Pakagatangan iti Bannawag?
Kadagiti agindeg iti Currimao, Ilocos Norte ken kabangibangna a lugar, mabalinyo ti gumatang iti kopia ti Bannawag iti Gleeance Pharmacy iti sentro ti ili. No kayatyo ti agpareserba, kontaken ni Marie Grace R. Dabalos iti cell phone number 0918-569-2617. (Oswald A. Valente)
Kayatna, apay a saan? Adda panagayatna ken ni Mering, dina mailibak iti bagina. Kasta met ken ni Mering, adda met panangipateg daytoy kenkuana, kas naripiripnan kadagiti sumagmamano a gundaway a panagsarsaritada iti inaladan ti Guilang Rural High School. Ngem asino ita a makapanunot nga agayat iti maysa a pagtamdan a balasang a kas ken ni Emerita? Mabati ditoy Guilang, idinto nga agtuloy ni Emerita idiay Manila. Mairakedto iti pagpartuatan, ket mabalin a makasarakto ni Emerita iti sabali a lalaki idiay unibersidad… sabali a lalaki a saan a kas kenkuana, ni Salvador nga agatsang-aw ti apgad, wenno kasla iti nalangsi, nalaes a lames a kas pangawawag dagiti dadduma kadakuada a taga-Sabangan: “Nalangsi dagiti tagaSabangan…”
MATMATUROG pay laeng ni Apo Julian Manoto idi impakaammo ni Salvador ti bagina iti balasitang a babaonen ti baknang a lakay. Umalumiim ni Salvador a nagtugaw iti maysa kadagiti nasileng a palangka iti nalawa a salas, ket kalpasan ti maysa ngata nga oras, rimmuar met laeng ni Apo Julian, agimukmukat ken siaaruat pay laeng iti pajama.
“Ne, dayta ti nasayaat,” kinuna ti lakay idi nalasinna ti sangaili. “Nasayaat ti ubing a naridam. Nakasaritakon ni doktor. Saankan nga agdanag, hijo. Mano idin ti inutangyo?” inimtuodna daytoy saan a gapu ta nalipatanna no di ketdi kayatna nga iparipirip ken ni Salvador ti kinapateg ti “impaayna” a kaasi.
“Uppat a gasut ket limapulo a pisos, apo.”
“Wen, wen…” Timmangad ti lakay. “Malablabasam ti pagpartuatan, saan?” “Wen, apo.”
“Ammom no kaanonton ti pannakalukatna? Inton umay a bulan. Maysa a bulan pay sakanto mangrugi nga agtrabaho. Saanka nga agdanag, maiserrekka. Agurayka ta pirmaam ti tulag…” Simrek ni Apo Julian iti siled ket nagsubli a siiiggemen iti papel. “Ala pirmaamon ditoy.” Intudo ti lakay ti babaen ti sinuratan.
Inawat ni Salvador ti pagsurat ngem inkagumaanna a binarasbasan ti nailanad. “Ngem, apo,” tinangadna ti lakay, “saantayo met a nagtutulagan ti kasta a gatad ti anak ti innalami a—”
“Ania?” nagsanud ti lakay. “Kayatmo a sawen, kayatka a suitiken? Ne, maituredmo gayam a panunoten dayta, ah? Idi immaykayo kaniak, a kasta unay ti panagpakpakaasiyo, kurang la ti panagparintumengyo iti sangok… Awan ti dinawatko a pammatalged… pakakitaan a madadaanak a tumulong… Ngem ita ta naalayon ti kuarta, naalayon ti kayatyo, umaymo pay ipasango kaniak, siak a nakautanganyo iti naimbag a nakem, ti panagulbodko? Kayatnak sa met a pagbalinen a dakes? Asinoak, aya? Ala, asinoak?”
Bimmara ti pispis ni Salvador a kasla nakasagid iti nabudo a ruot iti baybay, aglalo idi nataldiapanna ti pamintasen a balasitang a taraken ti lakay a mangpalpaludip kenkuana iti linged ti kortina ti ridaw. Kayatna koma ti