Okeyka, Apong
WEN, pudno a makaparagsak ti panagmulamula iti arubayan. Mariknam no kua nga as-asidegka iti nakaparsuaan. 1. Napintas la ngaruden ti makitkitam a buya, mapagnaaram pay. Masapul laeng nga addaanka iti sensibilidad wenno mata ti maysa nga artist, ken nalamiis a dakulap ti maysa a mannalon.
2. Natalgedka nga adda pangalaam iti makan iti uray ania nga oras. Maplanom no ania ti imulam ken maprosesom, ken makitam no mamin-ano nga aramidem ti kastoy a proseso iti makatawen. Masapul laeng nga ammom no kaano ti tiempo ti kastoy wenno kasta a mula. Ipakatmo met dagiti epektibo a teknik a kas iti panangitiempo iti panagmula, panagsisinnublat a panangimula iti maysa a klase ti mula, ken panagduduma dagiti mula iti aspekto ti katayag wenno kaababa. Imula met dagiti umisu iti espesipiko a disso.
3. Ita, no agsobra iti pamiliam ti maapitmo, mabalinmo nga ilako wenno ibinglay kadagiti kakaarrubam nga inton agangay, ibinglayandaka met iti no anianto a klase ti grasia. Ay ket mapagdidinnamagan dagiti produktom a kas iti nateng, prutas, ikan, karne, ken itlog. Mabalinmo pay ti agaramid iti napaapgad nga itlog, patis ken bugguong, bino ken suka, toge, inartem, jam, jelly ken kapadada.
4. Agbalin ti pagtaengam a pagtaengan dagiti nabiag a naawanan iti pagyanan partikular dagiti atap a nabiag a pinaksiat met laeng dagiti tattao. No tuladendaka dagiti kakaarrubam, nalawa ti lugar a maipaay kadagitoy napaksiat a nabiag.
5. Dagiti mulam a kayo ken muyong, sagaten wenno pengdanda ti tapok wenno makasabidong a kemikal. Kasta met a salaknibandaka manipud iti ariwawa dagiti lugan, elektroniko, kdp.
6. No adda garden a nanglawlaw iti pagtaengam, saan laeng daytoy a palamiisen ti aglawlaw. Agparnuayda iti oksiheno idinto nga agsependa ti carbon dioxide. Mapaksiat ti kinadagaang, ken maalayayan dagiti natadem a raya ti init.
7. Adda marikna a naisangsangsayan a kinatalged no adda disso a mabalin nga ibaga a permanente a pagsaadan ti pagtaengan.
8. Mapabiag ti Napukaw a Paraiso a pundasion ti adu a pammati, a tulbek met ti espiritualidad. Daytoy no kua ti naisangsangayan a kararag a maipaay iti Apo a Namarsua.
9. Ti pamilia nga agbiag a sangsangkamaysa iti sidong ti nakaparsuaan, agtalinaedda iti tunggal maysa. Maibatay daytoy iti biolohia ken ekolohia. No dagiti kameng ti maysa a sistema, ammoda ti akemda, ken raemenda ti tunggal maysa, magun-od ti kappia ken panagkaykaysa.
10. Awan ti tao nga agbibiag a kasla isla. Iti siudad, mabalintayo ti agbiag uray saantayo nga am-ammo ti kaarrubatayo. Awan ti maipakpakat dita a panagkakaarruba. Biagna, ikalakagna. Iti away, agarup agkakabiagan ti amin. Sangsangkabagi.—O