No Adda Sigsigloten, Adda Met Warwaren
“Ay, ket bagik met ti kalding, a!” innayon ni Madam Tere iti baet ti garakgakna.
Saan nga ammo ni Madam Cresing ti isungbatna. Atiwen manen ti riknana.
Kinusilapan ni Madam Eyang dagiti dua. Ginuyodna ni Madam Cresing ket inturongna iti balkonahe.
Tumrem ta tumrem manen ti lua ni Madam Cresing. Nadagsen ngamin nga awatenna ti rabak dagiti kamaestraanna kenkuana. Idi makaturpos iti kinamaestra, nagpabunar ni apongna a lakay. Tallo a baboy ken lima a kalding ti pinaparti daytoy. Isuna ngamin ti umuna a maestra iti pamiliada. Dayaw a dakkel para ken ni apongna dayta ta kaaduan iti pamiliada ti elementaria wenno hayskul laeng ti nalpasda.
Nagpaala manen ni apongna idi rimmuar ti resulta ti PBET iti immuna a panageksamenna. Adda kabarioanda a nangipadamag ken ni apongna a nakita daytoy ti naganna iti pagiwarnak. Ti daras ni apongna lakay a napan nagpaletson iti baboy. Idi sumangpet iti barioda, nakaadadun ti tao a nakaar-arimbangaw iti arubayanda. Kasla metten agboda de soltera ta adda pay pasalana. Nakigtot idi ngem inturturedna nga imbaga ken ni apongna a saan a pimmasa. Napan innala ti kaarrubada ti pagiwarnak ket impakita daytoy ti nabasana. Nakalawlawag nga ANASTACIO, Crisantina L. Wen, ngem saan nga isuna ta Crisanthina ti naganna. Adda letra H iti naganna idinto nga awan ti adda iti pagiwarnak. Sa maysa, ammonan a saan a nakaruar idi ta adda met resulta nga ipaw-itda iti pagadalan. Tallopulo ket pitoda amin a nageksamen idi a naggapu iti pagadalanda. Pito ti saan a nakaruar— a pakairamananna. Napalalo a babain ti pamiliada idi. A puon ti panagpuppupokna iti nabayag. Dina kayat ti rummuar iti balayda ta mabain a sumarang kadagiti tattao. Ken dina kayat a denggen ti mabalin a sawen dagitoy. Pinabasol la ket ngarud ni apongna da amang ken inangna ta apay kano nga adda pay la H ti naganna.
Dagitoy pay a pasamak ti nangikalikagumanna nga agbalin nga LSB. Tapno maallangon bassit ti dayawda. Bareng kunaen dagiti tattao nga, “Agpayso a saan a nakaruar, a, ngem maestran!” Ngem iti panagriknana, biddut manen ti desisionna ta kaaduan a sakit ti nakem met ti laklak-amenna.
“Ala, bay-am man dagita… dimo dengdenggen ti ibagbagada.” Inilut ni Madam Eyang ti bukot ni Madam Cresing.
Rinakep ni Madam Cresing ni Madam Eyang. Napia pay daytoy a kamaestraanna ta makaawat iti sasaadenna.
Kinapudnona, umapal iti kinagasat ni Madam Eyang. Kayatna a sultopen ti babato daytoy. Iti laksid nga innem a tawen nga inleppas daytoy ti kinamaestra, pinampaminsanna ti PBET-na. Idinto nga isuna a nakagunod pay iti “Most Outstanding Student Teacher Award…” Nagsennaay ta nagbalin metten a “Most Outstanding in Taking the PBET.”
NAGKURETRET ti muging ni Madam Cresing idi mapasungadanna ni Euraclido. Kasano a malipatanna daytoy dati nga adalanna? Isu ti maysa kadagiti immuna a pupil-na iti Grado 5. Marigatan idi a mangibalikas iti nagan daytoy. Dinamagna iti ubing no nangalaan dagiti dadakkelna iti naganna. Nagan kano
dagiti aapongna iti agsumbangir. Ti ‘Eu,’ ni apongna a Eufemia; ti ‘ra,’ ni apongna a Rafael— dagiti nagannak ni amangna. Ti met ‘Cli,’ ni apongna Clinton; ti ‘do,’ ni apongna a Dominga—a nagannak met ni inangna.
