Inton Bigat, Agawiden
“LADIES and Gentlemen, this is Captain Moore speaking, good afternoon. In about an hour we should be on the ground at the Vancouver International Airport. The current temperature at the airport at this time is more or less fifty five degrees Fahrenheit… A band of thin clouds over the sky… A beautiful day in the City of Vancouver,” kinuna ti piloto ti Air Canada.
Kinita ni Ramses ti oras iti selponna. Alas dos iti malem. Alas singkonto ngatan no makaruar iti Immigrations and Customs ti Vancouver International Airport. Ngem amangan no adda itan ni Marisol iti eropuerto a mangur-uray kenkuana.
Pangulo ti maysa a gunglo dagiti mannurat nga Ilokano ni Mirasol. Inimbitaran daytoy a manglektiur iti panagsurat iti ababa a sarita iti umuna a literary seminar ti gunglo a sumagmamano pay laeng ti kamengna.
Mannurat met ni Mirasol; kameng met idi ti gungloda a mannurat nga Ilokano iti Hawaii. Agnaed itan iti Vancouver, British Columbia, ta nakiasawa iti Filipino a Canadian citizen.
Nagkuretret ti muging ni Ramses ta malagipna ti mensahe a naiparaipus iti naawatna nga imbitasion ni Mirasol babaen ti email. Mensahe a kunaenna a saan a mainaig iti seminar ti gunglo.
Timmakder. Ginaw-atna ti traveling bag-na nga adda iti overhead bin ti eroplano tapno basaenna manen ti mensahe iti imbitasion iti laptop-na: Ramses, addanto sorpresak kenka. And you will never regret coming to the
beautiful city of Vancouver. I’ll be at the airport ahead of your arrival waiting for you. Your hotel accomodation is taken care of. See you soon. Mirasol.
Sipud pay naawatna ti imbitasion, saanen a naikkat ti kebbakebbana. Di agtalna ti panunotna iti kuna ni Mirasol a sorpresa. Patienna lattan a pudno a dakkel a sorpresa daytoy.
Insadag ni Ramses ti ulona iti tawa ti eroplano. Binuybuyana dagiti naipattopattok a puraw ken naingpis nga ulep a naiburandis iti law-ang. Nagampayag ti panunotna iti daydi ayan-ayatda ken Fina a college sweetheart-na iti University of Northern Philippines. Maysa idi ni Fina a tampok ti kinapintasna iti unibersidad; mabirbirngasan iti Beauty Queen. Mangal-alada idi ni Fina iti Nursing; Architecture met kenkuana.
Nasurok a sangapulo ket lima a tawenen ti napalabas ngem agingga ita, nga adda payen asawana, mariknana pay laeng ti saem nga impuris ni Fina iti barukongna kadagiti kanito a malagipna daydi nasam-it nga ayan-ayatda.
Dua a tawen laeng a nagayan-ayatda ta kellaat a nagpukaw ni Fina iti unibersidad. Saannan a makontak iti selpon. Adu dagiti aldaw nga inur-urayna nga agparang ngem idi dina latta mauray, nagpakuyog iti maysa a kaklaseanna a kailian ni Fina. Napanda iti barangay daytoy tapno kasaritana ken ammuenna no ania iti parikut daytoy ket matulonganna, no adda, wenno agpakawan no adda man nakabasolanna.
Nasarakanda ti balay da Fina ngem awan ti balasang. Ammona lattan no kasano ti kinanumo ti biag ti ayayatenna idi makitana ti balay a dinakkelan daytoy. Kinuna ti ama ni Fina idi makasaritana a lipatennan ni Fina.
“Saankayo ngata nga agkagasat, barok,” kinuna idi ti ama ni Fina. “Addan ‘diay adim iti ballasiw-taaw.”
Nagkintayeg pay idi. Naimayeng. Di man la nagpakada ni Fina. “Nakiasawa kadi, tata?” nasaludsodna laengen.
Kasla makitkitana ita daydi panangisina ti ama ni Fina iti imatangna kenkuana.
“Wen, barok… maysa a negosiante a lakay,” ti ina ni Fina ti simmungbat. “Sapay koma ta makasarakkanto iti nasayaat a kagasatmo. Ladingitenmi…”
Narba a namimpinsan ti barukongna idi. Nagaramid a dagus iti surat a para ken ni Fina. Impeksana amin nga adda iti pusona; nga iti kaano man, dinanto malipatan daytoy. Inggibusna: “Diak ammo no kasano pay ita a sanguek ti biag…”
Bilin kano ni Fina a dida it-ited ti adresna iti asino man. Isu a kiniddawna nga isudanto laengen ti mangibuson iti surat.
