Di Pay Kayat da Luis ken Jessy ti Aganak
MABALIN a mabayag pay sa maaddaan iti apoko ni Dip. Vilma Santos.
Kuna ngamin da Luis Manzano ken Jessy Mendiola a dida kayat ti maaddaan iti anak iti tiempo ti pandemia.
Ti adatna, posible a mabayag pay sa malpas ti pandemia.
Ania ketdi koman a sayaatna no mabiiten a malpas, di kadi?
* * * Mainaig iti anak, kaano laeng a naganak ni Kristine Hermosa. Manen.
Wen, maikalima daytoyen nga anakda ken Oyo Boy Sotto.
Pammaneknek daytoy a napigsa ti nakem da Oyo ken Kristine.
* * *
Iti pannakasursurat daytoy, kaidekdeklarar iti Metro Manila ken dadduma pay a paset ti pagilian ti ECQ wenno enhanced community quarantine.
Adda dagiti artista a dismayado maibatay kadagiti paskilda iti social media.
Maysa kadakuada ni Janno Gibbs. Damdamagenna no ania ti aramidenna iti vaccination card daytoy ta agparparang nga awan ti nagdumaan ti bakunado ken saan a bakunado.
Sabagay, no siak a maysa, mabalin koma a naluklukay ti turay kadagiti bakunado—tapno maengganio pay dagiti dina kayat ti agpabakuna.
Wenno, ad-adda a matignay ti gobierno a mangikaadu iti mabakunaan iti inaldaw.
Ania man ti maaramid, mangnamnamatayo a sapay la koma ta malaktawantayonto met laeng daytoy a pandemia.—O
(Chairman ni Kabagis Eloy iti Hunta Direktiba ti FAMAS, Host-Producer ti Celebrity Hour Media Forum, ken Trustee iti Aliw Awards Foundation, Inc.—AST)