Ti Puga (17)

Ti Napalabas: Mapan ni John iti Amerika ta inawagan ken nagpatulong ni Agent Stewart a padana nga an-anupen ti CIA. Nagturong met ni Melanie iti mansion ni Archie Castillano ta panggepna ti sumrek iti sindikato a kas DPA. Pinadas ni Archie ti kabaelanna. Dinayaw ni Archie ngem inikkanna iti mision: ipaknina ni Roberto Guerrero a pangulo ti cartel iti California. Iti airport, sinitada ni John a nagusar iti sabali a nagan ngem pinalubosanda met laeng. Iti panagsaritada, innala met ni Agent Stewart iti luganna ni Agent Angelica ta ammona nga adda mangsirsirit kadakuada. Pinaltoganda ngem ni Angelica ti napuntaan. Kayat ni Angelica a dumsaag ni Agent Stewart ngem di kayat daytoy isu nga idi pinakamatanda ida iti RPG, inkugtarna a pinaruar iti lugan ni Agent Stewart.

I(Maika-17 a Paset) NSUROT ni John ti panagkitana iti likudan ti Yellow Taxi a naglugananna. Idi maipusing iti imatangna ti taksi, insalapayna iti abagana ti bitbitna a bassit a bag sa pinagpasiarna ti imatangna. Naulsan iti nakapurpuraw a niebe ti aglawlaw ti nagtakderanna a sango ti bassit a hotel iti pangadaywen iti downtown. Nagkusbon dagiti sanga dagiti naintaintar a pine tree ta naabungotanen iti niebe. Nagaburan metten dagiti sumagmamano a lugan a nakaparking ket ti sukogda laengen ti pakalasinan ti kaadda dita. Dandani puraw amin a makita.

Tinangad ni John dagiti poste. Nakitana dagiti naisalpak a CCTV. Uray ti sango ti hotel,

mulmulagatan ti kamera.

Nagdumog sa implastarna ti hood iti ulona. Simrek iti hotel. Nagderetso iti counter. Naisem a babai ti nangsango kenkuana. Imbagana a masapulna ti kuarto iti maysa laeng nga aldaw. Inyawat ti babai ti sign-in book. Naawatan ni John a masapul nga isuratna ti naganna iti libro. Saan a nagun-uni, nangiruar iti nabukel a sangagasut a doliar. Ngem saan nga inawat ti babai. “Identification, sir,” kinuna ti babai.

Kinita ni John ti babai sa limmingay iti lobby. Adda maysa a lalaki nga agbasbasa iti pagiwarnak.

“Maysa a rabiik laeng, Miss Renner,” kinuna ni John a nangtaldiap iti nametag ti babai.

“Paglintegan, sir. Masapulmi ti identification.” Saan a nagkir-in ti babai.

“How much for one day?” sinaludsodna.

“Just ninety dollars, sir... including continental breakfast.”

Kimmaut ni John iti kuarta sa indissona iti counter. “Listen,” inyarasaasna tapno saan a mangngeg ti lalaki nga adda iti lobby. “This is three hundred dollars... for you... I don’t have my identification with me. I got robbed on my way here... and I am tired...”

Ngem kasla saan a dumdumngeg ti babai. Kinita ketdi daytoy ti lalaki nga adda iti lobby.

“Just give me one of the most undesirable rooms you have. I just want a room to crash in. Please...” Inidus ni John ti kuarta iti dakulap ti babai.

Mulmulagatanen ti babai ngem saanna nga intangwa ti rupana. No basbassit ti ammo ti babai kenkuana, adadayo met a maisagmak.

Madamdama pay, timmallikud ti babai. Nagturong iti board a nakaibitinan dagiti adu a tulbek. Innala daytoy ti maysa. Nagsubli ket inyawatna. “Room 150.”

“Thanks.”

“Breakfast starts at 6:00 AM and ends at 10:00 AM. Check-out time is 11:00 AM.”

