Dikan Agkadawyan, Atanud?
NO ti maysa a babai ket saanen nga agregla iti agsasaruno a 12 a bulan, makuna nga ag-menopause daytoyen. Addan iti tukad ti biagna a saanen nga agsikog. Kadagiti Filipina, gagangay a mapaspasamak daytoy iti edad 45 agingga iti 55.
Gagangay met nga adu ti di makaay-ayo a marikrina ti ag-menopause a kas iti panagbaliwbaliw ti templadana, di pannakaturturog, depresion, palpitasion, kdp.
Iti maysa a panagadal, natakuatan a kadagupan dagiti babbai iti sangalubongan, maysa dagiti babbai a Hapones (Haponesa) ti kabassitan iti marikrikna a di nasayaat iti panawen ti panag-menopause-da. Kunada a mainaig daytoy iti kaadu ti ipapaunegda a phytoestrogens (iti porma daytoy nga Isoflavones) a masarakan iti soy ken edamane (naganus a bunga ti soy bean) a mabalin met nga isagana a kas salad (ginulay).
Nabaknang met iti phytoestrogens ti soymilk, tofu, carrots, mansanas, berries (mairaman ditoyen ti bugnay), sesame seeds (lengnga), napagrusing a balatong, kdp.
Ibalbalakad dagiti doktor a saan koma nga urayen ti maysa a babai ti panag-menopause-na a pannangan wenno panagipaunegna kadagiti taraon a namsek iti phytoestrogen no di ket nasken a sakbayanna daytoy.