Ti Gasatmo
SCORPIO (Oktubre 23- Nobiembre 22). Manamnama ti positibo a resulta dagiti gannuat ta nalawag nga umuna dagiti panggep sakbay nga umaddang. Adda dagiti kellaat a lumtuad a parikut ket ngarud, masapul met nga adda nakasalikad a nakasagana nga alternatibo wenno pamuspusan. Nagasat a numero: 3, 4, 9.
SAGITTARIUS (Nobiembre
23- Disiembre 20). Matingiting dagiti kalikagum ken panggep ket maikeddeng no ania a dana ti suroten, wenno no masapul pay nga ituloy ti sursuroten a dana. Maibalakad ti panagannad ta adda dagiti sinam-it ken ragsak nga apagbiit a katukadna met ti sangakatikatan a panagbabawi ken ladingit. Nagasat a numero: 1, 5, 8.
CAPRICORN (Disiembre 21- Enero 19). Manamnama ti yaay ti parabur a nupay saggabassit, grasia latta dagitoy a masapul laeng a pagyamanan. Mausar ti enerhia a pagparnuay iti sabsabali pay a pakairanudan ket ngarud, saan koma a mabusbos iti panagdayengdeng. Nagasat a numero: 2, 6, 9.
AQUARIUS (Enero 20- Pebrero 19). Maipalagip kenka a saan laeng a siksika ti marigrigatan ditoy lubong, ken saanmo a baklay ti krus ti sangatawan. Agbalin a paratignay dagiti tattao a nagsakripisio para iti gin-awa ti sabali. Nagasat a numero: 3, 4, 8.
PISCES (Pebrero 20- Marso 20). Manamnama iti pannakasursurom a sanguen, kariten ken atiwen dagiti al-aliam a mamagtalapuagaw met kadagitoy a maminpinsan ket saandakanton a singaen. Matagipateg ti ania man a naparnuaymo ta nalaklaka nga amang ti mangdadael ngem iti mangparnuay. Nagasat a numero: 1, 5, 7.
ARIES (Marso 21- Abril 20). Maamiris a nga it laksid dagiti nagun-od iti biag, masapul a napakumbaba latta tapno saan a masayang dagitoy a balligi. Maipalagip a madagdagus itan ti pannakadadael ti ania man. Kankanayon a kalikaguman ti pannakabukel wenno panagtitipkel dagiti bambanag. Nagasat a numero: 2, 6, 8.
TAURUS (Abril 21- Mayo 20). Iti daytoy a bulan, ad-adda pay a maamiris a husto ti pammatim a dakkel ti potensialmo. Masapul laeng a sarangten ti aliaw iti kaunggan tapno iti kasta, mawayawayaan ti kinaimbag ken kinalaing a kupkupikopam. Nagasat a numero: 1, 5, 9.
GEMINI (Mayo 21- Hunio 20). Naisangrat daytoy a bulan tapno dagiti adda kenka a talento ken kabaelan, makayasan wenno mapatadem ket mausarmo iti nakaisangratanda. Iti pannakausarmo kadagitoy, umay metten kenka dagiti parabur ken dagiti naiimbag a tattao. Nagasat a numero: 3, 4, 7.
CANCER (Hunio 21- Hulio 20). Mapaneknekam manen a saan a makapasalun-at ti saosao. Pagimbaganna, awan ti gundaway a tutopam dagitoy. Mayintekmo ketdi ti imatangmo iti panagparnuay kadagiti naiimbag a bambanag a mangpaksiat kadagiti makaidagel a saosao. Nagasat a numero: 2, 5, 8.
LEO (Hulio 21- Agosto 20). Nalagan ti rikna ta maaramid dagiti umno ken maiparbeng a manamnama a pakairanudan ti kaaduan. Mabalin nga agkurang dagiti material a gunggona ita ngem mapnek met iti rag-o ti kaunggan. Dagiti panagsakripisio, maitangam no kasano a makatulongda iti sabali. Nagasat a numero: 1, 4, 7.
VIRGO (Agosto 21- Septiembre 22). Gapu iti agdama a kasasaad, posible a saan a matuloy ti panggepmo a yaakar iti sabali nga industria wenno tay-ak ti pagsapulan. Maipangrunam ketdi a kitaen ti pagragsakan ken ti pagnam-ayan ti pamilia. Nagasat a numero: 3, 6, 8.
LIBRA (Septiembre 23- Oktubre 22). Masiertom ita no pudno a kayatmo ti araramidem ken saanka a mapilpilitan. Nalawa ti lubong ken panawen tapno pilien ti kayat ken kalkalikaguman— iti man biag wenno ayat. Nagasat a numero: 2, 5, 7.