Ti Tarakenmo ken Sika
MAPALPALIIW a no makamulagaten dagiti uken, adda dagiti gundaway a kagaten ti ina nga aso dagiti annakna. Adda dagiti agdadamo nga agtartaraken iti aso nga agdanag no kastoy ti ar-aramiden ti ina kadagiti annakna. Ungtan wenno dusaenda pay ketdi ti ina nga aso.
Ngem ti kinaagpaysona, apagapaman laeng ti panangkagat ti ina nga aso kadagiti ukenna. Ipatpateg ti ina nga aso dagiti annakna. Iti apagapaman a panangkagatna kadagiti uken, maysa daytoy a wagas ti panangisuro wenno panangdisiplinana kadagiti babassit pay nga aso.
Rugian dagiti inna nga aso nga ipusing dagiti uken no madanonda ti maikapat a lawas kalpasan ti pannakaipasngayda. No dadduma, nasapsapa pay.
No ngarud kagaten wenno ilayat ti ina nga aso a kagaten dagiti uken nga agsuso, kayatna a sawen nga upayenna dagitoy. Palubosan pay laeng ti ina nga aso nga agsuso ngem butbutngenna dagiti uken tapno sagpaminsan wenno saanda payen nga agsuso.
Masansan a mapaliiw daytoy a galad ti ina nga aso no madanon ti maikalima agingga iti maikapito a lawas kalpasan a mayanak dagiti uken. Maysa daytoy a wagas ti panangisuro ti ina tapno agwaywayas dagiti uken.
No natuleng ti maysa nga uken a saan a kas kadagiti dadduma a kakabsatna, kagaten ti ina ti subsob ti paan-anawa nga uken.
Kasta met no iduronduron ti natuleng nga uken dagiti kakabsatna tapno aglisida ken tapno makaasideg iti inana.
Sagpaminsan met la ketdi a kagaten ti ina nga aso dagiti uken. Maasian met laeng kadagiti annakna.
Nupay kasta, nasken a mangiwayat kadagiti wagas tapno maliklikan ti masansan a panangkagatkagat ti ina kadagiti uken.
Kas pagarigan, no natagari ti maysa nga uken, mabalin met nga ay-aywen ti inana a kas iti panagdilpadilpatna.
No kastoy ti aramiden ti ina, masursuro ti uken ti mangdisiplina iti bagina. Adda pay dagiti gundaway nga agkikinnagat dagiti uken. No nakaro ti pannakakagat ti maysa kadagiti uken, umadayo daytoy ken saanen a makiayayam a pakaamirisan ti kimmagat a saanton a nakaro ti panangkagatna iti kabsatna.
Malaksid iti panangkagat ti ina nga aso tapno madisiplinaan dagiti uken, agtaultaul, agngernger wenno agkusilap pay.
No saan nga ikaskaso ti uken ti panagngernger ti inana, mabalin pay nga isagidsagid ti ina ti maysa kadagiti kamauna a sakana.
Saan pay a mainaig ti panangdisiplina ti amin a panangkagat ti ina nga aso kadagiti annakna. Kasla met laeng kadagiti pusa, kagaten ti ina nga aso ti teltel ti uken no kayatna a yakar iti nataltalged a disso.—O