Saanen a simmungbat ni John. Nagturong iti kuarto a naited kenkuana. Idi mailukatna ti ridaw, inadalna a dagus ti posision daytoy. Bassit a kuarto. Maysa a kama nga addaan iti dua a night stand iti agsumbangir nga uluanan. Maysa a bassit a lamisaan ken tugaw. In-lock-na ti ridaw. Nagturong iti banio. Addaan iti shower ken latongan. Iti ngatuen ti shower head, adda bassit a tawa a desarming.

Nagturong iti kama. Imparabawna ti bagna sa napan simmirpat iti tawa. Nagkabakiranen iti likud ti hotel. Naabungotan met iti niebe dagiti kayo.

Nagsubli iti kama. Linuktanna ti bagna. Nangiruar iti selpon. Throw away a selpon tapno saanda a ma-trace ti yanna.

Indayalna ti numero ni Rudy. Kasapulanna ti paltog. Agingga iti mabalin, liklikanna ti mapan gumatang iti paltog iti gunstore. Siguradona a naka-monitor dagiti gunstore. Nalaka laeng a ma-trace ti CIA.

DINA ammo no kasano ti kabayagna a naawanan iti puot. Iti panangungapna kadagiti matana, nariknana ti lamiis ken panagtinnag ti niebe kadagiti matana. Nakadata ket naipasabat iti imatangna ti nakapurpuraw a law-ang ken ti napuskol a maitaytayab a niebe. Sinaplidan ti angin ti rupana ket nariknana ti ikukutukot ti lamiis iti kaunggan dagiti tultulangna. Agtigtigerger a nagtugaw. Impalawlawna ti panagkitana. Linakub ti adu a kaykayo a nabungon iti niebe.

Kellaat, kasla adda nangbag-utna iti bagina a timmakder. Malagipnan ti napasamak. Kinugtaran ni Angelica. Naipuruak iti ruar ti kotse a nakaparpardas ti tarayna, nagal-allin sa natinnag iti derraas iti asideg ti kalsada. Nakangngeg laengen iti makatitileng a kanabraang.

Ania ti napasamak ken ni Angelica? Nagkidem. Dina kayat a panunoten. Kinemkemna dagiti sangina. Sa naiyarasaasna: “Pangngaasim, Lord... saanmo nga ipalubos nga adda dakes a napasamak ken ni Angelica.”

Nagna. Ngem nailumlom dagiti sakana kadagiti kasla kapas nga niebe. Dandani pagatsellangna. Marigatan nga aggunay. Ken tunggal addangna, ad-adda met nga umuneg ti pakailumlomanna. Maikaranukon sa ketdi iti derraas...

Nakigtot idi agkiriring ti selponna. Tinapikna dagiti bolsana. Saanna a masigurado no sadino ti yan ti agununi a selponna. Nagpatingga ti imana iti bolsa iti likud ti pantalonna a nakariknaanna iti kuyegyeg ti selpon. Dinardarasna nga inruar.

“Hello?”

“Craig... I could hardly hear you... I heard a howling wind... Where are you?”

Malasinna ti timek. Ni John! Kasla limmag-an ti barukongna.

“John? Are you here?”

“In the area, yes. Yanmo?”

“Somewhere in the Appalachian Mountains...”

Nakaparpardas ni John a nangasut iti paltog iti siketna, ngem sakbay a nakapagpusipos, addan naidennes a landok iti bukotna.

“What the hell are you doing in there? We have a blizzard. Lucky you can still navigate there...”

“Hardly... but I was being chased by the Death Squad...”

“Are you okay?”

“I am... but I’m not sure about Angelica Connor...” “What happened?”

“She was trying to help... but she is a member of the Death Squad...”

“How the heck...”

“It’s a long story, John... She was trying to convince me to tell my side of the story... and she became a collateral casualty... She saved my life...” Nagsay-a iti nauneg.

“So where are you now? Do you need transportation?” “I sure do... ngem kayatko nga ammuen nga umuna no ania ti napasamak ken ni Angelica.”

