Ti Gasatmo
LEO (Hulio 21- Agosto 20). Manamnama ti pannakaisubli ti alibtak sakbay a dimteng ti angol. Panangirusat kadagiti idea a nabayagen a paspasmokmo ti mangparnuay iti adu a maaramidam. Umdas a pannangan sa adda pamedped iti baet dagitoy ti mangtulong kenka tapno maiturongmo a naimbag ti imatangmo kadagiti aramidem. Nagasat a numero: 3, 5, 9.
VIRGO (Agosto 21- Septiembre 22). Kamaudiananna, addaanka met laengen iti kired ti nakem a mangibanag kadagiti planom. Dakkel ti maitulong ti panangpaadum kadagiti am-ammom iti kallabes. Iggemmo itan ti bola. No puntiriam ni balligi, adda kenka a mangsirig ken mangtiro. Nagasat a numero: 1, 4, 8.
LIBRA (Septiembre 23- Oktubre 22). Mawagwag dagiti dudukot, marittuok ni laladut a nangigawid kenka iti kallabes tapno agbalin a produktibo. No ipalubos dagiti pagalagadan wenno babaen ti tulong ti teknolohia, makatulong iti panangrugim ti inspirasion dagiti napateg kenka a tattao. Pakaragsakanda ti panagdawatmo iti tulong. Nagasat a numero: 2, 6, 9.
SCORPIO (Oktubre 23- Nobiembre 22). Iti panagriknam, dandanin agapitka kadagiti bunga ti nagbannogam iti kallabes. Panagannad laeng ti mangpaluom iti balligi. Pudno a positibo ti enerhia ken ti aura. Ngem awan kas iti agannad a kunada. Agtalekka ketdi iti agus dagiti pasamak. Nagasat a numero: 3, 5, 8.
SAGITTARIUS (Nobiembre 23Disiembre 20). Ti pannakatakuatmo iti naidumduma a wagas tapno maipeksa ti kinaartisano ti nangipaay kenka iti naidumduma met a panagtalek iti bukod a kabaelan. No kitkitaem dagiti mapaspasamak, iti laksid ti parikut ti sabali a tattao, makomkombinsirka a pudno, adda tiempo a malpas ti ania man a problema. Nagasat a numero: 1, 4, 7.
CAPRICORN (Disiembre 21- Enero 19). Ti pammatalged tapno yakarmo ti maysa nga impormasion ket no makatulong wenno saan daytoy iti kaaduan. Pudno a makatulong met ti panagulimek ngem natalged no kua dagiti ulimek no adda dagiti mangitandudo iti kinapudno. Adda kenka nga agpili no ania a grupo ita ti kappengam—agpada met ketdi nga umisu, segun iti agdama a tiempo. Nagasat a numero: 2, 5, 8.
AQUARIUS (Enero 20- Pebrero 19).
Adda dagiti pagilasinan ken pasamak iti napalabas a dua a lawas a pagbasaram no nakasaganaka a mangparungbo pay iti ayan-ayat. Pagimbaganna, ayan-ayat ti mangparparegta kenka. No bilang man adda dumteng a kuddot ni upay, daytoy ket gapu ta tunggal tao, addaan iti kabukbukodan a rikna ken wayawaya. Ken laglagipem, adda naisangrat nga ayat para iti tunggal maysa. Nagasat a numero: 3, 4, 9.
PISCES (Pebrero 20- Marso 20). Mangrugi ti panangtun-oy iti kalkalikagumam babaen ti panangarisit kadagiti madadaan a ramitmo nga usarem iti panagtun-oy. Adu dagiti masapul nga aramidem. Pagimbaganna, adu met ti madadaan a tumulong kenka basta dumawatka iti tulong. Naparpartak ketdi ti panagdaliasatmo no natanang agpapan pay naginad dagiti addang. Nagasat a numero: 1, 5, 7.
ARIES (Marso 21- Abril 20). Tiempo ti panangikalawa iti am-ammo babaen ti tulong ti teknolohia wenno social media. Adda dagiti naibbetam a naririmat nga idea tapno makaganar ti posible a biagem wenno ituloymo ket itoy a gundaway, balligi ti banagna. Ti kinamanagparnuaymo ti mangpaksiat iti dudukotmo ken mangipaay kenka iti nawadwad a grasia. Nagasat a numero: 3, 6, 8.
TAURUS (Abril 21- Mayo 20). Adda dagiti balligi a babassit iti napalabas. Mapnekka kadagiti inaramidmo. Kayatna a sawen, mabalinen a rugian ti dakdakkel a proyekto. Wenno ilawlawa bassit ti sirmataen a pagturongan. Kabaelam dayta. Ken umisu ti gundaway. Nagasat a numero: 2, 4, 7.
GEMINI (Mayo 21- Hunio 20). Panangpasaranta iti pisikal a salunat ti mangpaksiat iti laladut. No adda man dagiti limbes ti luomna wenno nasayang a grasia, kitaen ti positibo nga aspekto dagitoy kas koma panangusar a ganagan iti daga a pagmulaan a posible a mangipaay kenka iti nabunbunel pay a parabur. Masapulmo ti tiempo para laeng iti bagi tapno mapasublim ti alibtak nga apagapaman a napalusposam. Nagasat a numero: 1, 5, 8.
CANCER (Hunio 21- Hulio 20). Katinnulong dagiti amin nga adda iti aglawlawmo. No adda madi ti saadna kenka, posible a nagriroka iti panangawat. Masapulmo ti naannad a panangamiris iti adda iti kaunggam para iti nalawlawag a sao ken kapanunotan. Kadagiti masungad nga aldaw, manamnama a natalinaay ti aglawlawmo. Nagasat a numero: 3, 6, 9.