32 No Apay a Nasken a Mapasayaat ti Pantalan ti Aparri
nakasukat. “Ur-urayenka,” kinunana.
Nagdigosak. Nagpellesak sa nagkuyogkamin a bimmaba. Mangrabiikami iti restaurant. Nagsublikami met laeng iti kuarto idi makapangankami. Addan temporario a partision dagiti katremi. Nagtugaw ni Diana iti pungto ti sopa, iti met sabali a pungto kaniak. Nagbuyakami iti TV. Adu dagiti sinarsaritana. Adda kano kaayan-ayatna ngem nagsinada idi agtuloy nga agbasa iti kolehio daytoy.
Iti panaglabas ti aldaw, naannayas ken natalinaay ti panagdennami ken Diana. Awan dumami iti agayan-ayat nga aggingginnantil, agkinkinnatawa ken agrinrinnabak. Agpinnustakami pay no agbuyakami iti football ken basketball. Ngem ti diak maibturan a paaramidna, pailutna ti bagina no aginanakamin iti rabii. Saan kano nga umdas dagiti definition machines a maidapnas iti bagina iti inaldaw. Imbilinda kano nga ilutenna ti bagina bayat ti panagin-inanana.
“Pangngaasim ta ilutennak,” kinunana nga agpakpakaasi. “Nakabambannogak.”
Diak nakapagkitakit iti awisna. Kalpasan a nailutko, bimmabaak. Nagturongak iti asideg a bar a pakaipatpatayaban ti kanta nga “All Alone Am I” ni Brenda Lee. Naglemmesak iti arak a pangsebsebko iti gumilgil-ayab a riknak.
Nabiit laeng ti panagdennami ken Diana. Agmakabulanakon a bimmaba iti barko ket iti panagreportko iti Scandinavian Seaman’s Union hall, addan napilik a pagluganan. Agbiahe ti barko iti South America, Africa ken Australia. Sangapulo a bulan ti kapaut ti biahe. Third officer ti puestok iti Swedish a barko. Nakasaganan dagiti papelesko ken danonek ti barko iti Sparrows Point iti Baltimore, Maryland. Agluasak iti sardam. Greyhound bus ti pagluganak. Naliday ti panagpinnakadami ken Diana.
“Adda kadi maitulongko?” inyandingayna idi makitana ti kinalidayko.
“Saan pay nga ita. Inton addan natalged a trabahom a masapulko ti tulongmo.”
“Ur-urayek ti panagsublim,” kinunana nga aglulua. Immarakup iti nairut ken napaut.
Ngem saanko a sinubadan ti nabara nga arakupna. Idi rumuk-at, impatayko dagiti dakulapko iti agsumbangir nga abagana.
“Agsingsingpetka,” kinunak kalpasan ti panangtipedko iti sennaayko. Inyawatak iti sobre a naglaon iti kuarta.
“Umanayen daytoy agingga nga agturposka. Nabayadanen ti innem a bulan a panagyanmo iti hotel.”
Binitbitkon ti maletak ket pimmanawakon. Ket dagidi balonko a lagip, inkuyogko met laeng a nagawid.
Diana, naisennaayko.
NADLAWKO ti danapeg nga umas-asideg. Naglukat ti ridaw. Addan ni Diana. Immasideg ket nagkalukbaba iti tengngedko. “Simmangpetkan,” naumbi a nagsarita. Makaderrep ti ayamuonna. Idi rumuk-at, pinerrengko. Sabalin a Diana ti adda iti sanguanak. Adayo a napimpintas ngem iti daydi pinanawak a Diana.
“Naragpatkon ti inar-arapaapko a kinamodelo. Sika ti