“Adda kadi pay laeng dita ti Death Squad?” “Diak sigurado. Padasek nga ammuen...”

“Saan! Dika agaramid iti pakaisagmakam, Craig. Ditam’ laeng. Narigaten no maammuanda ti yanmo.”

“Ngem masapul a maammuak ti napasamak ken ni Angelica.”

“Ibilangmon a natay, maawatam?”

“Ngem...”

“Kayatmo kadi ti agbiag tapno makapagtestigoka iti Senate Intelligence Committee... tapno maibutaktakmo ti kinarugit dagiti higher ups ti ahensia?”

“Wen... dayta laengen ti rason a sibibiagak pay laeng agingga ita.”

“Isu a dumngegka kaniak... Ibagam ti yanmo.”

“It’s better if I just turn on my location device and you can turn on your location device too... It’s just easier if you use that to find me...”

“But stay put... don’t do anything stupid, is that clear? Remember, I need you alive.”

“Yes... I do...” Immanges iti nauneg ni Agent Stewart. “John...”

“Yes...”

“Sorry iti saanta a panagkinnaawatan idi damo...” “It’s okay... dimon panunoten dayta. Adda bukodmo nga agenda, kastaak met. Ngem ita, agtinnulongta tapno agbiagta.”

“Masapul a pengdanta ida, John...”

“Sika laeng ti makaaramid iti dayta, Craig...” “Ngem no matayak...”

“Saanka a matay,” insengngat a dagus ni John. “Awan ti matay kadata, laglagipem dayta.”

“Bareng... Ngem inkaso laeng, adda flash drive nga impanko iti maysa a postal box. Iggemko ti tulbekna.” “Ania ti nagyanna?”

“Voice recording ti amin a saritaanmi iti CIA liaison officer iti US Embassy iti Manila ken sumagmamano nga audio ken video conferencing–mi kada General Miguel, ken kangrunaanna, dagiti saritaanmi iti mismo a Director ti ahensia...”

“Nakabutbuteng man met...”

“Makaanay a mangtippuog iti adu a department heads.”

“Ammoda kadi daytoy?”

“Diak ammo. Kayatko a panunoten a dida ammo... ngem adda mata ken lapayag ti ahensia iti amin a lugar. Isu a diak sigurado.”

“Ammok dayta...”

“Ikarim kaniak, no kas pagarigan ta matayak sakbay a maidatagko dayta a flash drive iti Senado, sika ti mangipan. Sika laeng ti namnamaek ken ammok nga adda durina a mangsaranget iti ahensia.”

“Ikarik. Ngem dika madanagan ta ikarik pay nga awan ti dakes a mapasamak kenka.” Naisawang ni John dayta nupay ammona a dina maipanamnama a maaramidna.

“Agtalekak kenka, John .... uray no iti naminsan, nagbalinta nga agkabusor...”

LININGAY ni John ti natogtog a ridaw. “Adda tao,” inyarasaasna ken ni Agent Stewart a kasarsaritana iti selpon. “Urayennak lattan. Sumagmamano laeng a minuto, addaak ditan.” Imbolsana ti selponna sa nakaan-annad a nagturong iti ridaw. Simmirip iti peep hole. Ni Rudy a nakabaklay iti duffel bag.

No kasano ti kapardasna a nangilukat iti ridaw, isu met laeng ti kapardasna a nangirikep.

“Siguradoka nga awan ti nangsurot kenka?” sinaludsodna.

“John, nagkaduata idiay Basilan... Uray no maysaak laeng nga Intel analyst, nawidwidoak nga amang ngem dagiti dadduma a field agent.”

Nagkatawa ni John. “Ania ti innalam?” magagaran ni John a nagdamag.

Indisso ni Rudy ti duffel bag iti kama sa inukarkarna ti tali daytoy. Inruarna ti maysa a 9MM ken Glock .40. “Adu met laeng ti innalam a bala?”

