Bumaknangtayo iti Itutulongtayo
MAMATIKAYO kadi nga adda pagbaknangan iti itutulongtayo iti sabali a tao? Adda pagsasao a magustuak unay, “Your kindness will be returned to you a thousand folds.” No literal a panagawat, di ngata kayatna a sawen a no tumulongka, kas pagarigan nanglimoska iti PhP20 iti maysa nga agpalpalama, no maisubli kenka daytoy iti maminribu a daras, di kadi PhP20,000 dayta no kuan!
Di ngata alisto a pagbaknangan ti panangtulong iti pada a tattao?
Iti serioso a pannao, mamatiak nga iti panangsaranaytayo iti pada a tao nga awan namnamaen a supapak manipud iti natulongantayo wenno iti kabagianda man, isun ti maysa kadagiti kababannuaran a galad iti agdama a panawen.
Lockdown Angels
Idi karugrugi ti Enhanced Community Quarantine, adda maysa a gayyemtayo a kabsat met laeng iti pluma a timmakder a timmulong kadagiti kakabsat nga Aeta iti Cagayan ken kadagiti estudiante a taga-Batanes nga agbasbasa idiay Tuguegarao. Awagantayo latta isunan iti V.
Gapu iti lockdown, naawanan dagitoy a kakabsat iti access kadagiti kangrunaan a serbisio a pairamanan iti panaggatangda iti makan ta awan metten ti public transportation.
Daytoy a pandemia, aglalo a naipakita iti dakkel a paggidiatan dagiti marigrigat ken kaddaan. Ni marigrigat, ad-adu ti awan bukodda a lugan; ken no adda man luganda, motor wenno kurongkurong.
Iti pannakaipasardeng iti public transportation, ni marigrigat ti umuna nga agsagaba.
Dagiti tattao a kas ken ni V a sisasagana a tumakder a tumulong kadagiti agkasapulan ti maysa kadagiti rason a ni Filipino, agbiag uray iti panawen ti lockdown. Wen, timmulong ti gobiernotayo kadatayo ngem saan met nakaanay. Naimbag ta adda dagiti “lockdown angels” a kas ken ni V. Dagiti kakabsat nga awanan, nakaawatda kadagiti kasapulanda bayat nga ur-urayenda ti tulong manipud iti gobierno.
Para kaniak, ni V ti maysa kadagiti kababaknangan nga am-ammok. Bakbaknang nga amang ngem dagiti tattao a masukansukat dagiti agkakapintas a luganda ngem no panangtulong iti pada a tao, dida pay makaitulong iti uray sangatabo laeng a danum no adda maur-uraman.—O