Maysa a Kalgaw iti New York
NAINAYAD ti eroplano a nagpababa iti runway ti La Guardia International Airport iti New York City. Makautoy ti sangapulo ket innem nga oras a biahe manipud Durban, South Africa, ngem magagaranak.
Timmamdagak iti tawa. Naipasabat kadagiti matak dagiti aglulumba a natatayag a pasdek iti Manhattan Island a kasla tumukno iti langit ken daydayasan itan ti anaraar ti apagtangkayag nga init.
Siak ti maysa kadagiti immuna a rimmuar iti eroplano ta first class ti tiketko. Bimmabaak iti umuna a kadsaaran ti terminal apaman a natimbrean ti immigration ti passport-ko. Guyguyodek ti maysa a maletak
a dinagasko iti custom, rimmuarak sa nagturongak iti pagurayan ti lugan. Nabang-aranak ta dandani awan ti pisipisan iti uneg ti terminal gapu iti kaadu ti tao. Iti sanguanan ti terminal, nakawesanen dagiti kaykayo iti berde ken kapusaksak dagiti sabsabong. Katengngaan ti kalgaw ita iti New York. Idi pumanawak, lamolamo dagiti kayo iti Autumn chills.
Nangpayapayak iti taksi. Nagpaitulodak iti hotel. Idi addaakon iti kuarto, nagdigosak. Nabannogak. Kayatko ti aginana.
Tumengngan ti aldaw idi makariingak. Bimmabaak iti hotel. Nangaldawak. Kalpasanna, tinurongko ti Scandinavian Seaman’s hall a kaapiring ti hotel.
“Simmangpetka gayamen,” nabara ti kablaaw ni Suen, ti dispatcher ken gayyemko.
“Visitors visa ti kaaddak ita ditoy.” “Congratulations,” insungbatna. “Namin-adun a simmarungkar ti gayyemmo a kaduam idi iti hotel. Damdamagenna no kaano a sumangpetka. Adda surat nga imbatina iti naudi nga isasarungkarna.” Maysa a sobre ti inyawatna.
Linukatak. Naggapu ken ni Diana. Adda telephone number-na iti surat. Inawagak a dagus. “Urayennak!” Mariknak ti ragsak iti timek ni Diana. Binay-ak a nakalukat ti ridaw ti kuarto.
NI Larry a gayyemko ken bartender ti night club ti nangyam-ammo kaniak ken ni Diana.
“Sika laeng ti ammok ken pagtalkak a taklinna bayat ti kaaddana iti siudad,” kinuna ni Larry.
Idi sumarungkarda ti kabigatanna, agur-urayakon. “Ni Diana,” panangyam-ammo ni Larry.
“It’s my pleasure to meet you.”
Nagalamanokami ken Diana. Natural beauty ti pintasna. Maitugotan iti nalibnos a rupana a di pay naparabawan iti krema ken napuskol a make-up.
Asul dagiti natimbukel ken naginnaddayo a matana. Narungsot ti damo a taldiapna ngem iti bumaybayag, naamo ken naemma. Napantok nga agong ken kasla kasugsugat dagiti bibigna. Sophisticated ken aristrokata. Lima kadapan ket pito a pulgada ti tayagna ken marisbalitok dagiti buokna. Inosente ken perpekto a kinapintas ti country girl.
Nagarapaapak. Daytoy san ti agdanko a makaragpat iti American dream, naitanamitimko.
Kinasao ni Larry ni Diana. “You trust me; trust him also. You live with him until you find a decent job and a place of your own.”
Nagpinnerrengkami ken Diana. Awan ti maitugotan a panagalumiim wenno panagkedkedna a maidenna iti arpadko. Mabalin a nabagaanen ni Larry iti mabalin a mapagtengna no agkallautang iti siudad.
“Please keep your belongings in the closet while I order two single beds,” kinunak idi nakapanawen ni Larry. Inyasidegko ti maletana iti closet.
Saan a nagbayag, dimteng ti mangyeg iti katre. Inruarna nga immuna ti double bed sa insimpana dagiti single bed iti agsumbangir a pader ti kuarto.
“The one on the right will be yours,” kinunak ken ni Diana.
Tinaliawnak. Immisem. Talaga a napintas ket maburburtiaannak no kasano a nagam-ammoda ken Larry ken no apay nga immannugot nga ibati ni Larry kaniak.
Napagtulaganmi ti agpasiar iti Manhattan kalpasan ti pangngaldaw. Addakamin iti subway, ti tren a mamagsisilpo kadagiti county ti New York City, idi agistoria ni Diana. Nadekketkami a nagtugaw.
Naggapu kano iti nasulinek a lugar idiay Ohio, iti nadam-eg ken nalawa a kataltalonan sadiay. Saanda a nabaknang. Hayskul laeng ti naturposna. Ngem no kalikagumanna ti agtuloy nga agbasa, mabalinna ti agaplikar iti government student subsidy, pautanganda iti pagbasana agingga a makaturpos iti kurso. Agbayadto no addan natalged a pagsapulanna. Iti sangapulo ket walo a tawenna, simminan iti pamiliana ket makaammo metten nga agbirok iti panggedanna. Agpagayamda ken Larry ken nasasao kanon ni Larry kenkuana. Nakitkitana kano payen ti ladawak.
Dimsaagkami idi agsardeng ti tren. Addakami iti maikatlo a plataporma iti baba ti estasion. Immulikami iti nalawa nga agdan.
Idi makaruarkami iti subway, naipasabat kadakami dagiti aglulumba ken agdidinnaer a nangangato a pasdek a nakalupkopan iti pasig a tinted glass, a kabaruanan a disenio ken maris. Adda asul, derosas, diamante, balitok, ken perlas a makasisirap ken makarayrayray ngem nalamiis a kitaen. Linasatmi ti nalawa a Times Square. Tumuyutoy dagiti tao nga agpalpallailang ken magmagna kadagiti marmol a dalan. Iti kanawan ti nalawa a Fifth Avenue, agdidinnaer dagiti dadakkel a banko, komersio kada negosio a manggamgamulo ken mangidikdiktar iti ekonomia ti agdama. Iti met kanigid a Fashion Emporium, agsasaruno dagiti paglakuan kadagiti kabaruanan a kawes, sapatos alahas, ken bangbanglo.
Simrekami iti Christian Dior. Simmabat ti nailangitan nga ayamuom. Nagandap dagiti rumimatrimat a diamante, balitok, perlas ken dadduma pay nga alahas ken relo a tagilako. Dagitoy ti mangkayaw iti balasang uray pay nataengan. Nagsaludsodkami iti saleslady. Insungona kadakami ti akinlikud a paset ti nangayed a pagtagilakuan.
Pinagsinnublatnakami a minatmatan ti manager.
Idi maibagami ti gagarami, pinagtakderna ni Diana iti sangona. Naannad dagiti matana a mangmingmingming iti pakabuklan ni Diana kabayatan ti pananglawna ken ni Diana. “Mapankayo iti modeling school a kaabay daytoy a pagtagilakuan,” kinuna ti manager.
Isu ti inaramidmi. Simrekkami iti Modeling School. Pinastrekda ni Diana iti intercom idinto a nagurayak iti waiting room. Nagbasaak iti magasin. Rimmuar ni Diana. Tallo nga oras a na-mental ken physical exam ngem langana ti maragsakan. Naipasana kano ti eksamen ket mangrugi nga ageskuela iti kabigatanna.
Rimmuarkami. Nakilangenkami kadagiti tumuyutoy a
Amkenna a mapukawnanto inton panawen a dinan kabaelan nga isina iti imatangna.