“Adu. Ken inyalaak iti suppressor dagiti paltog.” Inyawat ni Rudy ti dua a silencer ken ni John.

“Thanks.”

“Daytoy pay... ammok a kasapulam daytoy...” Inruar ni Rudy ti maysa nga atiddog a riple.

Nasdaaw ni John a nangawat iti riple. Miningminganna a naimbag daytoy. “McMillan Tac 50-A1-R2,” nayesngawna. “Kasano a naaddaanka iti kastoy? This is $12,000.00 dollars, sniper rifle...”

Immisem ni Rudy. “Wen. Ngem bassit laeng ti gastosko iti dayta. Naalak idi idiay Afghanistan. Dadael ken imbellengdan. Innalak ti dadduma a partesna sa ginatangko iti blackmarket ti dadduma.”

“Illegally obtained...” inkatawa ni John.

“And who is not doing it?” inkatawa met ni Rudy. “I’m sure you gonna need it... don’t you?”

“Of course I do. But I have to go,” kinuna ni John. “Adda mangur-uray kaniak...”

Imbato ni Rudy ti tulbek ti lugan. Sinippawna ni John. “Black SUV. Nakaparking iti asideg ti entrance. Rental car. And don’t worry, it’s not traceable. I used another name.”

“Thanks.” Insubli met laeng ni John dagiti paltog iti duffel bag sa imbaklayna. Timmallikud ta mapan koman ngem nagsubli a nangarakup ken ni Rudy.

Nagaripapa ni Rudy a nangsubad iti arakup ni John. “What’s wrong?”

“I missed you man. I had a good time with you in Basilan City.”

Nagpaggaak ni Rudy. “Kaska la...” “Langgong,” inkatawa met ni John nga insippaw. “Saanak a bakla!”

Ad-addan ti paggaak ni Rudy. “Ammok! Ngem kas met la agpakpakadakan... Aganannadka.”

Rimmuk-at ni John. “Isuda ti agannad kaniak!” Nagturongen iti ridaw.

“Awagannak no adda masapulmo,” impakamakam ni Rudy sakbay a nairikep ti ridaw.

Iti hallway, nadlaw a dagus ni John ti dakkel a lalaki a mangidurduron iti janitor’s cart ngem saanna nga inkankano. Dina ammo a nakaan-annad ti panangsipsiput daytoy kenkuana.

NAKAPARPARDAS ti panagpataray ni Melanie nangruna idi addadan iti freeway. Agsusuron a mangpaspasikig a mangkitkita iti intedda a Mehikano partnerna. Isu kano ti mangkadkaddua kenkuana iti panangipatungpalna iti pannakapapatay ni Roberto Guerrero, ti head ti El Capitan drug cartel iti sibubukel a California. Inkalinteganna a saanna a kasapulan daytoy a Mehikano ngem uray agan-ano, saanda a dimngeg kenkuana. Isu laeng ti mabalin a kaduana iti mision nga inted ni Archie Castellano kenkuana.

Siuulimek nga agrasrasaw kabayatan ti panagpatarayna.

“Que? Que?” sinaludsod ti Mehikano. “I said, puta... puta! Comprende?” masemsem ni Malanie a nangkita iti Mehikano.

“Ohh, si, si!” Nagtungtung-ed ti Mehikano. Nangemkem ni Melanie. Sangkakitana ti rearview mirror. Ur-urayenna nga adda sumaruno kenkuana kadagiti kakaduana. Naipisitna itayen ti nalimed a homing devise iti luganna. Kayatna a sawen, kasapulanna ti tulong dagiti naka-assign iti misionda. Pinapardasna pay ti taray ti lugan.

“Despacio, señorita ... despacio...” kinuna ti Mehikano. Kayatna nga agpainayad ni Melanie.

