Siled ti Kararag
Basaentayo ti FiliApos 4:10-20:
Insurat ni Pablo, “Ket itedto ti Diosko ti amin a masapulyo babaen ti nawadwad a kinabaknangna ken ni Kristo Jesus.”—Filipos 4:19
TUNGGAL Biernes, adu dagiti tattao a mapan iti pagtagilakuan nga asideg iti balaymi tapno gumatangda iti karne, keso, nadumaduma nga apit ken dadduma pay. Gumatangda kadagiti nadumaduma a bambanag kas maibatay iti kasapulanda.
Kastoy ti kayarigan dagiti tattao nga agat-atendar iti iglesiatayo. Dagiti dadduma, mapan tapno makikadua. Adda met dagiti mapan tapno makasursuro. Dagiti dadduma, mapan tapno makipagkankanta, adda met dagiti saan nga agkankanta iti himno ngem ikarkararagda a naimpusuan ti “Kararag ti Apo.” Ibingay met dagiti dadduma ti sagutda a mangisuro, agpangulo wenno mangparegta. Amin a mangidaulo, ken mangparegta kadagiti agladladingit, napukawan wenno napasaktan ket makasarakda iti pannakabendision kadagiti pusoda babaen ti panangibingayda kadagiti talentoda. Agdudumatayo, ngem uray no ania ti panggeptayo nga agatendar iti iglesia, sabten ti Dios ken dagiti tattaona dagiti kasapulantayo.
Awan ti asino man kadatayo a makaammo iti sungbat dagiti amin a kasapulan, ngem ammotayo nga amin dagitoy mabalin a sungbatan ti Dios. Mabalin a ti pagrebbengantayo isu ti mangawis kadagiti gagayyemtayo tapno mapanda iti iglesia tapno rugianda ti pannakairelasionda iti Dios ken kadagiti managayat a gunglo dagiti namati.
Kararag: O Dios, tulongannakami a mangipateg kadagiti tulong dagiti amin nga agatendar iti iglesiam. Tulongannakami tapno masabetmi met ti kasapulan dagiti sabali a kas agserbikami kenka. Kas insuro ni Jesus kadakami, agkararagkami, “Amami nga adda sadi langit, madaydayaw ti naganmo, umay koma ti pagariam. Itdem kadakam ti taraonmi ti inaldaw. Pakawanennakami kadagiti basbasolmi a kas met iti pammakawanmi kadagiti nakabasol kadakami. Dinakam yeg iti pakasuotan” (Lucas 11:2-4). Amen.
Kapanunotan: Awan ti banag a saan a mabalin nga ipaay ti Dios. Ikararagan: Dagiti bisita ti iglesia.