Young Dreamers Club (17)
Ti Napalabas: Inabak ni Aubrey ni Nestor a presidente ti YDC. Makapungtot ni Angkel Polding aglalo ket saanda nga innala nga adbayser idinto nga innalada ni Angkel Iniong. Nadegdegan pay ta naggabbo da Nestor ken Aubrey. Saanen a kayat ni Angkel Polding a mayasideg ni Nestor ken ni Aubrey. Naminsan, inikkan ida dagiti YDC iti gundaway a makapagsolo, ngem nakita ida ni Angkel Polding ket inungtanna ni Nestor. Nagdinamag nga adda relasion da Angkel Iniong ken Anti Soledad. Kadagiti simmaruno nga aldaw, naparangarangen ti kinalailoda. Iti maysa nga agsipnget, dimteng da Angkel Pedring ken Arman iti balay da Lilac. Naripirip ni Lilac a pagsasaritaanen dagiti agkakabsat ti relasion da Angkel Iniong ken Anti Soledad. Kadagiti simmaruno nga aldaw, nagbalinen a topiko dagiti YDC ti relasion da Anti Soledad ken Angkel Iniong ken da Nestor ken Aubrey.
A(Maika-17 a Paset) GTUTUGLEPAK. Maymaysaak iti kuartok ta pinapanko dagiti estudiantek iti library. Kuna ngamin ti prinsipalmi a mairaman ti kuartok a madalusan ken maikkan kadagiti pagiddaan ta usaren dagiti atleta nga aggapu kadagiti nadumaduma nga ili. Ti distritomi ti host ita iti Sports Festival nga is-isponsoran ti maysa a nalatak a chocolate drink. Gapu ta asideg metten ti final exams, imbaonkon dagiti estudiantek iti library ta idiay nga agbasa wenno agrepasoda. Ammok met ketdi nga aggiginnantilto met laeng ti aramidenda ngem napipia ta saan a siak ti agan-anawa. Makaammo metten, a, ti librarian a mangsutsot kadakuada no makaringgorda.
“Anti Lilac!” adda nagtimek. Timmangwaak a dagus ta kasla nagtagtagainepak ket pagarupek lattan nga adda karkarna a napasamak. Kimmitaak iti ridaw. Naikuadro da Aubrey ken Shane. Maestra lattan ti takder ni Aubrey iti suotna nga uniporme. Studentteacher ngamin. Madama ti practice teaching-na ditoy pagisursuruak. Ni Shane, kasla mangop-opisina met iti suotna nga uniporme.
“Apay, addakayo ditoy?” kinunak. Pinastrekko ida.
Nagtugawda iti sangok. Adda inruar ni Shane iti backpack-na. Sinuman ken sopdrink. Ayna, dagitoy a talaga! Dayta laeng ti immayda inranta ditoy?
“Wen, a, tapno lumukmegka, anti!” kinuna ni Shane.
“Aysus, annakko, siguraduenyo met, a, nga adda interesting a balonyo no umaykayo mangsinga iti turog!” kinunak ketdi. Bulonko a nangurnos iti bagik.
“Ibagamon a dagus,” kinuna ni Shane ken ni Aubrey. Inruginan ti nangan.
Gapu ta nagimas ti pannangan ni Shane, nangalaak iti sinuman.
“Nagsarita da Anti Zeny ken mama itay,” inrugi ni Aubrey.
Tiningigak a kinita ni Aubrey. Ngumanalngal latta ni Shane a kasla awan ti rantana a dumngeg iti ibagbaga ni Aubrey.
Adu ti inistoria ni Aubrey. Ngem ti bagasna, mayaten ni Manang Rosa nga agkasar ni Anti Soledad. Tapno kano agsardengen dagiti sayangguseng. Sakiten la unay ngamin ti nakem ni Manang Rosa ti panangananunsio dagiti bumarangay kada Anti Soledad ken Aubrey. “O, di ayos! Awanen ti problema. Dakayonto lattan ken Nestor ti ananunsioanmi,” diak napakadaan a kuna ni Shane. Waeng a pudno daytoy. Ibagbaga la ngaruden ni Aubrey a ginurada ti panangananunsioda kadakuada, kasta pay laeng ti imbagana. Ken dina la nadlawen a naliday ni Aubrey. Siguro, pampanunotenna ti kasasaadda ken Nestor.
