Ti Gasatmo
VIRGO (Agosto 21- Septiembre 22). Mausarmo a naimbag ita dagiti adda iti aglawlawmo ken ti orasmo iti daytoy nga arinunos ti bulan. Mapilim met ti umisu kenka iti tay-ak ti negosio wenno pagsapulan. Mariknam a pabor kenka ti panawen iti panagpadur-as iti kabaelam. Nagasat a numero: 1, 4, 8.
LIBRA (Septiembre 23- Oktubre 22). Adu ti makadlaw ita kadagiti maaramidam iti trabahom. Addan dagiti mamati kenka mainaig kadagiti talentom. Makaaramidka met iti naisangsangayan mainaig iti panangipakatmo kadagiti kabaelam. Iti arinunos ti bulan, adda dagiti maawatmo a naimbag a damag. Siguraduem laeng a dimo mapagsaanan ti nakalemmeng a grasia. Nagasat a numero: 3, 5, 9.
SCORPIO (Oktubre 23- Nobiembre 22). Naidumduma ti kinasuertem iti katengngaan ti bulan. Mabaelam nga idalimanek dagiti bambanag a mangidagdagel kenka, ket madlawmo a nagballigika babaen ti panagballigi iti negosio wenno panguartaam. Dakkel ti maitulong kenka ti kinapraktikalmo. Nagasat a numero: 1, 4, 7.
SAGITTARIUS (Nobiembre 23- Disiembre 20). Agpannuray kenka ni patpatgem ket ti panangipakitam ita iti panangilala wenno kinadungngo, dakkel a banag iti panagpaut ti panagtinnakunaynayyo. Pudno nga adda limitasionmo ngem saan koma a daytoy ti mangipagel kenka a manggun-od iti arapaapmo. Nagasat a numero: 2, 6, 9.
CAPRICORN (Disiembre 21- Enero 19). Malikudam met laengen ti ania man a dagensen mainaig iti relasion babaen ti panagbalinmo a napudno iti riknam. Mananam ti naimnas a bunga ti agbiag ken agtaeng iti sidong ni kappia. Pudno kenka ti pagsasao a ti naanus, makagunod. Tiempo ti panangiplastar kadagiti nasken nga iplastar. Nagasat a numero: 3, 5, 8.
AQUARIUS (Enero 20- Pebrero 19). Dakkel ti maitulong kenka dagiti naubbing pay a kameng ti pamilia. Adda dagiti impagarupmo a pannakakontram iti kallabes ket mapaneknekam ita a gapu ta maiduma laeng ti panawenmo ngem dagiti kasasaom. Bigbigem laeng a tunggal tao, addaan iti kabukbukodan a kabaelan ken wayawaya; iti kasta, mapukaw ti ania man a marikriknam a dagensen. Nagasat a numero: 1, 4, 9.
PISCES (Pebrero 20- Marso 20). Nalag-an ti riknam ta makitam a mapasamak dagiti bambanag a kas iti ninamnamam. Dimo ketdi ipempennek ti mangnamnama iti maysa a banag ta kankanayon latta nga awan ti perpekto. Mangipaay iti pagpisipisan para iti saan a naigagara a riro. Panunotem a taoka laeng tapno mapakawanmo ti bukodmo a bagi.
Nagasat a numero: 2, 5, 7.
ARIES (Marso 21- Abril 20). Naprogreso daytoy a bulan para kenka iti tay-ak ti panagparnuay. Nakainanama dagiti mapasamak iti trabaho. Agbalinka a pagwadan dagiti nasinged kenka. Nasaysayaat no saanka a makirinnupir iti kapanunotan; awan kas iti panagari ti pasiensiam ita. Napintas a panawen a panagpirma iti katulagan nangruna kadagiti dokumento iti daga. Nagasat a numero: 3, 6, 8.
TAURUS (Abril 21- Mayo 20). Makatulong kenka ti maysa a nasinged kenka a mangikeddeng no ania ti ipangrunam iti daytoy nga arinunos ti bulan. Iti tay-ak ti negosio, manamnama a makaipaayka iti tiempo a mangitandudo kadagiti produktom para iti nabungbunga a resulta. Maipapan iti panagasawa, mabalinen a yun-una ti rikna iti sidong ti legalidad, sumarsarunonton ti parambak. Nagasat a numero: 2, 5, 9.
GEMINI (Mayo 21- Hunio 20). Iti tiempo ti angol, umdasen ti ayan-ayat a napudno iti laksid ti kinaadayo iti tunggal maysa. Ipangruna ti seguridad nangruna no kabaelan pay met ti agteppel. Manamnama a maduktalan ti nasayaat a pagganaran babaen ti panangusar a naimbag iti adda a teknolohia. Nagasat a numero: 3, 6, 8.
CANCER (Hunio 21- Hulio 20). Nalaka a mapunas ti pauyo ni patpatgen no ipalagip dagiti bambanag a namagtipkel kadakayo. Ti panangputed iti purua ti solusion iti dumikar a susik wenno pinnauyo iti pamilia. Nakababain no maminsan ngem makatulong a mangparagsak kadagiti patpatgen ti agbalin a kasla bulbullagaw. Nagasat a numero: 2, 4, 7.
LEO (Hulio 21- Agosto 20). Makaduktal iti nasayud a pamuspusan a mangtaripato iti salun-at ti panunot ken pisikal a bagi dagiti kameng ti pamilia. Maysa kadagitoy ti panangbigbig iti espasio iti nagbabaetan ti tunggal maysa. No iti panagkunam ket awananka iti problema a kakastoy, sika ngarud ti kangrunaan a suporta wenno taklin dagiti addaan iti daytoy. Nagasat a numero: 1, 5, 9.