Ti Puga (36)
Ti Napalabas: Kayat ni Agent Fleming nga isukat ni Rudy ken ni Agent Stewart ngem di immannugot ni John ket pinaltoganna ti luppo ni Rudy. Rinaut da John ti safehouse a nangilemmenganda ken ni Rudy. Insakripiso ni Agent Stewart ti bagina ngem napatayna ni Agent Fleming. Nastrek met da Melanie ti parambak ni Roberto Guerrero ket napatayna daytoy. Naalana ti panagtalek ni Archie Castellano. Isu ti maysa a pinusgan daytoy a mangiserrek iti kargamento da Mr. Aleksandr. Kayat ni Melanie a maammuan ni kinatao ni Pablo ket limed nga innalada ti baso nga inusar daytoy. Pinabettak da John ti cottage a sinerrek ti strike team ti CIA. Naalada pay ni Mr. Hutchison ngem naipasuli ida da Sekretario Sandoval. Pinalubosanda ida ngem inikkanda laeng ida iti 24 nga oras a wayawaya. Naamiris ni John a kasapulanna ti tulong ti Al-Sujud Brotherhood ket inawaganna ni Sgt. Ramirez.
“Kill him!” imbilin ni Melanie idi mangngegna ti timek ti patpaturongan ni Agent Schummer iti paltog.
(Maika-36 a Paset)
NAKAPARPARDAS dagiti pasamak. Apaman a naibaltog ni John ti lalaki, sinakayanna a dagus daytoy. Immegmegna ti tengnged daytoy. Nagtulakak ti lalaki. Nagkayaw-at ta agpilit a rumuk-at ngem napigsa ni John. Intumengna ti bakrang ti lalaki sa linayatanna iti danog. Ngem napaspas ti lalaki a nangisarapa kadagiti takiagna. Sa sinanggol daytoy ti ima ni John. Nagpinnigsada. Ngem napimpintas ti plastar ni John ket iti apagbiit, saanen a makakuti ti lalaki iti panangpandagna.
“Who the hell are you?” sinaludsod ni John.
“Damn...” limmulok a dagus ti lalaki.
Naklaat ni John a nakangngeg iti timek ti lalaki. “R-Ricky?” kinunana. “What the f__k are you doing here?” Rinuk-atanna ti gayyemna.
Nagmurareg ni Ricky. “You told me to come... and so I came!”
Timmakder ni John. Inyawatna ti dakulapna ken ni Sgt. Ricky Ramirez. Binatakna tapno nalaklaka a makatakder. “I didn’t tell you to come. Kunak a mapanka idiay Mexico!”
“Makonsiensiak a mangbaybay-a kenka, captain. We are still the Al-Sujud Brotherhood. Wenno nalipatamon?”
Immanges iti nauneg ni John. Malagipna la ket ngarud dagiti simminan a kameng ti Al-Sujud brotherhood: da Col. Davis ken MSgt. Pratt. Ni Sgt. Cortez, di pay nakariing iti pannaka-coma-na. Duduadan a nabati ken Sgt. Ramirez. Insapatada iti tunggal maysa a no agpeggad ti maysa kadakuada, agtinnulongda.
Immanges manen iti nauneg ni John. “Naim-imbag koma no napanmo kinita dagiti agiinam...”
“Come on, John... Let’s get this behind us... We have a lot of stuff to do.” Napasardeng ni Sgt. Ramirez idi madlawna nga adda kadua ni John.
Nadlaw a dagus ni John ti panangbigbig ni Sgt. Ramirez ken ni Rudy. “Gayyemko... ni Rudy. Intel Analyst ken kinaduak idiay Filipinas...” Nagbaw-ing ken ni Rudy. “Rudy, ni Ricky Ramirez.”
Nagdinnakulap da Ricky ken Rudy.
“Nice to meet you Ricky...” kinuna ni Rudy.