NANALTUOK ti tapon a kalub ti inted ni Angkel Iniong a blueberry wine. Impasadia ni Angkel Iniong nga inted daytoy ken ni amang ta daytoy ti magustuan ni Angkel Polding nga inumen nga adda ingelna. Nasam-it ngamin a kasla para babai. Saan met a kas kada amang, Angkel Pedring ken Angkel Iniong a sanger ni Angkel Polding. Umiinum a talaga dagitoy ket uray ania nga arak, mayat latta ti serrekna iti karabukobda. Ni Angkel Polding, napili iti inumen. No dina kayat, madi latta.
No apay a painumenda iti blueberry wine ni Angkel Polding, bareng maay-ayo daytoy ni Angkel Polding ket mayaten a makikasar ni Angkel Iniong. Ngem iti panagkunak, saan nga omobra dayta a wine ken ni angkel. Masirib ni Angkel Polding. Ken, apay, ubing a bassit nga ikkam laeng iti dulse, mayaten? Isu a panagkunak, agdepende met laeng ti amin iti diskarte da amang ken Angkel Pedring.
“Ne, nabaliwanen gayam ti ridaw ti kosinayo, ‘apid,” kinuna ni Angkel Polding ken ni amang. “Nasipnget ngaminen idi immaykami ken Henry isu a diak nadlaw.” Kimmita iti makanigidna. Mayat ti plastar ni Henry ti tugawna.
Masdaawak no apay nga adda ni Henry idinto nga awan met ti bibiangna iti pagsasaritaan dagiti lallakay. Saan ketdi nga is-isuna laeng ti adda. Adda pay da Konsehala Jane a kaduami met laeng nga adviser iti YDC ken Kapitana Mering. Nakadusngi ngarud ni Angkel Pedring itay sumrekda nga uppat iti inaladanmi. Kuna ni inang a nangala ni Angkel Polding iti partidona ta kasla saanna metten a partido da amang ken Angkel Pedring.
Umisem-isem met ni Kapitana Mering itay. Pasaray kiddayanna da inang ken Anti Laling. Kasla ibagbagana a “dakami ti makaammo ken ni Polding.” Itay masinunuo ni Anti Laling a pudno a nagpakadua ni Angkel Polding kada Kapitana Mering, awan timtimekna a bimmallasiw iti nagbaetanmi nga alad. Nasip-ak pay ti sanga ti kayanga nga inwalinna ta dina malukatan ti sinan-ruangan nga inkabil ni amang iti nagbaetanmi. Dumayamudom. Ania ngata ngamin met ti napampanunot ni Angkel Polding ta nagayab pay iti tagaili? Apay, kayatna ngata nga agwaras iti sibubukel a Laoac nga adda lakay ken baket a kasla agtutubo ti panagayan-ayatda?
Sabagay, kunada man a “truth is stranger than fiction.” Di nakappapati ngem pudno ngarud ti pakasaritaan ti ayan-ayat da Angkel Iniong ken Anti Soledad. Dumana laeng ta adda bassit pakapilawanna ta agkabagianda ngarud. Agpadada pay a lumneken ti initda. Inayon pay nga apoko ni Anti Soledad ni Aubrey a nobia met ti apoko ni Angkel Iniong a ni Nestor.
“Wen, ‘pid!” ti naladaw a sungbat ni amang. “Adda met bassit naurnongmi isu a pinagluposmin.”
Galba ti sigud a rikep ti ridaw ti kosinami. Ita, kapadanan iti ridaw iti salas. Narra.
“Ne, naimas daytoy,” indiaya ni amang ti kilawen a dilis kada Angkel Polding ken Konsehal Henry. Pinukkawanna ni inang ta idasarna ti para kadagiti babbai.
Nagpaala ni Angkel Pedring kada Arman ken Sabut iti puto, dinardaraan ken pansit idiay Urdaneta. Napia laeng ta adda ni Angkel Pedring ta kanayon a paldo daytoy. Isu latta ti mapasultag no adda paggastuan. Awan met ti reklamona. Naragsak ketdi ta maiburayna kano ti nawadwad a bendisionna.