Dina met malipatan ti lung-ay daytoy ta isu laeng ti adalanna a dua ti rukod ti kadakkelna. No ti kanigid a sakana ti masnop a pagtakderenna, lima kadapan ket dua a pulgada; ngem no ti kanawan, uppat a kadapan ket sangapulo ket maysa a pulgada laeng. Ngem ad-adda a dina malipatan ti Boniok a birngasna kadagiti kaeskuelaanna. Nalaing ngamin nga agala iti lawwalawwa iti irrigasion. Iti rekrek ti kinawayanan ti pagsapsapulanna iti lawwalawwa ta nalagda kano ti saput ti lawwalawwa a maala iti karekrekan. Pagdaksanna ta uray oras ti klase, mapan manglawwalawwa. Uray kano kasano a panangung-unget dagiti immuna a nagmaestraanna, saan a dumdumngeg.
Agpipinnaangatda iti lawwalawwa iti tiempo ti reses ken sakbay nga agawidda iti malem. Iti bit-ang iti irigasion ti pagpapaangatanda. Ti maabak, mapitik ti lapayagna. Ni Boniok ti kanayon a mangabak. Pagdaksanna, ipennek daytoy a pitikpitiken ti lapayag ti kaay-ayamna agingga a lumablabbaga. Pakaaw-awagan daytoy ken dagiti dadakkelna iti opisina ti prinsipal. Linapigos ti ama daytoy idi. Kasla awan latta met iti ubing. Nupay kasta, kinasaritana met.
Daydi laeng ti napuotanna a pannakisarita ti prinsipal ken ti guidance councelor ken ni Euraclido. Impabus-oyen ti prinsipalda kenkuana ti pannakadisiplina ti ubing. Awan ammona a makagapu no di ti kabagian da Euraclido nga agtrabaho idiay Division Office.
Adda dagidi gundaway a makapungtot unay gapu iti kinabengngeg ni Euraclido ket kayatna met koma nga ungtan, ngem sinaysayaatna ketdi a binagbagaan.
Awan masakbayam, barok, no agbengbengngegka ken dimo ipasnek ti agbasa, kinunkunana.
Kabigatanna, adda manen napagsangit daytoy a kaeskuelaanna. Pudno ngamin a naitao nga adda diperensiana ngem gapu iti kinadakkel ti bagina, saan a kabaelan dagiti kaeskuelaanna. Idi met a napanunot ni Madam Cresing a mabalin nga agkurang dagiti dadakkel daytoy iti oras a para iti ubing. Isu nga inan-anusanna a kinasarsarita.
Nasdaaw laengen ta iti naminsan, inasitgan ni Euraclido ket kinuna daytoy, “Nakasingsingpetka, Ma’am Aydol.” Makaisem a saan idi. Ania ti naknakan daytoy nga ubingen, kunkunana iti panunotna.
Saan a daydi ti naudi a panangibaga ti Euraclido kenkuana iti kasta. Nagbalin a kasla yang-angaw pay ketdin ti ubing. Nadlawna ketdi nga in-inut nga impasnek ni Euraclido ti panagbasana. Nagleppas nga Honorable Mention. Balediktorian ngata koma no dina naayaman.
Kalpasan ti panagturpos ni Euraclido, dinan nakasarsarita. Masansan ketdi a makitana idi a makipapaangat iti lawwalawwa iti bet-ang iti irrigasion. Masayangan idi, sayang ti sariritna ta di met gayam naiwagat daytoy ti kinaayamna. Idi kuan, dinan nakitkita.
Nakigtot laengen ta idi naminsan a tawen a panageksamen daytoy iti teachers board, nagkitada ken Euraclido. Ageksamen met gayam. Dina mailawlawag ti riknana idi asitgan daytoy a kablaawan. Ita, pinasiar pay daytoy iti pagadalan.
“Nakapasiarka met, balong?” nalamuyot ti boses ni