“Nice to meet you too,” insungbat ni Ricky. “Filipino?” “What do you think... Mexican?” Nagkusipet dagiti mata ni John.
“He looks like one...” Napaisem ti sarhento.
“We look alike,” innayon ni Rudy sa nagkatawa. “Siempre, agpada nga inturayan ti Espania ti Filipinas ken Mexico... Ammomon,” kinuna ni Ricky. “But enough of that... Do we have any plan?”
“Yes, but it’s dangerous...” insungbat ni John.
“That’s our name, saan kadi?” inyangaw ni Ricky. Nagtung-ed ni John. “But we have to do it... so we can have an advantage...”
“Okay, I’m listening.”
“I am, too...” kinuna met ni Rudy.
“We have to bug the Secretary’s residence...”
“Ni Secretary Sandoval?” Napamulagat ni Rudy. Nagkatawa met ni Sgt. Ramirez. “Ammom no kasano ti kinaiget ti seguridad ti pagtaengan ti Sekretario? Nakitakon ngem saanak pay a simrek. Pinasiim idi ni Mr. Bosworth.” “Ngem mabalin a mastrek, saan?” kinuna ni John. “Awan ti imposible. Ngem napeggad.” “Masapul nga aramidentayo. Ta no saan, nalpastayon. Adda atapko nga adda pay sabali a gapu a pannakainaig ti Sekretario. Isu a masapul nga agkutitayon inton rabii.”
NAINAYAD ti yaasidegda iti gate ti guard shack iti eksklusibo a subdibision. Ni Rudy ti nagmaneho, adda iti passenger side ni John. Ni Sgt. Ramirez, nakapueston iti maysa a turod a mangtantannawag iti pagtaengan ni Secretary Sandoval. Nakaplastar metten ti nabileg a riplena ket nakasagana a mangtumba iti asino man a pagpeggadan ni John.
Insagana ni John ti Glock .40-na apaman a makaasidegda iti gate. Dua ti pagserkan iti subdibision: maysa ti para kadagiti agnaed, maysa ti para kadagiti sangsangaili. Ngem adda ikutda nga emergency access control a kas kadagiti us-usaren dagiti first responder no sumrekda kadagiti gated community.
Impis-it ni John ti remote control ket nakitana ti ininut a panaglukat ti gate. Kinitana ti naka-focus a kamera iti plate number ti luganda. Saanda a matrace dayta a plaka ta kukua ti CIA.
Imbaba ni Rudy ti sarming iti batogna. Kasta met ti inaramid ni John. Idi makabatogda iti gate, dua a kamera ti naggilap. Maysa a para ken ni Rudy, sabali ti para ken ni John. Agturong dagiti ladawanda iti computer iti uneg ti guard shack. Mai-process dagiti ladawanda tapno maammuanda ti kinaasinoda. Saan laeng nga ammo ni John no kasano ti kapaspas dagitoy a mangammo iti pudno a kinasinoda. Ngem gapu iti koneksionda iti CIA, marigatan dagitoy a mangammo iti kinataoda ta aglasatda iti sumagmamano a protective layer a security. Naimulanton ni John dagiti bugging device apaman a makaalada iti impormasion mainaig kadakuada.
Nakalasatda iti guard shack nga awan ti problema. Nagturongda iti kalsada a pagnaedan ni Mr. Sandoval. Linabsanda ti pagtaengan sa nagsardengda iti pangadaywen bassit tapno saanda ida a madlaw. Nagsardengda iti sirok ti dakkel a kayo.
Saan a dagus a dimsaag ni John. Pinaliiwda ti aglawlaw. Kayatda ti makasigurado nga awanen ti tao iti kalsada. Iti bangir ti kalsada, adda maysa a lakay a magmagna a mangguyguyod iti asona. Nalabit nga agpatakki wenno agpaisbo. Sinisiimda ti lakay agingga iti simrek iti maysa a balay. Awanen ti sabali pay a makitada a tao iti kalsada. Kadagiti balbalay, nakapatayen dagiti
silaw.
