TIPS Tarabay iti Pagtaengan, Salun-at ken Dadduma Pay
AGYAMANKAMI manen ken ni MARIA LUISA G. TEOXON, maysa a Registered Nurse, iti daytoy imbinglayna a nayon a tips maipanggep kadagiti dadduma a pakausaran ti agua oksihenada (hydrogen peroxide), daytay antibacterial ken antiseptiko a likido a no maaramat a pangdalus iti sugat, agburburek daytoy.
1. Nakset ti linutom ket ita, dimo metten maikkat dagiti nabati a nakset a pasetna iti kaserola wenno iti pariok uray kasano ti panangradradmo? Mangibuyat iti hydrogen peroxide (3%) a mangsalapasap iti nabati a nakset a taraon. Nayonan iti baking soda. Kiwaren sa bay-an iti 2-6 nga oras. Kalpasan daytoy, nalakanton a maikkat ti mantsa ti kaserola wenno pariok. Mabalin a punasamto lattan.
2. Agriniad ti sakam wenno pimmuskol ken kasla nagrenggat payen ti mukodmo? Mangilaok iti dua a paset ti hudrogen peroxide iti dua a paset ti napudot a danum. Sakbay a maturog, yuper dagiti mukod iti daytoy iti 30 a minuto. Kalpasan a mapagaam, mabalinmon a karusen dagiti natay a paset ti kudil. Kalpasanna, sapsapuam dagiti mukodmo iti losion sa agmedias. Nalamuyotton dagiti mukodmo iti kabigatanna.
3. Pagdalus iti langdet. Kalpasan ti panangaramat iti langdet, nangruna no inusarmo daytoy iti karne, ugasan iti danum sa kalpasanna, yuper iti 3% hydrogen peroxide iti 10 a minuto. Nasken a siguraduen a nadalus ti langdet sakbay nga aramaten tapno maliklikan ti food poisoning gapu iti mabalin a kaadda ti bakteria iti langdet uray pay inugasamon. Ket tapno masigurado a nadalus ti langdet, yuper daytoy iti agua oksihenada.
4. Pagpasalun-at kadagiti mula. Makatulong ti agua oksihenada kadagiti mula ta agparuar daytoy iti oksiheno. Gapu ta kasapulan dagiti mula ti oksiheno tapno makaagsepda iti sustansia manipud iti daga, nasayaat no ikkam ida iti nayon nga oksiheno. Makatulong daytoy iti panagbalin a nasalsalun-at ken nakirkired dagiti mula. Mangilimog iti sangakutsarita a 3% hydrogen peroxide iti kada sangatasa a danum. Paglimogen sa daytoy ti ipasuyot kadagiti mula. Mabalin pay a daytoy ti pangyuperam kadagiti bukel sakbay nga imulam tapno matay dagiti ania man a peste wenno buot nga adda kadagiti bukel.
5. Pagdalus kadagiti retainer wenno mouthguard. Bugguan ti retainer wenno mouthguard sa ikarga iti garrapon nga addaan danum. Bay-an a matinep daytoy. Limogan iti sangakutsara a hydrogen peroxide ken sangapirit a baking soda. Bay-an iti lima a minuto. Siguraduen a balnawan met laeng sakbay nga usaren.—O