“Wen, anakko, namnamaem dayta,” insungbat ti ina ni Fina.
Nasinga ti panagpampanunotna idi agkiling ken agsilaw ti seatbelt sign iti bobeda ti eroplano.
“Ladies and gentlemen, good afternoon. In a few minutes, we will be landing at the Vancouver International Airport. Please fasten your seatbelt and put your seat back in its normal position. And, on behalf of Air Canada and its crew, thank you for flying with us,” kinuna ti Head Flight Attendant ket kasla nangngeg ni Ramses ni baketna a nagkuna: “Addakan iti Canada!”
Daras a nakaruar ni Ramses iti Immigrations and Customs iti eropuerto. Nakitana a dagus ni Mirasol nga agpaypayapay. Adda iti asideg iti automatic sliding glass door a rummuaran dagiti pasahero. Adda kaduana a babai a naka-sunglass, pamudawen ken panguloten ti buokna.
Nagtaray ni Mirasol a nangsabat ken ni Ramses.
“Welcome to Vancouver, Ramses,” kinunana. Naginnabrasada.
Nagkebba ni Ramses idi ikkaten ti kadua ni Mirasol ti sunglass-na. Ni Fina! Isu ti sorpresa ni Mirasol kenkuana! No kasano a nagsarakda, saannan a sinaludsod. Ngem iti pannakalagipna nga agkakaprobinsiaanda laeng, nalabit dayta ti gapuna a nagtumpong dagiti dapan dagiti dua.
“Saanen a nasken a pagam-ammuenkayo,” kinuna ni Mirasol nga umis-isem idi agsasangodan a tallo.
Nagintek dagiti mata ni Ramses iti rupa ni Fina nga apagbettak ti isemna. Nariknana kadagiti mata daytoy ti sumsumged nga iliw kenkuana. Dina a maawatan no ania ti kayat a sawen ti naimatanganna a segga ti dati a kaayanayatna. Nupay nasurok a sangapulo ket lima a tawenen ti napalabas, adda pay laeng daydi kinapintas daytoy a tampok iti amin a kinapintas iti unibersidad.
“Ala, ket agkinnomustakayon, a,” kinuna ni Mirasol nga umis-isem. Pinagsinnublatna a kinita da Ramses ken Fina.
Naginnabrasa da Ramses ken Fina. Narikna ni Ramses ti nairut nga abrasa ti dati a kaayan-ayatna.
“Welcome to Vancouver,” kinuna ni Fina iti nababa a timek.
Nagtalinaed a nakaem dagiti bibig ni Ramses. Immanges iti nauneg ta nariknana a limmag-an ti barukongna iti panagkitada ken Fina.
Intulod da Mirasol ken Fina ni Ramses iti Hyatt Regency Hotel a pagyananna kalpasan ti panangrabiida iti maysa a Chinese Restaurant. Intulodda agingga iti kuartona.
“Have a good night’s sleep, Ramses,” kinuna ni Mirasol. “Tomorrow will be the day of our seminar. Fina and I will pick you up at 6 AM. Eat breakfast at the Hyatt Regency Buffet Restaurant and then go to the seminar and workshop venue.”
Nasiputan ni Ramses ti nabagas a panagkinnita da Fina ken Mirasol a kasla adda nagtulaganda.
“I’ll be at the lobby waiting for you,” kinuna ni Mirasol ken ni Fina ket immunan.
Nabati da Ramses ken Fina iti kuarto. “Pakawanennak koma iti inaramidko,” kinuna a dagus ni Fina kalpasan a nairikep ni Mirasol ti ridaw. “No nagtuokka man iti nakaro gapu kaniak, nagtuokak met ta nasakit ti riknak iti panangrakrakko daydi ayan-ayatta. Ti kinapanglawmi ti gapuna. Ammok nga ammom dayta. Naisurat da tatang ti ipapanmo idiay balaymi.” Nailabeg ni Ramses.
“Adu ti utang dagiti dadakkelko iti banko,” intuloy ni Fina, “gapu iti panagadalmi nga agkakabsat. Uray ti sangkabassit a talonmi, nayutangda ta kunada a ti adal laeng ti mabalinda nga ipatawid kadakami nga agkakabsat gapu iti kinapanglawmi. Naasianak unay kadagiti dadakkelko gapu iti adu a rigrigatda kadakami nga agkakabsat. Ket ti pannakiasawak iti taga-Canada a negosiante a lakay a naam-ammok idiay Baguio ti napanunotko nga aramiden tapno makalung-awkami iti rigat.”
Ket naamirisna a ti met laeng gayam bagina ti palpalagipanna…