Addan Nobio ni Bela
MALAGIPYO pay ti pelikula da Bela Padilla ken Carlo Aquino a “Meet Me in St. Gallen”?
Maysa nga ili iti Switzerland daytoy a nakasiutingan ti nasao a pelikula.
Ala ket iti nasao a lugar, nasapulan met ni Bela ti agdama a nobiona—isu ni Norman Ben Bay. Kablaaw ken ni Bela.
* * * Pudno a takderanen ni Ellen Adarna ti panagbalinna a hands-on nga ina ken ni Elias Modesto nga anakda ken John Lloyd Cruz.
Segun kenkuana, saan nga agsubli iti showbiz iti unos ti umuna a pito a tawen ni Elias.
Agtawen itan iti dua ni Elias.
Kayatna a sawen, lima a tawen pay ni Ellen a di agsubli iti showbiz, ‘bagis.
* * *
Iti pannakasursurat daytoy, awan ti makuna ti Malakanyang iti panagsubli ti ABS-CBN iti aire.
Dinakamat ketdi daytoy a ti Zoe Broadcasting Network, Inc. ti i-regulate-da.
Ti nasao a kompania nga am-ammo a kas Zoe TV ti kinatulag ti Kapamilya Network a mangiruar kadagiti programa daytoy ket maam-ammo met a kas A2Z Channel 11. Ni met Brother Eddie Villanueva ti akinkukua iti Zoe TV.
Ala, tagiurayentayo ngarud, ‘bagis, no awan met laeng manen ti makita ti gobierno a panaglabsing.
Kabayatanna, welcome back kadagiti programa ti Kapamilya network. * * *
Ni Robi Domingo ti baro a host ti “Game KNB” a programa ti ABS-CBN a mabuya iti Kumu ken Jeepney TV.
Kuna ni Robi a nakaay-ayat ta nagbalin met a contestant daytoy idi 2008.
Immun-una a nagbalin a host da Kris Aquino ken Edu Manzano iti nasao a programa.
Kaipapanan daytoy, ‘bagis, a pudno a tiempo met itan da Robi ken dagiti kabaddungalanna a host.—O