Saludsodem ken ni Apo Hues
SALUDSOD:
Adda kaarrubami a ti balayna, adda iti likudan ti balay ken solarmi. Idi agaladkamin, nagpakpakaasi nga ikkanmi iti pagnaanna a sumrek iti dagana. Inikkanmi iti 2 a metro ti kaakikidna a pagnaan. Isu nga insingayanmi iti 40 a metro kuadrado iti lotemi isu a ti lotemi a dati nga aglawa iti 300 a metro kuadrado, nagbalin laengen a 260 a metro kuadrado.
Itay nabiit, nakagatang iti lugan daytoy kaarrubami ket kayatna a doblienmi ti alaenna iti lotemi tapno adda pagnaan ti luganna. Nagkedkedkami ta di pay ket agbalin laengen a 220 a metro kuadrado ti lotemi. Maysa pay, idi intedmi daydi immuna a 40 a metro kuadrado, awan abangna; lalo pay a dida binayadan. Iti sabali a pannao, libre.
Ngem indatagda iti Lupon ti kiddawda. Ket idi agsasaritakami idiay Lupon ket kuna ti Lupon nga adda karbengan ti agtagikua iti akin-uneg a lote ti maaddaan iti pagserkan, binigbigmi ti pangngeddeng ti Lupon ngem innayonmi a no ikkanmi manen ida iti sabali a 40 a metro kuadrado, nasken a bayadanda daytoy agraman daydi intedmi nga immuna tangay ammomi met nga adda kuartada. Binaloranmi ti 80 a metro kuadrado iti PHP80,000.
Ngem nagkedked daytoy kaarrubami, Apo Hues. Dida kayat ti agbayad. Mapanda kanon iti korte.
Apo Hues, kasano daytoy kasasaadmi? Adda kadi pangabakmi? Dimi la ketdi itulok nga alaenda lattan a libre ti 80 a metro kuadrado iti lotemi.—Pidong ti Nueva Vizcaya
SUNGBAT:
Segun iti Artikulo 655 ti Kodigo Sibil ti Filipinas, kunana a no ti maysa a sanikua a daga wenno balay ket adda ti likud ti maysa a solar, ti akinsolar iti sango, rebbengna nga ikkanna iti pagserkan wenno pagnaan ti akin-uneg a balay ken daga iti kalalainganna a kalawa ken saanna a dadaelen ti postura ti daga. No ikkan ti akinsango ti akinlikud, masapul a ti akinlikud bayadanna ti balor ti daga ken ti alad a mabagbag, no adda man.
Idi maysaak pay a hues, adda kaso a kasta. ‘Diay akinlikud, dumawat iti karbengan a pagnaan (right of way) iti nayon a dua a metro a kalawa. Ngem idi agkiddaw, diak pinatgan ta awan pay met luganda.
Ngem ti maysa a kaso, gapu ta adayo ti dalan a pagkurbaan a sumrek iti solarda, inaprobarak ti right of way nga uppat a metro ken bayadanda ti ti daga a maalada iti agdama a balorna malaksid nga isuda ti agbayad iti pannakatarimaan ti alad a madadael.
Isu a ti bagiyo, masapul nga bayadanda ti maalada a daga ken pati balor ti aladyo no kas pagarigan sementado. Sa laeng maited kenkuana ti right of way no matungpal daytoy nga inkeddeng ti korte. Adda kadakayo ti linteg. Ta kuna pay ti Konstitusion ti Filipinas a saan maala ti daga ti maysa a tao no awan bayadna.—O