Biag ni Ilokano
SAKBAY ti dekada sisenta iti napalabas a siglo, saan a mapalpalubosan dagiti babbalasang a rummuar wenno mapan kadagiti publiko a lugar no awan kaduada a nataengan a babai. Aw-awagan dagiti nataengan nga Ilokano daytoy a mangkadkadua iti maysa a balasang iti tsaperon, kadkadua, wenno guardia.
Saan a mapalubosan ti balasang a mapan makitienda no awan ti pakikuyoganna a baket wenno babai a natataeng ngem isuna a kabagian wenno kaarrubada.
Kasta met laeng no mapan makisala ti balasang. Kadawyan a ti pay ket amana ti mangkuyog iti papananna a pakisalaan.
No makisinnarak ti balasang iti kaayan-ayatna, adda latta umas-assibay a sabali a tao a natataeng ngem isuna.
Kadawyan a natataeng a babai a naasawaan wenno saan ti kadkadua. Saan a maipalubos a kataeb wenno kasingedna ti kaduana ta maipato a mabalin nga agkomplotda.
Nasken pay nga estrikto ti kadkadua ket daytoy ti masurot kadagiti bambanag a nasken nga aramiden ti balasang. Iti panagbuya iti sine, agtugaw pay daytoy iti nagbaetan ti balasang ken ti kaayanayatna.
Saan ngarud a maikkan dagiti agayan-ayat iti gundaway nga aginnagek, aginnabrasa wenno aginniggem la koma iti ima.
No awan a pulos ti mangkadua iti balasang a rummuar ket kasapulan la unay, mabalin met a dagiti naububing a kakabsatna ngem manmano la a maaramid daytoy.
Mabilin a naimbag no ania ti aramiden ti naub-ubing a kadkadua.
Kadagidi a panawen, napateg unay ti dayaw kadagiti babbalasang ken uray pay kadagiti babbaro.
Saan a maipalubos nga agaramid dagiti babbaro ken babbalasang iti pribado nga ar-aramiden laeng dagiti agassawa.
Maysa a pannakaibabain iti maysa a pamilia, kakabagian ken uray kadagiti gagayyem ti maysa a babai a saan a mangikankano iti kinapateg ti dayaw. Kadagiti nagkakauna nga Ilokano, naisangrat laeng ti seksual nga aramid no nakapagkasaren ti lalaki ken babai.
No saanda pay a napakapagkasar, nasken nga awan maaramid dagiti agayan-ayat a panagkanaig iti ikamen. No kastoy, maitandudo ti nadalus a panagpampanunot, balikas ken tigtignay ti balasang kadagiti nainlubongan a bambanag.
Nailunglungalong ngarud kadagidi a panawen ti pannakasalaknib dagiti babbalasang kadagiti seksual a pagteng.
Nagbalin pay daytoy a tagipatgen a mangipalagip kadagiti babbalasang a raemenda ti bukodda a bagi.
No raemenda ti bukodda a bagi, kayatna a sawen a raemenda met ti Namarsua a nangipaulog kadagiti pammilin iti kinadalus ti bagi ken kararua.—O