Di Ngamin Napakpakadaan
“Kulibangbang, agawidkan ‘Diay balayyo, birbirokendakan…”
Uray ania ti mapaspasamak, Umaykanto latta sarungkaran inton rabii. Kinunam iti daydi met laeng nga aldaw A panangidulinko kenka iti nakawaknitan Dagiti barsanga ken cadena de amor.
Diak kayaten ti agpanes, Kayatkon ti mangwaksi
Ngem awan metten lua nga igaburko kenka Ta naatiananen dagitoy nasapaang a mata.
Sakbay a napuyupoy ti kandela Simrek iti silulukat a tawa Ti nangisit a kulibangbang.
Sika kadin dayta?