Ginaw-at ni John ti bassit a backpack iti likud ti lugan sa inkabilna iti likudna. Tsinekna ti relona: kinse minuto sakbay nga agalas dose. Imbilinna ken ni Rudy nga i-synchronize-na ti orasna. Nagtungpal met daytoy.
“Eagle to Alpha, can you hear me?” inradio ni John ken ni Ricky.
“Loud and clear, Eagle... In position and ready when you are...” insungbat ni Sgt. Ramirez.
“10-4, Alpha... I just need you to synchronize your time with me... Right now it’s 2346 hours.” “Copy that, Eagle... Set...”
“I’m going in. And if I’m not back in 30 minutes... just get out of this compound... Pick up Alpha and go away as far as you guys can...”
Nagkusipet dagti mata ni Rudy. “Excuse me?”
“We are not leaving you, captain... Uray ania ti mapaspasamak, urayendaka,” kinuna ni Sgt. Ramirez. “That’s an order, do you copy?” Nagulimek ni Sgt. Ramirez. Saan metten a nakauni ni Rudy.
“Alpha, did you copy?” inulit ni John.
“That’s 10-4, captain...” Nalab-ay ti timek ni Sgt. Ramirez.
“It’s 2347 hours... if I’m not back at 0017 hours, you have to get out of this place... is that clear?”
“Loud and clear, captain,” insungbat ni Sgt. Ramirez.
Inasut ni John dagiti dua a nakasilencer a paltogna a Glock .40. Kinitana dagiti magasin dagitoy. Agpada a sipupunno iti bala. Adda pay uppat a magasin iti backpack. Insalikadna dagiti paltog. Inruarna manipud iti backpack ti nangisit a maskarana sa insuotna. Kalpasanna, inkallugongna ti hood ti nangisit met laeng a sweatshirt-na. Insimpana met ti nairut a bulletproof vest nga inarpawan ti kumepkep a badona.
“Agsiputka... ken agannadka,” kinunana ken ni Rudy.
“Roger that, Eagle...” insungbat ni Rudy. “Good luck and be very careful...”
Naminsan pay nga impalawlaw ni John ti panagkitana iti ruar. Awanen ti matagtagitao. Nakaul-ulimek.
Siaannad a dimsaag. Inananatna ti nangirikep iti ridaw ti
lugan tapno saan a makapataud iti ringgor a mabalin a pakadlawanda iti kaaddada. Nagsiim manen, sa sipapardas a nagturong iti pagtaengan a linakub ti nangato a pader.
“SIERRA to base ops... status...” inradio ni Agent Schummer. Itay pay a nakaul-ulimek iti nagpuestuanna iti linged dagiti natatayag a mula iti asideg ti pader ti pagtaengan ni Sekretario Sandoval. Matektekanen a mangur-uray iti bilin ti base ops a mangtimtimon iti naipatayab a drone a mangwanawan iti uneg ti inaladan ti pagtaengan. Ti plano, lagtuenna ti pader. Ngem addan report nga adda maysa a guardia iti lugar a nairanta a pagdissuanna. Ket ur-urayenna ti signal iti base ops.
“Hold on, Sierra... still not clear to jump...”
Napaanges iti nauneg ni Agent Schummer. Agmaymaysa iti daytoy nga operasion. Ti laeng drone ti kaduana. Bentahe laeng ta makita ti drone ti adu a paset ti pagtaengan. Nakaptan pay daytoy iti automatiko a paltog a kontrolen ti base ops. No adda pagpeggadanna, ti drone ti mismo a mangpatay iti daytoy.
“Base Ops to Sierra, lone guard is about to move... get ready...” “Copy that, Base Ops...”
Inruar ni Agent Schummer ti pangatiddogen a sarukodna. Maysa daytoy a lightweight telescopic cane. Pinaatiddogna agingga iti nagbalin a mamindua iti tayagna. Aramatenna daytoy a tekken a lumagto iti inaladan. Nakisalsalip iti pole vault idi adda iti kolehio. Malagtona ti nasurok a mamindua iti tayagna.
