TIPS Tarabay iti Pagtaengan, Salun-at ken Dadduma Pay

MULA A PARA ITI UNEG TI BALAY.

Adda dagiti mula nga agbiag uray iti panipngeten a kuarto a kas met kadagiti mula nga agbiag iti kasamekan ti kabakiran nga arigna di mastrek ti lawag ti init. No mangipuesto iti mula a para iti uneg ti balay (indoor plant), kitaen laeng a malawagan ti init uray apagbiit laeng. Liklikan met ti masansan a panangsibug kadagiti kakastoy a mula tapno saanda a matay. Sibugan laeng no mariknan a narusanger ti daga a nakaimulaanna wenno no itudokmo ‘ta tammudom, saanen a lumumlom. (Ladawan: balcony garden web/ https://www.gawin.ph)

NALAKAKA A MABATBATIBAT?

Adda epekto ti angot iti kuarto iti nasimbeng a pannaturog, kas kuna ti maysa a panagadal a naiwayat iti Alemania. Maibatay iti nasao a panagadal, nasimsimbeng ti pannaturog ken napimpintas ti tagtagainep dagiti babbai nga agatrosas (rose-scented) ti kuarto a pagturoganda a maidilig kadagiti babbai a naturog iti kuarto nga agatnabuyok nga itlog. Dagitoy a babbai a naturog kadagiti kuarto a di makaay-ayo ti angotda, gagangay met nga alimbasagenda iti iddada ken saan a napintas ti tagtagainepda. (Ladawan: https://www. alaskasleep.com)

PANANGPILI ITI TARAKEN.

Laglagipen a no dakdakkel met la ti taraken, ad-adu met laeng ti makanna ken mairugitna. Kadagiti agindeg kadagiti dadakkel nga ili wenno siudad a limitado ti espasio, maibalbalakad kadakuada nga awan kas iti babassit nga alaen a taraknen tapno basbassit ti magastoda iti makan, saanda a parikut ti pagyanan ti taraken, ken ti pagyananna iti lugan no nasken a kadua iti biahe. Malaksid iti daytoy, saanda pay a makapadagsen iti aglawlaw (environment). Kadagiti pagnaedan a limitado ti espasio, mabalinen ‘tay bassit nga aso wenno pusa—wenno ikan. (Ladawan: https:// www.aquariumcoop.com)