“Nangidissokayo met laengen?” dinamag ni Angkel Pedring. “Diyo liplipatan, a, tapno didatayo dildillawen ket makapudnotayo.”
Adda ugali ni Angkel Pedring no kastoy a panagiinum.
Pulos a di lumidok no dida mangipatedted. Di met agpulotan no dida pay nangyatang wenno uray nangipuruak iti sangabassit. Nadagsen kano ti ingel ti arak kenkuana no di tungpalen dayta nga inuugma a pammati.
“Awan danag,” kinuna ni Anti Laling. “Pinaguniakon ida amin. Inayabak pati dagiti kararua dagiti ditay kabkabagian ken kaarruba. Bareng naan-annayas ti panagpapatang no ad-aduda nga umay.” Kinitana ni Angkel Polding.
Immisem iti bangbangir da amang ken Angkel Pedring. “Ania, Apo Konsehal, mayaten? Irugitayon?” kinuna manen ni Anti Laling.
“A, w-wen, a, madam!” dagdagus nga insungbat ni Henry. Naglawa ketdin ti isemna. Sinaggaysana a kinita dagiti kasangsangona. “Diak ammo no napagsaritaanyon ken ni sir…”
Nagmulagat ni Anti Laling. Nasirokna a sabali ti ibagbaga ni Henry iti kayat da amang ken Angkel Pedring a mapagsasaritaan ngem naladawen a nangampara.
“Ngem no dina pay naibaga, siakon ti mangiruangan,” inlayon a kinuna ni Henry. ”Kayatmi nga alaen ni Angkel Polding iti lineup-mi a para konsehal ti ili.”
Saan metten a nagpabatubat ni Konsehal Jane. “Ket mayat kano no maalana ti suporta dagiti kakabagianna. Isu ti kaaddami ita ta kunana nga isuda,” kinitana da amang ken Angkel Pedring, “ti pannakaadigida nga agkakabagian. A no ania ti ibagada, isu ti masurot.”
Nakigtotkami amin. Da la ngaruden amang ken Angkel Pedring, di maibagasan ti langada—no agpannakkelda gapu iti pannakadakamat nga isuda ti pannakaadigi ti pamiliami, wenno nakigtotda, wenno nakasapuldan iti rason a mangpaannugot ken ni Angkel Polding nga agkasar da Angkel Iniong ken Anti Soledad.
Ngem ni Anti Laling, uray la a limmusiaw. Agasem, nganngani pay dina kayat a napili a purok leader ni Angkel Polding— ta nariknana ti akem ni angkel idi binantayan ni angkel ni Tyson iti ospital. No angawen da Briton ken Sabut a kumandidato a barangay chairman ta saanto metten nga agpapili ni Kapitan Mering, makabusor ni Anti Laling. Ita ketdin, konsehal ti ili ti papanan ni Angkel Polding?
Kinusilapan ni Anti Laling ni Angkel Polding. “Medio adayo pay ti panagpipili ngem masapul ngamin a nasakbay ti panagsagana,” inyumbi ni Konsehala Jane. Masapul kano a mapalanasdan ti lineup innem a bulan sakbay ti panagipila iti kandidatura. Kastoy ti umuna nga estratehia tapno mapulsuanda dagiti botante. Ket no asino ti saan a nalatak a kaduada, mayamoda iti gimong. Eksaktonto inton kampania, am-ammonto idan dagiti umili.
Nadlawko a nailabeg da amang, Angkel Polding ken Anti Laling. Bumulbullad dagiti matada. Naamirisda siguro a no kontraenna ti iseserrek ni Angkel Polding iti politika, kasla isukoda metten ti panagsimpa da Angkel Iniong ken Anti Soledad. Ken, siempre, awan metten ti namnama da Aubrey ken Nestor.
Napaisemak. Nautek ni Angkel Polding, kunakto met!
Limtawen ti plano ni Angkel Polding, ket ngumayngayemngem ni Angkel Pedring…