Tiningitingna ti backpack iti likudanna. Iti dagsen daytoy, kabaelanna nga ilagto. Naglaon ti backpack kadagiti imulana a bugging devices iti pagtaengan ni Sec. Sandoval. Ti problemana, ti bulletproof vest-na a nangpadagsen kenkuana. Nagpanunot no ibatinan dagiti dua a paltogna ken ti imukona. Saanna a kasapulan dagitoy. Dina kayat nga adda matay a guardia ti Sekretario ta dina kayat nga agatapda nga adda tao a nakastrek. Ngem amangan laeng. Dina ammo no kasapulannanto met laeng. Ikarigatanna laengen nga ilagto.
“Base Ops to Sierra, are you ready...”
“10-4, Base Ops...”
“In five seconds...”
Nagsagana ni Agent Schummer a tumaray.
“Ready...”
Iniggaman ti kanawanna ti asideg a murdong ti tekken, sa ti kanigidna sumagmamano a pie iti babaen ti kanawan. Tinangadna ti kangatuan a paset ti alad. Immanges iti nauneg.
“Go!”
Nagtaray iti napardas ket idi makaasideg iti alad, insugkitna ti tekken iti daga ket uray la a nabalungiad daytoy a nangkarga iti dagsenna ngem iti ilalagtona, imbakias daytoy nga impangato. Ngem gapu ngata iti dagsen ti bulletproof vest-na, nadiskarkulo iti ilalagtona ket naigirad ti backpack-na iti ngarab ti alad. Napukaw ti balansena ket nanabtuog iti daga.
CLANDESTINE CIA OPERATION CENTER, LOS ANGELES, CALIFORNIA. Nakalansa dagiti mata ni Melanie iti dakkel a monitor a pangbuybuyaanda ken ni Agent Schummer. Tengtenglenna ti angesna ta nakitana ti pannakaigirad ti bagi ni Agent Schummer iti alad ken ti pannakatinnag daytoy iti daga. Mangemkemkem. No madatngan ti guardia ni Agent Schummer iti kasta a kasasaad, sigurado a masaaw ti gandatda. Dumanon daytoy iti kangatuan a pagsaadan iti ahensia. Isuna ti akin-utek iti daytoy. Sigurado nga ikkatenda iti daytoy a mision.
In-zoom ti operator ti drone ti ladawan ni Agent Schummer. Saan nga aggargaraw ti ahente. Agmaymaysa, awan ti mang-rescue.
Naparasaw. “Venus to Sierra... Venus to Sierra, can you hear me, over...” inradiona.
Saan a simmungbat ni Agent Schummer. Saan latta met nga agkutkuti.
Liningay ni Melanie ti operator ti drone. “Wanawanam ti aglawlaw ti pagtaengan.”
Nagpangato ti drone, impalawlawna ti kamera.
Maysa a guardia ti agturong iti nakabaliktadan ni Agent Schummer!
Nagdanag ni Melanie. “Kasano ti kabayagna sa makadanon dayta a guardia iti yan ni Agent Schummer?” madanagan a nagsaludsod.
“A few minutes...”
“I want the exact minutes!” imbugkawna.
“Three minutes...”
Ad-addan ti panagrasaw ni Melanie. Imkis pay.
“We are armed. I can kill the guard,” kinuna ti piloto ti drone. “That’s not an option.”
“We will be compromised...” “There’s no other option... Your call, Miss Davis...”
Immanges iti nakaun-uneg ni Melanie. Kinemkemna dagiti bibigna. Biddut ti inaramidna. Inikkanna koma iti kadua ni Agent Schummer. Adda koma Plan B. Ngem nagtaltalek lattan a kabaelan ni Agent Schummer ti agmaymaysa a mangisayangkat iti mision.
