Kastoykami Ditoy Greece
iti panagyanmo iti amom, awan ti cash a maawatmo kenkuana a bayad ti panagobram malaksid laeng no adda sabali a rason.
Bayat pay ti lockdown, adda pay sabali a permit. Isu ‘tay permit pass-mo no inka iti banko, supermarket ken drugstore. Tay e-pass a kunada. Usaren ti selpon. Adda numero a pangiteksan iti nagan ken adresmo ken no sadino ti papanan. No masungbatan dayta teksmo iti OK, libreka a mapan.
Daksanggasat met ta bayat ti lockdown, nairanrana la ketdin a naperdi ti luganmi. Tallo a car service ti napanak ngem maymaysa ti sungbatda: agurayak iti makalawas ta dua laeng a trabahador ti sumrek iti kada aldaw. Awan ti naaramidak.
Pagsayaatanna, saan a nagsardeng ti operasion ti para publiko a bus. Ngem malimitaran ti bilang dagiti pasahero. Naipatungpal ti social distancing isu nga awan agaabay. Kasta met iti taksi. Dua laeng iti pasaherona.
Kas panagannad iti mabalin a pannakaakarmi iti pagbutbutngan a sakit, saankami a nagbus ken baket a mapan agobra. Kinaykayatmi ti nagnagna ta uray ket nasurok laeng met a maysa nga oras manipud ditoy apartmentmi agingga iti trabahomi a pagnaenmi. Innem laeng nga oras ti obrami. Manipud iti alas nuebe iti bigat agingga iti alas tres iti malem.
Agtaksikami koma ngem masayangankami iti 10 a euro agpapan ken agawid. Nasurok a 500 a pisos no addan iti Filipinas.
Iti maysa a bigat, sinardengandakami dagiti pannakabagi ti linteg ta arig taray ti pannagnami. Ababotenmi ti oras. Sinitardakami. Kinompirmarda no pudno met laeng dagiti nailanad iti permit pass nga impakitami kadakuada. Inawaganda ti employer-mi. Kalpasanna, adu pay dagiti inaw-awaganda sakbay a pinalubosandakami.
Inan-anusanmi ti dandani dua a lawas a nagnagna a napan iti trabahomi. Nadlawko ketdi a limmag-an ti bagik. Adda imresan ti tianko.
Naiget ti turay iti panawen ti lockdown. No rummuarka, masapul nga iggemmo ti ID wenno passportmo ken nakaaramatka iti face mask. Iti man kalsada wenno iti bus. No awan ti ipakitam, agmultaka iti 150 a euro.
Uray dagiti nakakotse, no awan ti ipakitada a permit passes, alaenda ti lisensia. Agmultaka pay.
No inka iti supermarket, agurayka pay iti dua wenno tallo nga oras sakbay a makastrekka gapu iti kinaatiddog ti pila iti ruar. Malimitaduan ti sumrek. Uray met agdidinnalapuskayo kadagiti kakabagian wenno gagayyemmo iti uneg, kasla saankayo nga agaammo ta nakaabungotkayo met amin. Ti makapasiudot, no aguyekka la bassit, sikan ti kitkitaen dagiti tattao a kasla ketdin adda sakitmo.
Bayat ti lockdown, nagpuppupokkami lattan ken baket iti apartmentmi malaksid no inkami agobra wenno makitienda. Maiparit ti agpasiar no awan ti importante a rason.
Adu ketdi ti nasursuromi ken baket a panagluto iti kankanen. Kas koma iti siopao, pandesal, croissant ken dadduma pay. Naadalmi amin dagita iti internet.
Naruamkami a mapan makikaarruba kadagiti gagayyemmi a Pinoy no kasta a sardam. Ngem kadagitoy a tiempo, awanen ti kinnarrubaan. Kasla awanen ti agaam-ammo. Agpatingga lattan iti selpon ti panagsasarita.
Adda met dagiti kadaraan a nagsardeng ti trabahona gapu iti lockdown a nakaala iti ayuda manipud iti opisina ti OWWA. Nakaawat ti tunggal maysa kadakuada iti 180 a euro (katukad iti 200 a U.S. dollar).
Dandani dua a bulan ti lockdown ditoy Greece. Ininut a naglukat dagiti kapeteria ken restaurant iti bulan ti Hunio. Ngem manmano ti kustomer kadagita a tiempo ta agbutengda pay laeng gapu iti COVID-19.
Naglukat dagiti mall wenno shopping center iti bulan ti Hulio ket nailiwan dagiti tattao a nagpasiar kadagitoy a pasdek.
Arigna pagpiestaan met iti igid ti baybay iti Sabado ken Domingo a kasla awanen ti pandemia. Kapudotna ditoy iti Hulio ken Agosto.
Limmukay met ti aangsan ta manmanon ti agusar iti face mask iti langlangalang malaksid laeng no sumrekka iti banko, groseria, ken drugstore.
Nairuamkami ketdi nga agsapsapo iti alkohol sakbay a rummuar ken sumrekkami iti apartmentmi. Adda latta disinfectant iti lamisaan iti abay ti ridawmi. Kasta met iti uneg ti luganmi.
Ngem iti bulan ti Septiembre, immadu ti kaso ti COVID-19 ditoy Greece gapu iti rason a panagpastrekda kadagiti turista.
Napartak a nagpangato dagiti kinapet daytoy pagbutbutngan a sakit ta kas kinuna ti Health Ministry, nasurok latta a sangaribu a pasiente ti maiserserrek iti ospital iti inaldaw.
Naitinnag la ket ngarud ti curfew manipud iti alas dose iti rabii agingga iti alas singko iti bigat.
Ket idi laeng Nobiembre 3, dimmegdeg ti danag ti publiko ta 2,646 ti bilang dagiti nagpositibo iti COVID-19 iti dayta nga aldaw laeng.
Gapu iti daytoy, inwaragawag ni Prime Minister Kyriakos Mitsotakis ti maikadua a lockdown a mangrugi iti Sabado (Nobiembre 7, 2020) ket agpaut agingga iti agtapos daytoy met laeng a bulan.
Kinuna ti Prime Minister a kas idi damo met laeng a lockdown ti masurot malaksid a silulukat dagiti eskuela iti kindergarten ken elementaria.
Ita ta sursuratek daytoy (Nobiembre 5) addan 46,892 a nagpositibo iti COVID-19 (a maidilig iti ag-390,000 iti Filipinas) ken 673 metten ti natay (mapan a 7,400 iti Filipinas) idinto a 9,989 ti naagasanen.
Ay, daytoy sinal-ot a COVID-19, binaliwanna a namimpinsan ti panagwerret ti lubong!—O