Paskua iti Panawen ti Angol
NO Paskua kunatayo, mailadawan iti panunottayo dagiti agrimatrimat a parol, ken ti panagsasango dagiti agkakapamilia ken nasinged nga aggagayyem iti Noche Buena.
Kastoy pay ngata ti ladawan ti Paskua iti panawen ti angol wenno pandemia?
Narimat
Narimat itan ditoy balay. Inruaren ni Mama dagiti Christmas decors a naidulin iti makatawen. Narimat metten dagiti dadduma a balbalay. Nupay kasta, kasla man naliday dagitoy panagrimatrimat dagiti parol ken Christmas lights.
Iti panagkitak, kasla agkurkuridemdemda. Saan a nakakaskasdaaw ta ti panagkitatayo iti lubong, repleksion ti marikriknatayo.
No naliday ken nariribuk ti kaunggantayo, naliday met ti panagkitatayo iti lubong.
Rumbeng ngarud a simple laeng ti panangselebrartayo iti Paskua ita a panawen ti angol.
Simple
Adda alkansiak a para iti bingayko iti tinawen a panangselebrar ti pamiliami iti Paskua.
Ipaparti ni Mama ‘tay baboy a nairanta a nataraken a para iti Paskua. Awisenmi dagiti kakaarruba, gagayyem, ken kapamilia ta pagsasanguanmi daytoy.
Tapno adda paglinglingayan, adda dagiti parlor games. Tay kalatakan ket isu iti version-mi iti Pinoy Henyo. Adda premio a sangaribu a pisos ti mangabak a pareha.
Nakaragragsak a buybuyaen dagiti umay makipagrambak.
Kamaudiananna adda simple a grocery bag a maibunong iti kada pamilia a tumabuno.
Gapu ta adda dagiti pagalagadan ket maiparit ti mass gathering, mabalin a ti Paskuami iti panawen ti angol ket awan ti dati a panagsasango dagiti agkakaarruba.
Uray met awan ita a Paskua dagiti adu a parlor games a kas nakairuaman, buongekto ti alkansiak. Gapu ta awan unay magastos ti pamiliami, sapay koma ta dakdakkel ken nadagdagsen ti grocery bag a maisagutmi ita a Paskua iti panawen ti angol.