Ading Kosinera
PADASENTAYO man met ti agaramid iti embutido, kas isursuro dagiti food technologists iti College of Industrial Technology (CIT) ken College of Aquatic sciences and Applied Technology (CASAT) ti Mariano Marcos State University a da Ms. Judelyn Mandac ken Ms. Carmencita Saladino kadagiti agad-adal iti School-on-the-Air ken iti Balik Probinsiya, Bagong Pag-asa Program ti gobierno nga inawagan met ti Deployment of Agri-Fishery Enterprise Models/Modules for Balik-Probinsiya Program.
Dagiti Kasapulan:
1 kilo, nagiling a karne ti baboy 2 bukel nga itlog
½ tasa a gatas ebaporada ½ tasa a bread crumbs
½ kutsarita a puraw a pimienta ¼ kutsarita nga asin
½ tasa a keso
2 kutsara nga oyster sauce
1 kutsara nga asukar 2 kutsara a cornstarch 1/8 tasa a ketchup
3 bukel a carrots
1 bukel a sibuyas 5 kangipen a bawang 1 pedaso a bell pepper ½ tasa a raisins
2 kutsara a pickles
Panangisagana:
1. Paglalaoken ti itlog, gatas ebaporada, bread crumbs, cornstarch,
pepper, asin, asukar, cheese, oyster sauce ken ketchup iti maysa a malukong.
2. Inayon ti nagiling a karne, natadtad a carrots, sili, nadekdek a bawang, natadtad a sibuyas, raisins, ken pickles. Paglalaoken a nasayaat.
3. Ikabil iti refrigerator iti 30 a minuto.
4. Isagana dagiti alumninum foil, ‘tay maipalaon ti ½ tasa a mixture.
5. Ikabil ti kagudua ti tasa iti foil. I-flat daytoy, kalpasanna, i-roll ken ipuligos ti agpada nga igidna tapno marikepan a nasayaat.
6. Ikabil dagiti nabungon a mixture iti steamer ket lutuen iti 45 a minuto agingga’t 1 nga oras.
(Ipalagipmi a no padasenyo ti agaramid, agbatay kadakayo ti templa ti aramidenyo. Isu a mabalinyo a nayonan wenno kissayan dagiti ramenna.)
MAYSA kadagiti resipiente ti Deployment of AgriFishery Enterprise Models/Modules for BalikProbinsiya Program ti MMSU iti pannakitinnulong ti gobierno lokal ti ilina ni Cherry Ann Saludez, 25, ti Brgy. Pias Norte, Currimao, Ilocos Norte. Dati a Sales Associate ti maysa a beauty product, nagawid ni Cherry Ann iti ilina manipud iti Metro Manila. Nagatendar ni Cherry Ann iti project briefing ken MOA signing idi Hunio 22 iti MMSU. Kalpasan ti panagsanayna, inrugina ti nagproseso iti siomai ken embutido. Iti pannakasursurat daytoy, kunana nga addada metten aggatang kadagiti produktona.—O