenkuana no dina tungpalen. Tapno diyo met kuna nga awan panagtalekmi, awanen ti pinnirma! No kunayo nga iwaksi koman ti nabursi a danondanon, saan a mabalin. Dakami a nababayan ti maabakan. Mabalin a saanen a suroten ti palpalikaw. kas idi un-unana. Ngem ti bugas ti danon, aysus! Saan a mabalin, maestra!”

Uray la a nagal-al ni Lakay Islao iti kaatiddog ti palabrana. Intagayan ni Lakay Idiong tapno mapaayusan ti karabukobna.

“Awan koma ngarud ti arak, a, tapno deretso ti panagpapatang. Baka adda binnara!”

“Agurayka… paspasagidannak, maestra. Tapno ammoyo, n-nasakit unay ti barukongko iti pannakaipusing ti buridekko. Ti laeng arak ti mangpatpatibker ‘ti nakemko!” Bigla a nagrukob ti lakay ket nagpanerper ti pangresna. Nanalpaak ti butegna iti sakaananna, nga inlampaso ti kanawan a dapanna.

“Alla, ni tatangen, aya!” Lumablabbaga ni Elaine iti bainna a nangyawat iti paniona iti amana sa nagpadispensar kada Manang Tina.

Idi agpakadada, adda pay impakamat ni Lakay Islao. “No pampanunotenyo ti agtaray tapno maliklikanyo ti kunkunayo nga inuugma nga aramid, agpanunotkayo iti mamindua-mamitlo. Adda gayyemko a mammalipal!” Nagkinnita da Lakay Lito ken Manang Tina.

A puon ti nagkatawaan ni Angkel Dok. ”Saanakon a makataray, dad, nakapsuten dagiti gurongko,” inrabakna.

Kunam pay, inaprosan a dagus ni Lakay Islao dagiti takiagna sa nagdalikepkep a kasla malammin. “Dinak man aw-awagan ‘ti kasta. Maalasak. Agkasadarta laeng, kunak manen,” kinunana.

“Ni tatang met! Bakbaketanakon,” kinuna met ni Elaine.

Naisardeng ni Elaine ti panagsagaysayna idi agkakatawa dagiti lallakay iti paraangan a nagkakatugaw iti pasagad— ti amana, ni Lakay Idiong, ken ni Lakay Dexterio.

“Ginasuten ti inyasawak, ‘apid. Diak la ketdi itulok a taga-Dumaya ti mangdadael iti rekordko!” Timek ni Lakay Dexterio. “Wen, datayo ti nababayan, kapid! Masapul a sumurotda kadagiti kondisiontayo,” kinuna met ni Lakay Islao. “Pagsangitek ida no kunak, pagsangitek ida. Ipariknak a saan nga asi-asi ti makaasawa iti kameng ti pulitayo, ‘apid!” kinuna latta ni Lakay Dexterio. “No nasken, pati bripna isaldana tapno mapataudna ti dawatentayo.”

“Kustoka, kapitlo,” kinuna met ni Lakay Idiong. “Ibalesnak, wen. Idi immayak dimmanon ditoy Simbaluca, kurang la nga iparintumengko ti panagpakaasik a dua a baboy laengen ti padaraenmi. Ngem sulsol dagidi kakaarruba a panglakayenda. Dida nagpatingga agingga iti diak nangikari iti bumaro a nuang. Uppat a panagtalon nga inkarkarok iti raep, kapitlo!”Nagraed ni Lakay Idiong a kasla maldaangan.

Immanges iti dakkel ni Elaine. Dida ngata mapanunot a dagiti met laeng agassawa ti marigatanto no mapilitan ti nalalakian nga agwen iti nakaro a dawaten ti nababayan, nakunana iti unegna.

Iti balayda, naisardeng ni Manang Tina ti panagibalaybayna kadagiti linabaanna iti lauden ti balayda idi adda sumardeng a banurbor ti motor iti batog ti ruanganda. Iti sango ti terasa, saan a naituloy ni Lakay Lito nga idisso ti “Hawaiian Wedding Song” iti turntable ket kimmita iti ruangan. Naladaw ita a mangbutingting iti kuligligna ta nasapa a napan nangbisita iti inkamakamna nga impuruak idi kalman. Kalpasan ngamin ti aguppat a bulan nga igaaw, uppat nga aldaw metten a nagbayakabak iti mumalem.

“Kukueem manen, aya, kayong? Grabe ti kinagagetmo!” kinuna ni Lakay Felino a dumdumsaag iti likudan ti barona a nagmaneho iti motorsiklo.

Iniddep ni Lakay Lito ti turntable a bulonna a timmakder. “Dumanonkayo, kayong,” kinunana ket indauluannan ti ilalaemda. Saan a nagbayag, limmaem metten ni Manang Tina.

“Kunak no dimo naawat ti suratko nga impaw-itko iti multicab, bayaw,” kinuna ni Lakay Lito idi agsasangodan iti salas.

Immisem ni Lakay Felino. Inaprosanna ti lilidduokanna. Naawatan met a dagus ni Lakay Lito ket kinitana ni Manang Tina.

“Ikkam man ni Michael iti igatangna ‘ti buridek,” kinuna ni Lakay Lito sa tinung-edanna ti baro ni Lakay Felino.

“Immay inted ni Itting ti surat, ngem diak nakaumay a dagus ta adda indanonko, kayong,” kinuna ni Lakay Felino. Inwarasna ti panagkitana. “Sinno ti idanontayo?”

“Ni bayaw Jani. At last, nakapagdesision met laeng a mangasawa!” Nagkatawa ni Lakay Lito. “Ni bayaw?” Kinitana ni Manang Tina.

Nagdardaras ni Manang Tina a napan iti sakaanan ti agdan. Timmangad. “Manong, ‘mayka man biit!” inyawagna.

Iti kuartona, naibbatan ni Angkel Dok dagiti