Ni Lakayna ken ti Pensionada
Dear Ikit,
Maysa nga adipen ti linteg ti asawak. Pagwadan a polis iti ilimi. Uppat dagiti annakmi a diak met pagpangas ngem adda met siribenda. Dua a lallaki ken dua a babbai. Tinawen nga umul-ulikami nga agassawa iti entablado a mangisab-it iti medalia kadakuada. Ammo ti sibubukel nga ili ti panagpipinnategmi a sangapamilia.
Adda balikbayan a simmangpet iti kabangibangmi a bario. Doliar ti pensionna gapu ti ipapatay ni lakayna diay Amerika. Dakkel kano a gatad ti inted ti gobierno ti Amerika gapu ti ipapatay ni Lakayna sa nagdakkel kano ti naawatna nga insurance. Nagngipatakder iti dakkel ken moderno a balay tapno agnaeden ditoy ilimi.
Iti panagpatpatrolia da lakay, rabii man wenno aldaw, idiay kano balay ti balo a balikbayan ti pagmermeriendaan ken pangpangananda, isu a saanen nga um-umay mangaldaw wenno agmerienda ditoy balay.
Sumagmamano pay a bulan, addan maal-alimadmadko a relasionda ken lakayko. Diak nagtagtagari ta agtalekak kenkuana. Pamrayak la ti umisem wenno agkatawa no adda mangipadamag kaniak.
Agsasarunon nga agkolehio dagiti annakmi. Saanmin a kabaelan nga agigiddanda nga agbasa iti kolehio isu a paleppasenmi pay nga umuna koma ‘diay inaunaan. Awan ti mayat nga agsardeng nga agbasa.
Imbaga ni lakay a tumulong kano a mangpabasa kadagiti annakmi daytoy a balo a pensionada ta awan kano met ti anakna a pagbasaenna. Inyangawko no ania ti sukatna, ngem sinallabaynak ni Lakay a saanak kano nga agim-imon ta pagsayaatan kano met dagiti annakmi. Kasla nadanog ti barukongko, ikit. Ania ti aramidek?—Julieta
Kaanakan a Julieta,
Saan laeng a disnog iti barukong ti mariknak no siak ti agsaad iti biangmo. Kasla agtupak ti langit.
Nalinteg nga adipen ti linteg ni Lakaymo. Saanyo a kabaelan a pagbasaen nga aggigiddan dagita uppat nga annakyo. Nareggetda nga agbasa. Agsakit ti nakemda nga agsardeng nga agbasa. Amangan no ti saanda nga iseserrek nga agbasa ti pakayaw-awananda .
Adda sitatallugod a tumulong a mangpabasa kadakuada, ta awan ngarud ti anakna a pagbasaenna. Agsapsapul dayta a pensionada iti pagsadaganna ket mangnamnama a no matulonganna dagita annakmo a mangtun-oy iti arapaapda, ammo met ngata dagita annakmo ti agsubad iti naimbag a nakem iti masanguanan nga aldaw a masapulnan ti pannarabay. Kasaritam a nasayaat dagiti annakmo. Ipudnom ti sasaadenyo. Adda kaniadan no awatenda ti naidiaya nga agpaay iti masakbayanda.
Iti sabali a bangir, sika ti inkallaysa ni lakaymo. Saannakayo met a baybayan. Amin a benepisio ti polis, ti umuna a pamilya ti mairanud. Ituredmo ti pannakadanog ti barukongmo ken panagtupak ti langit kenka yantangay naraniag a bituen met ti naipasurot.—Ikitmo