Saluadan ti Salun-at ti Panunot
ADU dagiti agpulpulkok gapu ta dida makaruar – a gapu met iti maysa nga alagaden iti pandemia a panagtalinaed iti balay.
Iti daytoy a pannakakontrol ti garaw a rummuar manipud iti pagtaengan, adu a tattao ti maikawa. Adda dagiti nagbalin nga arsagid wenno adda dagiti kankanayon a napudot ti uloda gapu iti pannakaipupokda.
Adda met dagiti adda lattan iti sango ti telebision wenno agmalmalem a kutkutingtingenda ti selponda. Awan pay ketdin ti maisamirada a sabali a trabaho.
Adu pay laeng ti saan a makaaklon iti kinapudno iti panagbalbaliw ti inaldaw nga aramid. Maibilang kadagitoy ti pannakayawid ti trabaho, temporario a kaawan iti trabaho, panangaramid dagiti ubbing iti leksionda iti uneg ti pagtaengan, ken saan a pisikal panagkikita kadagiti dadduma a kameng ti pamilia ken gagayyem.
Pakaruen pay daytoy baro a taray ti biag ti panagbuteng a maakaran iti bayrus ken uray iti pannakaakar kadagiti kakabagian. Singaen dagitoy ti templada ken panagpampanunot dagiti tattao.
Tapno maikabassit ti tension dagti kabbalay, ilungalong ti panagaramidda kadagiti bambanag a mangyaw-awan iti pannakariribukda. Babaen dagitoy, mataginayon ti salun-at ken panagpampanunot dagiti kameng ti pamilia.
Kabayatan iti pannakaipupok iti pagtaengan, ibalakad kadagiti kabbalay a padaananda dagiti patigmaan ken singasing dagiti adda iti turay. Ngamin, kadakuada a magun-od dagiti mapagtalkan a damag.
Ammuen pay dagiti pakaammo ti World Health Organization. Aramiden dagiti sigud nga nga ar-aramiden iti inaldaw. No saan a mabalin gapu iti baro a pagannurotan, mangisayangkat kadagiti baro a produktibo a pangbusbosan iti tiempo.
Balakadan dagiti ubbing ken dadduma pay a kabbalay a maturog ken agriing iti isu met laeng nga iskediul iti inaldaw.
Siguraduen a taginayonen dagiti ubbing ti kinamanagdaldalus iti bukodda a bagi. Mangidasar kadagiti nasustansia a taraon, ilungalong ti regular a paangwatwat, ken mangilatang iti tiempo a panaglinglingayda.
Limitaran ti panagtalinaed dagiti ubbing iti sango ti telebsion. No kastoy ti aramiden, malimitaran met ti pannakagun-odda kadagiti makapadanag a bambanag.
Mabalin a palubosan nga agbuyada iti maminsan wenno mamindua iti uneg ti maysa nga aldaw.
Agsipud ta makontrol ti iruruar iti pagtaengan, bay-an dagiti ubbing a makinaig kadagiti kakabagian ken kakabagianda babaen ti selpon wenno online channels.
No adda nataengan a kabbalay, ipatigmaan ti pananglimitarda wenno saanda a panaginum iti makabartek. Saan koma a maaramat ti alkohol tapno maikabassit ti panagbutbuteng, panagdandanag, pannakatuok, ken pannakaipupok.
Makalinglingay met dagiti video games. Uray no kasta, saan nga ipalubos nga agbaybayag dagiti agay-ayam iti daytoy.
Igunamgunam kadagiti kabbalay ti positibo a panangaramat iti social media. Aturen pay dagiti biddut nga impormasion a maiwarwaras iti internet.—O
Kinitana ni Lakay Felino. “Masapul pay laeng ngamin, aya, dayta nangubbaan?”
“Maysa kadagiti di maaw-awan a rekado ti idadanon,” insungbat ni Lakay Felino.
“Sangaribu?”
Napaliad ni Lakay Felino iti tugawna idinto a nagminnulagat da Manang Tina ken Lakay Lito. Kasla awan nangngeg da Rolly ken Daris ta timtimtimanda ti sampol nga inted ni Lakay Lito.
“Baka kuna ni Lakay Islao a tirtirisentay ida,” kinuna ni Manang Tina. “Ala, mangrugikan iti lima ribu ket siakton ti makaammo a mangnaynayon. Adda met dagiti naurnong a bingaymo kadakami.”
“Ket ti sab-ong?” kinuna manen ni Lakay Felino. “Maysa nga ektaria, kunam lattan, bayaw, uray ta kukuayonto met la nga agpadpada,” insampitaw ni Lakay Lito.
Ania ngarud, nagtung-ed lattan ni Angkel Dok. Sangapulo a minuto laengen sa alas otso idi rummuarda iti ruanganda. Sakbay a rimmuarda, binaonda ni Rolly a nangpagna iti nagbaetan ti ruanganda iti ruangan da Lakay Idiong tapno matantiada nga eksakto nga alas otso no makadanonda tapno matungpalda ti kuna ti lunario.
Tunggal ruangan a malabsanda addada nagmarangmang a mangsipsiput kadakuada. Guapo pay laeng ni Tang Jani uray no senior sitisenen, adda nagkuna. No itsura, kunam la no balikbayan, kuna met ti sabali. Balikbayan met a talaga. Nagyan idiay Manila, nag-balik-Simbaluca!
Talaga ngamin a nagpataraki ni Angkel Dok. Puraw ti shorts-na a pinarisanna iti puraw met laeng a polo. Napan pay nagpa-trim iti barbas ken bigotena dita Aparri idi kalman. Nakataltalged met ti kepkep ti sumilsileng a wig-na iti tuktokna.
Iti sumrekan ti barangay road iti kabalbalayan, tallon a traysikel ti nagsubli kalpasan ti panangisarang ni Carding iti iggemna a karatula a nakaisuratan ti “No Ilut Today. Angkel Dok Holiday.”
Iti tawa ti balay ni Lakay Idiong, maraisem ni Lakay Islao a nangtung-ed ken ni Lakay Desterio. “Dagitadan, kapid!” inkiddayna.
Iti sango ti ruangan, napasanud ti bunggoy ni Angkel Dok. Kasano ngamin ket naibalunet ti rikep.
“Kunak man no nalpasen ti saritaan? Ita ti nagtutulagan a petsa, di ngamin?” Nagsabat dagiti kiday ni Lakay Lito.
Ngem nakabagbagas ti isem ni Lakay Felino. “Relaks lang, bayaw!” kinunana sa kimmita iti balay. “Kastoy ti kayatko. Adda suspense-na!”
Nagkinnita da Lakay Lito ken Manang Tina. Nagtilay met da Daris ken Rolly a nangtannawag iti uneg ti inaladan.
“Nagasat nga aldawyo, pagraemanmi a bumalay!” inyayug ni Lakay Felino. “Ti grasia ti langit ket bumaba koma kadatayo a sangapada!”
“Agpakaammokayo koma, nadayaw a sangaili… tapno ammomi ti saksakbayanmi!” inyayug met ni Lakay Dexterio a giddato a timman-aw.
Iti siledna, sinarapa ni Elaine ti barukongna. Addadan, nakunana iti unegna ket aglamiisen dagiti dakulapna. (Maituloyto)