Immadayo ni Melanie iti monitor. Dina kabaelan a kitaen ti yaasideg ti guardia iti nakaudatalan ni Agent
Schummer. Dina kayat a maimatangan ti panangpapatay wenno panangtiliwda iti daytoy.
“Miss Davis, one minute to compromise...”
Nagngayemngem. Ania ti aramidenna?
“Miss Davis...”
“We do not engage!” Nakapigpigsa ti bugkaw ni Melanie.
“We are not. But look at this. There’s another man on the scene... approaching behind the guard...”
Nakigtot ni Melanie. Nagturong iti yan ti monitor. Tinangadna daytoy. Nakitana ti maysa a lalaki a nakaaruat iti nangisit. Naka-hood. Nakain-inayad nga umas-asideg iti guardia manipud iti likud.
“Who the hell is that?” sinaludsodna.
Nagwingiwing ti operator. “No idea...”
“Zoom in...”
“Zooming in...”
Ngem uray agan-anoda, saanda a malasin ti lalaki. Rabii, uray no night vision a kamera ti nangi-focus iti daytoy, awan ti pamalpalatpatanda iti kinaasinona.
Salsaludsoden laengen ni Melanie iti bagina: kabusor wenno gayyem?
NAKAIN-INAYAD ni John a mangsarsaruno iti guardia. Inradio itay ni Sgt. Ramirez ti kaadda ti limmayaw iti alad ngem naigirad iti alad isu a nagturong iti disso nga imbaga ni Sgt. Ramirez. Kayatna nga ammuen ti mapaspasamak. Ngem madanagan ta amangan no iti panagusiosona, agkamtud ti orasna ket saanna a maileppas iti uneg ti tallopulo a minuto a mulaan iti bug ti pagtaengan ti Sekretario.
“Alpha to Eagle, status...” inradio manen ni Sgt. Ramirez. “Standby, Alpha... standby...”
Makitan ni John ti tao a naudatal iti daga. Naggunay daytoy ngem nangasuten ti guardia. Sakbay a maipaturong ti guardia ti paltog iti naudatal, nakaparpardas ni John nga immasideg. Inrakusna ti kanawanna iti tengnged ti guardia. Nagwasang daytoy, kayatna ti rumuk-at. Ngem ad-adda nga inet-etan ni John ti tengnged daytoy ket nagtulakak, agingga a nagsalungayngay. Saanna a pinatay ti guardia. Pinukawna laeng ti puot daytoy. Kayatna laeng a maammuan ti kinasiasino ti naudatal. Gapu ta padana nga agtarigagay a mangserrek iti balay ti Sekretario, dakkel ti pammatina a saanna a kabusor daytoy.
Nakain-inayad ni John a nangipaidda iti guardia. Saanna pay a naibbatan, kellaat a naggunay ti naudatal. Timmakder ket nakaparpardas a nangasut iti paltogna sa impaturongna ken ni John. “Easy... easy... I’m not your enemy,” inyampara ni John.
“Who the hell are you?” sinaludsod ni Agent Schummer.
“None of your business,” natibker ti timek ni John. Awanan iti panagbuteng.
“Raise your hand,” imbilin ni Agent Schummer. Nagwingiwing ni John. “Inispalko ti biagmo... no kayatnak a paltogan, aramidem. Ngem dimo mauray nga ingatok dagiti imak.” Immaddang nga umasideg ken ni Agent Schummer.
Marurod ni Agent Schummer, ngem pudno ti kuna ti lalaki. Insalakan daytoy iti guardia. Naikompromiso koman ti misionda. Ti pakasdaawanna, patpaturonganna daytoy iti paltog ngem umasideg met latta kenkuana. Paltoganna ngata?
“I said, raise your hand... and stop moving,” imbilin manen ni Agent Schummer.
Ngem kaskasdi a saan a dimngeg ni John. Intuloyna ti umasideg. “Sierra to base ops... any voice identification?” inradio ni Agent Schummer.
Awan ti simmungbat.
