Saludsodem ken ni Apo Hues
SALUDSOD:
Iti maysa a parbangon, agalas dos ngata, natiagak ta makaisboak la unay. Idi rummuarak iti kuartomi ken baketko ket linuktak ti switch ti salas, nanakyaas manipud ditoy ti maysa a tao a nagtaray a nagpakosina. Ania payen, automatiko a nairiawko ti “Agtatakaw!” Duada gayam—kas nakitak a rimmuar iti silulukat a ridaw ti kosinami. Diakon intuloy a kinamat ida ta amangan no adda armasda.
Rimmuar met ni baketko. Iti asideg ti ridaw ti kosina, nakitami ti naisako a dua a laptop-mi ken baket nga inusarmi iti salas sakbay a naturogkami ken ti selpon ti baritomi. Agbalor amin dagitoy iti mapan a PHP100,000. Saanda la ketdi a nabitbit ti sako iti pannakakellaatda.
Iti panagsukimatmi, simrek la ketdi ti maysa kadakuada iti bassit a tawa ti kasilia a naka-jalousie ngem awan rehasna. Idi addan iti uneg, linuktanna ti ridaw ti kosina a simrekan met ti kaduana.
Iti di nagbayag, immay met ti kaarrubami ket kunana a nakitana met ti dua a tao a rimmuar iti inaladanda. Nabigbigna kano ida ta naraniag ti silaw ti poste ti barangay. Nagtaray kano dagitoy a napan naglugan iti maysa a traysikel a nakaparada iti asideg ti balayna.
Dagus a napankami nagpulong iti kapitan ken iti kuerpo ti polisia. Immayda nagimbestigar. Rinetratoda ti yan dagiti takawenda koma, ti tawa ti kasilia, kdp. Napanda binirok ti taeng dagiti dua a simrek ti balaymi ngem kapampanawda kano ket dida ammo ti napananda. Inyuli ti polisia ti darum a Qualified Trespass to Dwelling wenno iseserrek iti balay nga awan pammalubos. Nasdaawak no apay a kasta ti darum a saan ket a panagtakaw. Husto kadi ti darum nga inyuli ti polisia, Apo Hues?—Ernesto ti Pangasinan
SUNGBAT:
Segun iti Artikulo 280 ti Narebisar a Kodigo Penal (Revised Penal Code), ti kaso nga iseserrek iti balay ti pribado a tao nga awan pammalubosna (Qualified Trespass to Dwelling) ket madusa iti 6 a bulan ken P1,000.00 a multa. Ti kaso a panagtakaw (Robbery), maibatay iti Artikulo 299 agingga iti 300, dakkel ti multana segun iti balor ti natakaw ken mabayag ti pannakaibaludna—agingga iti
20 a tawen. Adu a kategoria ti panagbasol a panagtakaw, kas koma pinanggep (Attempted), nalappedan (Frustrated), ken nairingpas (Consumated). Agsasabali ti dusa ken multa dagitoy.
Babaen dagiti imbagam a napasamak, nagbiddut ti polisia iti inyulida a darum. Ngamin, ti ebidensia nga aruaten (ramit) ket addadan iti ridaw ti kosina. Nakasaganan nga iruarda. Adda panggepda nga agtakaw isu a ti darum ket panagpanggep a panagtakaw (Attempted Robbery). No kas pagarigan koma addan dita ruar ti balay dagiti naisako nga aruaten, ti basol ket saan a natuloy a panggep a panagtakaw (Frustrated Robbery) ket no addan sadiay ruar ti alad, isu daytoy ‘tay nairingpas a panagtakaw (Consumated Robbery).
Ibalakadko ngarud a paimbestigarmo manen daytoy (reinvestigation) tapno mayuli ti pudno a kaso (Attempted Robbery). Adayo a nangatngato ti dusa ken multa daytoy.—O