Idi Un-unana a Panawen
IDI un-unana a panawen, iti maysa a lugar idiay pagilian nga India, adda maysa a mannalon a nupay ipanna amin a kinagagetna, bassit latta ti maa-apitna. Iti maysa nga aldaw a kaaddana iti bangkagna, nakitana a simrek ti maysa a dakkel a kobra iti abut iti igid ti bangkag. Daytoy a mannalon, a mamati a maysa la ketdi a didiosen ti nasao a kobra, nangidaton iti sangamalukong a gatas iti ruangan ti abut iti maysa a bigat nga ipapanna iti bangkagna. Iti sumuno a bigat, awanen ti gatas ngem adda balitok a kas kadakkel ti bukel ti patani iti ruangan ti abut.
“Agyamanak, O didiosen, iti sagutmo kaniak!” indaydayaw ti mannalon ta ammonan a sinubadan ti kobra ti indatonna a gatas. Napalalo a ragsakna ta uray pay bassitto latta ti maap-apitna, addanton igatangna iti abastoda ken ti kabbalayna nga anakna a lalaki.
Inyawidna ti balitok ket idi makita ti anakna daytoy, sinaludsodna no nangalaan ti amana.
Inistoria ti mannalon ti maipanggep iti kobra ket ti anak a lalaki, a sineknan ti napalalo a kinaagum, nakunana iti panunotna: “Apay a nasken a datonan pay ni ama iti gatas daydiay a kobra? Kaliek laengen ti aponna ta patayekon ken alaekon dagiti ilemlemmengna a gameng! Saankamton nga agrigat pay. Mapankaminton agnaed iti siudad!”
Kasta ngarud ti inaramid ti anak ti mannalon. Idi makitana ti kobra iti kinalina nga abut daytoy, pinangorna ti ulo daytoy. Ngem saan a napuruan ti kobra ket iti ibabalesna, natukkawanna ti takiag ti anak ti mannalon, a nakatayan daytoy.
Anian a ladingit ti mannalon iti napasamak. Ta ipatpategna unay ti anakna.
Nupay kasta, kinuna ti mannalon iti kobra: “Agtultuloy koma ti panaggayyemta; datonanka latta koma iti sangamalukong a gatas iti tunggal bigat ket agyamanak unay no paraburannak met latta iti sangatipping a balitokmo.”
“Saanen a mabalin nga aggayyemta pay,” kinuna ti kobra. “Kasano a malipatak ti naaramid kaniak, ken kasano a malipatam ti inaramidko iti patpatgem nga anakmo? Agsinatan ket iti kaano man, dinakton makita pay.”
Awanen ti naaramidan ti mannalon di ti nanglagidaw iti anakna iti kinaagum daytoy.—O