“Base ops, please advise...”
“Kill him!” nakatangtangken ti boses ni Melanie a simmungbat.
Ngem nakaasidegen ni John ken ni Agent Schummer. Kellaat a ginammatanna ti paltog ti ahente. Tiniritirna daytoy a kasla ubing laeng ni Agent Schummer nga inagawanna iti ay-ayam. Impaturongna ti paltog iti ahente.
“Ita, siak met ti agsaludsod. Asinoka... ken ania ti ar-aramidem ditoy?” kinuna ni John.
Manipud iti earpiece, nabatad a nangngeg ni Agent Schummer ti bilin ni Melanie: “Give that radio to that son of a bitch...”
Naklaat ni Agent Schummer ngem kinunana, “My boss wanna talk to you.”
Inseniasna ti radio.
Nagtung-ed ni John ket inikkat ni Agent Schummer ti earpiece-na sa inyawatna ken ni John. Inkabil met a dagus ni John iti lapayagna.
“Leave my man alone,” nakatangtangken ti boses ni Melanie.
Nakigtot ni John. Nalasinna a dagus ti boses. Nagtigerger ket awan lattan ti sumngaw a balikasna.
“I have a drone hovering above you... its sight set on you... One order and they are ready to pull the trigger if you don’t give back that gun to my man.”
“Come on, M-Melanie,” arintigergeren ti boses ni John a nangbalikas iti dayta a nagan. Dakkel ti basolna iti dayta a babai. Ammona ti gura daytoy kenkuana. Nakasagana daytoy a mangpapatay kenkuana iti napalaus a gurana kenkuana.
“Nangngegnak?”
Immanges iti nauneg ni John. “Melanie, no talaga a kayatnak a patayen, itay pay nga imbilinmo ti panangparutpot ti drone kaniak.” Sa innayonna, “Ngem no pudno a kabaelam, nawayaka a mangaramid...” “Bibiangam ti misionko!”
“Saan a siak ti bumibiang, sika...”
Sige, bay-annakamin... No saan, ipakaammok iti ahensia ti yanmo. Ammok nga an-anupendaka.”
“Ta patiem met dagiti ipabpabasolda kaniak?”
”Ti ahensia ken dua a departamento ti gobierno, ti State Department ken ti Department of Defense, ti mangpabpabasol kenka. Asino koma ti patiek?” “Agul-ulbodda. In-set up-dak...”
Nagkatawa ni Melanie. “Kas ken ni Gloria a nanggargari kenka ket isu ti akimbasol?”
Nangaremkem ni John. “Pulos a saanko a pinagrason dayta... Inawatko a nagbasolak. Dimmawatak iti pammakawan...”
“Wen, dimmawatka... kalpasan a minulitam ti panagtalekko kenka.”
“Alpha to Eagle, what’s going on?” agsalsaludsod ni Sgt. Ramirez.
“Agbilangak iti tallo... No dimo isubli dayta paltog, mapilitanak a mangibilin iti pannakapaltogmo...” imballaag ni Melanie.
“Ta pagarupem a mabutengak?”
“F__k you, John Villa! Iti uray kaano man, natangken latta ti ulom. I have a misson to finish, let us do it... One...”
“I also have a mission to accomplish... I am trying to clear up my name... and if I die because of that... so be it...” “Two...”
“Alpha to Eagle... a group of five men approaching towards your location... Abort the mission... abort the mission, do you copy...”
Naparasaw ni John.
“You give me no choice, John...” Ket imbilin ni Melanie iti drone pilot ti panagpaltogna ken ni John. Pagam-ammuan, nalayus iti lawag ti inaladan ti pagtaengan ti Sekretario. Agpada a naklaat da Agent Schummer ken John. Nakaparpardas ni John a nangibato iti paltog ken ni Agent Schummer. Kinagiddan dayta ti panagparakapak dagiti igam dagiti lima nga umas-asideg kadakuada. (Maituloyto)