Ti Gasatmo
VIRGO (Agosto 21- Septiembre 22). Ti panaglulukat ti klase ti manggutigot kenka tapno iturongmo ti imatangmo kadagiti aginaldaw nga obra, salun-at, ken panangtaripato iti bukod a bagi. Maidur-as ti nasayaat a kasasaadmo babaen ti panangileppas kadagiti nasken nga ileppas agpapan pay awan ti kuarta a pakairanudam kadagitoy. Manamnama ti positibo a bunga dagiti inar-aramidmo iti napalabas nga innem a bulan. Nagasat a numero: 3, 5, 9.
LIBRA (Septiembre 23- Oktubre 22).
Daytoy ti naisangrat a tiempo tapno maurnosmo dagiti sangkabasit a problema iti pamilia ken trabaho. Babaen ti panagbaliw ti urnos dagiti aktibidad, nalaka a makitam ti yan ti problema ken maipaayan iti solusion. Makatun-oyka kadagiti sungbat ken paratignay a mangtarabay kenka iti no ania ti ipangrunam, ti trabaho wenno ti pamilia. Nagasat a numero: 1, 4, 7.
SCORPIO (Oktubre 23- Nobiembre 22). Makatulong ita kenka ti panangliklik kadagiti parambak, uray pay online, kasta met iti panangi-silent mode iti selponmo tapno maipaayam ti bagim iti kasapulan daytoy a kinaulimek. Maituonmo ita ti adda nga enerhiam iti naitantantan a proyekto, ken kadagiti nasinged kenka iti biagmo. Nagasat a numero: 2, 6, 9.
SAGITTARIUS (Nobiembre 23- Disiembre
20). Adda raas a sumayaksak a dimo mapengdan ket ti agdama a community quarantine, tignayennaka a mangsukisok kadagiti wagas tapno matungpal ti kayatmo a mapasamak. Pagaayatmo ti gundaway a mabalin ken kabaelam nga aramiden ti amin. Adda ketdi tiempo a kayatmo ti agtanang ken agplano a naimbag tapno awan masayang nga enerhiam. Nagasat a numero: 3, 5, 8.
CAPRICORN (Disiembre 21- Enero 19). Mapaneknekam ita ti panagkita ti sabali kenka a maysaka a determinado, makabael ken mapangnamnamaan. Maklaatka a makaduktal a produktiboka iti napalabas nga innem a bulan, kayatna a sawen, komportable ken naragsakka iti ar-aramidem. Agannad ketdi tapno saan nga agbalin a kampante wenno natalek unay banag a kabusor daytoy ti kinaproduktibo. Nagasat a numero: 1, 4,
9.
AQUARIUS (Enero 20- Pebrero 19). Adda grasia iti pannakalimitar iti espasio.
Masursurom ti agbalin a produktibo iti bassit a rekurso ken nailet a pagpisipisan. Umisu ngarud daytoy a panawen para iti kalkulado ken planado a pamuspusan kadagiti amin a bambanag. Kuna ‘tay pagsasao: naginad ngem sierto. Nagasat a numero: 2, 6, 7.
PISCES (Pebrero 20- Marso 20). Mapidutmo kadagiti miting dagiti agbalin a tarabaymo tapno agbalin a produktibo kadagiti masungad a bulan. Naimbag met no ammo daytoy dagiti kasingedmo tapno ad-adda pay a maantisiparmo dagiti posible a parikut. Pagimbaganna, dagiti asideg ita kenka, idawdawatda ti panagballigim. Nagasat a numero: 3, 4, 8.
ARIES (Marso 21- Abril 20). Adda grasia iti panagbalin a nasintir wenno napili kadagiti pagtalekan. Makontrolmo ti situasion no kontroladom ti impormasion. Nasken ketdi nga ammom dagiti nasken a maipubliko ken saan. Bay-am latta nga agayus ti kinamanagparnuay ti panunotmo. Nasken laeng nga anamongan daytoy ti nasinged a gayyemmo. Nagasat a numero: 2, 5, 9.
TAURUS (Abril 21- Mayo 20). Makatumpongka kadagiti aramid a makatulong la ngaruden iti panagrelaksmo, adda pay sukat ti orasmo a kalalainganna a kantidad. Apaman nga adda natung-edam a proyekto, masapul nga ipamaysam nga ileppas. Tiempo ketdi daytoy ti panangisimpa kadagiti bambanag iti umisu ken nasken a puesto dagitoy. Nagasat a numero: 1, 6, 8.
GEMINI (Mayo 21- Hunio 20). Naragsak a lawas agsipud ta kabaelam itan nga iwaksi dagiti saan a nasayaat a pampanunot. Matukayka a mangileppasen iti nabayagen a plamplanuem. Awan met ti ania a pakarikutan iti salun-at ngem awan kas iti agan-annad. Napintas met a lawas a panagpirma kadagiti katulagan, ken panangbaliw iti urnos dagiti bambanag ta awisenna ti suerte a sumrek iti pagtaengan. Nagasat a numero: 2, 4, 9.
CANCER (Hunio 21- Hulio 20). Iti agdama a kasasaad, nabaelam nga ibaba bassit ti pagbasaram no ania ti naimbag, nupay maibasar met latta ketdi iti kinapudno. Naasakmo ti yan dagiti grasia ket nasayaat no makausatka iti dana nga agpapanagsubli. Nasudsudi met laeng ti balligi a marambakan no nagun-od daytoy iti legal wenno umisu a wagas. Nagasat a numero: 1, 5, 8.
LEO (Hulio 21- Agosto 20). Adda dagiti palnaad a masapul nga igetam ti panaggastosmo. No marikutan iti kastoy a kasasaad, sirmataen dagiti posibilidad a mabalin a mangipaay kenka iti naruay a rekurso ken sanikua. Maamirismo a gameng met dagiti pagayam, kinapudnona, maysa kadagiti kapatgan a gameng iti daytoy a biag. Nagasat a numero: 2, 4, 7.