Saan a nagbayag, nasaripatpatan ni Melanie ti maysa kadagiti undercover a luganda a sumarsaruno kadakuada. Gumilapgilap ti silaw iti tuktok ti lugan. Nakapigpigsa ti wangwang a mangngegna.

Naparasaw ti Mehikano. Kasta unay a tabbaawna. “I told you to slow down... Despacio! Comprende Español?”

Kinuti laeng ni Melanie dagiti abagana. “Poco... poco comprende Español.”

Inruar ti Mehikano ti paltogna sa inkasana. “No, no! Hide that weapon,” kinuna ni Melanie. Nagsardeng iti igid ti freeway. Linukatan ni Melanie ti glove compartment sa inseniasna iti Mehikano nga ikabil daytoy ti

paltog iti uneg.

Kimmusilap laeng ti Mehikano. Nagsardeng ti lugan nga aggilapgilap ti silawna iti likudan ti lugan da Melanie.

“Hide that stupid gun!” inyikkisen ni Melanie.

AGTUTUGAW ni Rudy iti lobby ti hotel idi awagan ti clerk. Imbaga daytoy nga addan ti taksi a mangpik-ap kenkuana. Nagkuretret ti mugingna iti siddaawna iti kapardas a dimteng ti taksi a paglugananna. Kinitana ti relona. Imbaga itay ti dispatcher a tallopulo a minuto nga aguray ngem sangsangapulo a minuto pay laeng ti napalabas. Nagturong iti counter. Pinennakna nga isu ti awawaganda. Pinennek met ti receptionist. Isu a talaga.

Masmasdaaw latta ngem rimmuar met laeng. Nangisit ti taksi. Taksi a talaga ti langana. Adda naganna. Adda markana iti sikigan ken iti tuktok daytoy. Ngem panakkelen. Naidumduma.

Inlukatna ti ridaw iti likud. Awan met ti naidumduma iti likud ti lugan. Adda ti landok a nagbaetanda iti drayber ken adda CCTV a nakakabit. Proteksion dayta dagiti drayber gapu iti kaadun dagiti matmatay kadakuada.

Limmugan.

“Good morning, sir,” inkablaaw ti drayber. “Where are we heading today?”

“Downtown... to one of the fastfood restaurants...” “Anything in particular, sir? McDo? Burger King? KFC?”

“Burger King is fine...” Sinimpa ni Rudy ti nagtugaw. Inkabitna ti seatbelt-na.

Naggunay ti lugan ket naaddaan ni Rudy iti tiempo a nangmatmat iti ladawan ti drayber ken ti nagan daytoy. Paul McGrady. Makaisem ta manmanon a puraw ti makaanus nga ag-taxi driver. Rumigrigat ngaminen ti biagda aglalalo iti isasangbay ti UBER a napigsan a kakompetensiada. Napardas ti serbisioda ken nalaklaka ti singirenda a plete.

Liman a minuto a pampanurnorenda ti kalsada idi pagammuan la ta nagpakanawan ti lugan. Naklaat ni Rudy. “What’s going on?” sinaludsodna.

Saan a naguni ti drayber. In-inut ketdi a nagpangato ti sarming iti nagbaetanda iti drayber.

Agbalawen ni Rudy. “Hey! Hey! What’s going on?” sinaludsodna manen.

Saan latta a simmungbat ti drayber. Impalawlawna ti panagkitana iti uneg. Tinugtogna ti sarming a namagtangepen iti nagbaetanda iti drayber. Saanna a sinardengan a tinogtog ti sarming. Agririawen ngem dina ammo no mangngeg pay ti drayber.

Kinitana dagiti paglukatan ti lugan. Naka-lock. Saanna a malukatan. Sabalin ti agparparikna kenkuana. Inruarna ti selponna. Nagdayal ngem awan kiriring a mangngegna. Kinitana ti selpon. No Service!

Nagdanagen. Pinadasna ti nagteks ken ni John. “Help... in trouble... taxi licence number, 32456.” Insend-na. Dina ammo no makadanon wenno saan.

(Maituloyto)