Petision iti Panagpa-Amerika
Dear Ikit,
Dual citizen da tatang ken nanangko. Nag-US citizen-da idi kapagesda ti agsapul idiay Amerika, isu a naalada dagiti lima a kakabsatko a di pay idi naasawaan. Siak laeng nga inauna ti nabati ditoy Filipinas ta nakiasawaak idi agtawenak iti 20.
Pinetisionandakami da tatang a sangapamilia idi makipagilidan iti Amerika, 25 a tawen ti napalabasen. Idi didan kabaelan ti sumrek iti trabaho, nag-dual citizen-dan. Nagawiddan ditoy Filipinas ta agsawsawayan metten kadakuada ti pensionda a doliar, a pakairamramananmi metten.
Itay nabiit, adda simmangpet a suratmi a naggapu iti National Visa Center. Agbayadkami kanon iti processing fee, sa ipawitmi metten dagiti dokumento a kasapulan iti pannakaipagna ti petition-mi a mapan idiay Amerika a sangapamilia babaen ti petision ni tatang bayat ti kaaddada pay laeng idi ken nanang idiay Amerika. Lakay ken baketen da tatang ken nanang a siraragsaken nga agnanaed ditoy Filipinas. Kayatko met ti mapan agsapul sadiay Amerika, ngem kangrunaanna ti ipapan koma met dagiti annakko sadiay. Adda dagiti kakabagianmi sadiay a sitatallugod a mangted iti Affidavit of Support kadakami a sangaamaan.
Mabalin kadi pay a makapankami idiay Amerika babaen ti petision ni tatang, ikit?—Arnulfo
Arnulfo,
Kas petitioner, masapul nga adda ni tatangmo idiay Amerika kabayatan ti pannakaipagna ti papelesyo agingga a nakasangpetkayon idiay Amerika. Ngem nasaysayaat met laeng no duada ken nanangmo nga agsubli idiay America tapno saanto a mailila ti maysa kadakuada.
Mabalin nga innem a bulan wenno makatawen, addakayonton idiay. Ngem no addakayonton sadiay, mabalin a kaykayatdanto metten ti makipagnaed kadakayo ta dagita annakmo ket nayanak ken dimmakkelda iti Filpinas. Agsupadi ngamin ti kababalin dagiti nayanak sadiay ken dagiti nayanak iti pagiliantayo.
Gapu ta ni tatangmo ti nangpetision kenka, masapul nga addaan isuna iti Affidavit of Support (AOS) a para kadakayo a sangapamilia, agraman ti AOS dagiti kakabagianyo nga agnanaed met laeng iti Estados Unidos. Dayta ti paglintegan ti Amerika. Didakayo ikkan iti Immigrant Visa no saan nga agnaed idiay Amerika ti nangpetision kadakayo kasta met nga aggapu ti Affidavit of Support-yo idiay Amerika.
Lima dagiti kakabsatmo diay Estados Unidos. Namnamaek a matulongandaka iti pannakapanyo a sangapamilia idiay Amerika, malaksid no adda annakmo a nasuroken nga 18 ti tawenda, saandan a maikuyog kadakayo. Sikanton ti mangpetision kadakuada inton madandanonan ngem bilinem ida a idianda pay laeng ti makikalkallaysa.—Ikitmo