Dua a Daniw

Oda Para iti Asin

O sika a nagkaykaysa a daga, danum, ken angin, napurpuro ngem diamante, napatpateg ngem balitok.

Napagtalinaed a lamiis, patangkenem dagiti lasag, tulang, ken anag, a maidatonto iti pudot ti apuy. Napagtalinaed

a lagip dagiti dalluyon ti taaw, sumangsangbay a kas kadagiti lua ti tangatang. Napatpateg a kas kadagiti dalluyon iti kararua, agbanerber, agay-ayus manipud iti barukong

ti sangariwriw a bagyo, manipud iti napiglapiglatan a puso. Napurpuro ngem iti danum a naipasngay kadagiti duduogan a bantay.

Kanayon a kaduaka tunggal daliasatek dagiti lengleng a sulsuli

ti kinaadda, tunggal masabatko dagiti karkarna, kaduaka a mamagtalinaed iti bagik a daga tunggal bumallasiwak iti rangtay a mapan iti kinatdatlag. Ugasam dagiti imak,

isublim ti bara ti dara, alaem ti lamiis a mangpatibker kadagiti lasag, tulang, ken anag, a maidatonto iti bara ti beggang. Inta tarayen ti rangtay a mapan iti kinadatdatlag, a mapan iti karkarna. O sika a nagkaykaysa a daga, danum ken angin.

Oda Para iti Dalikan

Ar-arakupem ti beggang ti lubong, ti kaunggan ti tunggal daan a lagip dagiti kaamaan. Sika ti nalimed a kabagian, ti naulimek a karelasion. Nakasungrod iti barukongmo dagiti napukpukan a luppo ken takiag ti daga, mapupuoran a kas sakripisio a maidatdaton, biag a kasukat ti biag. Natibker dagiti abagam a kas kadagiti nataengan a kayo, nakatanggaya iti tangatang dagiti dakulapmo a mangdaydayaw iti Namarsua. Iggemmo dagiti kararua dagiti ayup ken mula a maisagana para iti panagtultuloy met ti kararua ti tao. Ta maymaysa ti naggapuan ti bagim ken ti bagi ti tao, pila manipud iti daga, a pagsubliannanto, pagsublian ti amin.

Ket tunggal taraon a mabukbukel manipud iti puor iti bagim pakasaritaan ti kinasariwawek ti panagraman ti tao.

Apuy ti paraburmo. Apuy ti pagpaimasmo, apuy ti yatangmo para iti sangalubongan, natalna nga apuy a mangtartaraon kadagiti kaputotan ti puli, sika ti mangpampaneknek iti kinananam ti biag iti rabaw ti daga, ti lubong a nabuniagan iti apuy nga ar-arakupem.