Di Kayat ti Asom ti Mangan?
AKAPADANAG met no ti asom a nabayagen a kadkaduam, kellaat a dina pulos kayat a ramanan ti intedmo a taraonna. Wenno ramananna laeng bassit.
No kastoy ti mapaliiw iti taraken nga aso, nasken nga ammuen tapno makaisayangkat iti pamuspusan.
Kuna ti dadduma nga awan ganas ti aso a mangan no dina maibus ti maited a kanenna a naibasar iti rekomendasion dagiti agar-aramid iti feeds.
Kinapudnona, kadawyan nga ad-adu ti kantidad ti irekrekomendar ti paktoria ngem ti pudno a kabaelan ti kaaduan a kanen dagiti aso.
Adda dagiti nasalun-at nga aso a makaibus iti manipud iti 60 agingga iti 70 a porsiento laeng ti taraon a nailanad iti etiketa.
Maibasbasar ngamin daytoy a kaadu iti rekomendasion ti kaaduan a taraken nga aso.
No ngarud mapukaw ti ganas ti taraken nga aso a mangan, nasken nga ikonsultar iti beterinario daytoy a panagbaliw ti galadna a mangan.
Adda dagiti aso a kasla awan epekto iti salun-atda wenno kasla saanda a mabisin uray no saanda a mangan iti sumagmano nga aldaw.
Nupay kasta, nasken pay laeng a paliiwen a naimbag tapno maaammuan no adda parikut daytoy a mainaig iti salun-atna.
Kas iti tao, adda met rason dagiti aso no apay a dida sagiden ti maited a kanenda.
No saggabassit ti kanen ti taraken nga aso, mabalin nga adda nalag-an laeng a sagubanitna. Malaksid iti saanna a pannangan, mabalin nga adda pay sabsabali a sintoma ti sakitna.
Mabalin met a saan a nakaro ti sakit ti saan a mangan nga aso ngem nasken pay laeng nga ipakaammo iti beterinario.
Mabalin a sintoma daytoy iti mangrugrugi pay laeng a nasakit a kas iti kanser, impeksion, parikut iti bekkel wenno dalem.
Saan pay a makakaan ti aso no adda sakit ti ngipenna. Nasken ngarud a kitaen no adda naadael, aglugadlugad a ngipen wenno sakit ti gugot a nasakit no mangan ti ayup.
Mapukaw pay ti aso ti ganasna a mangan no maineksionan iti bakuna. Kadawyan met ketdi nga apagbiit laeng daytoy.
Kasapulan ngamin a mabakunaan ti aso tapno mailiklik kadagiti nakaro a sakit.
Maysa pay a pakaigapuan ti pannakapukaw ti ganas ti aso a mangan no maikawa kalpasan ti pannakaibiahena.
Maulaw met dagiti maibiahe nga aso wenno no saanda a komportable iti baro a disso a sinangpetanda.
Adda pay dagiti aso a napili iti kanenda. Mabalin pay a dida kayat ti mangan no addada iti asideg ti kabutengda a sabali a tao wenno ayup.
Adda dagiti aso a dida kayat a sagiden ti kanenda no dida pagaayat ti malukong a nakaidasaran ti taraon a maited kadakuada.
Saan a kankanayon nga ipato a napili ti taraken nga aso iti makan no dina sagiden ti taraonna.
Nasken nga amirisen a nasayaat ti gapuna.—O